I Rois 22 - Ma Zhiklè

Mʼmetsi Achab

¹ Mvi makar ta nza, var asaɓai, te ndev Syrie a Israel.

² Te mvi mamakaraʼa, Josaphat, bi Juda, a mdo a sam bi Israel.

³ Bi Israel a ngaɗa ta golahi nengaʼa: Ramoth te Galaad a nga nga, kin sun bi dè? Nga hér gèɗ a haha èhèmè? Dara ngo-nguzlokoy auda te ri bi Syrie.

⁴ Tedeɓaʼaa ngaɗa na Josaphat: Kashkè a verzi ga a nga dè a nga gi var a Ramoth te Galaad dè? A Josaphat a ngaɗa na bi Israel: Nga, nga staɗgenè. Ndohi ga, ta ara ndohi ngaya. Plèshi ga, ta ara plèshi ngaya.

⁵ A Josaphat a ngaɗa na bi Israel: Dzhoɗo Ndo nzi pèc pècèk dai!

⁶ A bi Israel a mɓic ta ndohi nhadka ma 400, a ngaɗa ta: Amba aman i dè var a Ramoth te Galaad dè, dè i jèkeda dè? A ta gada na: Do, Bi Zhiklè a da pa ta a ri a bai!

⁷ A Josaphat a ngaɗa: Ndo nhadka ma Ndo nzi pèc pècèk ngiɗè az a haha ɓi de, aman nga slaha nga jhèɗè Ndo nzi pèc pècèk a sam na.

⁸ A bi Israel a ngaɗa na Josaphat: Ndo ngiɗè a zhè dai man nga slaha nga jhèɗè Ndo nzi pèc pècèk a sam na; aman i ndo shèwa nengaʼa, a hodkoy ma mbelaʼa ka ɓai, sèi ma ambaɓiaʼa. Nengaʼa Michée, kra Jimla. A Josaphat a ngaɗa: Bi do goɗ arsa ɓai!

⁹ A bi Israel a mbaha na ndo mizlinè bai, a ngaɗa: Bahkay Michée, kra Jimla, tsam-tsam!

¹⁰ A bi Israel, a Josaphat, bi Juda, ta nza staɗ staɗ a géɗ sam nʼnzi bi tengaʼa, a maslaka bi tengaʼa a va, a ntamagi kokwar Samarie, a ndohi nhadka ma tèlèba ta hodko ma a sam ta.

¹¹ A Sédékias, kra Kenaana, a ngau drom a züdo, a mboho: Ndo nzi pèc pècèk a goɗ ar haha: A drom züdo aranta ka da bazl ta ndohi Syrie, a ta zi ta tèlèba.

¹² A ndohi nhadka ma tèlèba ta hodko ma lèmèlèmè, a ta gaɗa: Do Ramoth te Galaad, ka da fen ta. Ndo nzi pèc pècèk a da pa ka a rai.

¹³ A ndo sak man a mdo a bahka na Michée a ngaɗa na aranta: Ndohi nhadka ma tèlèba ta hodko na ma mwuffè a bai. Ka ba, goɗ lèmèlèmè ara tengaʼa, hodko ma mwuffè!

¹⁴ Michée a ngaɗa: Ara man Ndo nzi pèc pècèk a zhè, ma man Ndo nzi pèc pècèk a da gadayè, i da menda na.

¹⁵ A nengaʼa a nshkè a sam bai, a bai a ngaɗa na: Michée, amba aman nga dè var a Ramoth te Galaad dè, dè nga jèkeda dè? A nengaʼa a ngaɗa: Do, ka da fen ta. Ndo nzi pèc pècèk a da pa ta a ri a bai.

¹⁶ Aman bai a ngaɗa na: Sak ngama man i jénjèrèʼa a mʼmbèɗè, sèi ka gadayè ma zuraʼa a nzlembaɗ Ndo nzi pèc pècèk?

¹⁷ A nengaʼa a ngaɗa: I rka ndohi Israel tèlèba, ta venda te za, ara tambakihai man ndo mɓer ta azɓai. Ndo nzi pèc pècèk a gada: Bi ta azɓai, man a de ta ngwi a gumai.

¹⁸ A bi Israel a ngaɗa na Josaphat: I gada ka ɓi dè, nengaʼa a hodkoy ma mbelaʼa asakaɓai, sèi ma ambaɓiaʼa!

¹⁹ A Michée a goɗ a vaʼa: Tsena ma Ndo nzi pèc pècèk a vaʼa di mènè! I rka Ndo nzi pèc pècèk, nʼnza a géɗ sam nʼnzi bi nengaʼa, a golahi var Zhiklè tèlèba ta zlatsa a tsagi nengaʼa, te civèɗ ri mandi ba, te civèɗ ri gula ba.

²⁰ A Ndo nzi pèc pècèk a ngaɗa: Mwoy a mpeda Achab a wi wa, aman a dè a ngi var a Ramoth te Galaad, a ta kéɗèʼa te pa? Ngiɗè a goɗ kata, ngiɗè a goɗ kata.

²¹ A Mèzhèɓ ngiɗè a nshkè, a nzlatsa a sam Ndo nzi pèc pècèk, a ngaɗa: Iyè, i da peda a wai. A Ndo nzi pèc pècèk a ngaɗa na: A mè?

²² A nengaʼa a ngaɗa: I dè a i ngwèdè va ga a mèzhèɓ ncèkèlma a ma ndohi nhadka ma nengaʼa tèlèba. Ndo nzi pèc pècèk a ngaɗa: Ka da pi a wai, ka da slaha. Do a ka gu arsa!

²³ Anai, na haha Ndo nzi pèc pècèk a mvau mèzhèɓ ncèkèlma a ma ndohi nhadka ma ngaya man ta zhè a haha. A Ndo nzi pèc pècèk a nhodko ma ambaɓiaʼa a géɗ ngaya.

²⁴ Te deɓaʼa Sédécias, kra Kenaana, a mshkè, a ntsau bazlazlam Michée, a ngaɗa: Mèzhèɓ Ndo nzi pèc pècèk a mshkè auda te ndav ga, a ngèdè a ka dè?

²⁵ Michée a ngaɗa na: Ka da rka a pats sa, aman ka da jèjèr gi, gi, gi, gai, a ka woya a ka nghédè va a pa.

²⁶ A bi Israel a ngaɗa: Va-da Michée a sam Amon, bi sojè kokwar, a sam Joas, kra bai,

²⁷ va-gaɗa na: Bai a goɗ ar haha: Va-feda ndo haha a dangai! Va-tsaka na skwi nʼndi kèshkata a iyam kèshkata, ha i ndikakaɗa deɓa amba amba.

²⁸ A Michée a ngaɗa: Aman ka da ndikakaɗa deɓa amba amba, ar Ndo nzi pèc pècèk a nhadka ma te iyè ɓai. A goɗ a vaʼa: Kinè tèlèba, ndohai, va-tsenaʼa!

²⁹ A bi Israel a Josaphat, bi Juda, to do a ta gu var a Ramoth te Galaad.

³⁰ Bi Israel a ngaɗa na Josaphat: I humbèɗè maslaka ga a i dè var. Aman ka, ka humbaɗa maslaka ngaya ɓai! A bi Israel a nhumbaɗa maslaka na, a ndo var.

³¹ A bi Syrie a njè ta ma a gèɗ a bihi kiki var nengaʼa 32 man ta zhè a sam na, a ngaɗa: Kin gso ndo ɓai, ko nkèshèa, ko mbiaʼa, sèi bi Israel staɗ!

³² Aman bihi ndohi kiki var ta rka Josaphat, ta goɗ a va ta: A vava, nengaʼa bi Israel! A ta kala na a va aman ta gshèʼa. A Josaphat a mboho a wuɗai.

³³ Aman bihi ndohi kiki var ta rkaʼa, nengaʼa bi Israel ka ɓai, ta jèkeda.

³⁴ A ndo ngiɗè a nloto lèkèɗ na ambali genè, a sulom a mpèkèt na auda te rai, a nda dza na bi Israel, a mbeza a slrats limbèt. A nengaʼa a ngaɗa na ndo ngs plèsh na: Dyè a deɓa, auda a ma var, mblè a va ga!

³⁵ Aman a pats sa, var nduzoʼa. A bi a nzala ta va a gèɗ a ndohi Syrie, ha dakwaɗ, a nzlatsa te kikai, a Pombaz a nhakaɗauda te mblè nengaʼa, a nhu a kikai. A dakwaɗ a mʼmets na.

³⁶ Aman pats a nkala ma, ta boho a wuɗai te va ndohi var: Staɗ staɗ tèlèba a gi na, staɗ staɗ tèlèba a kokwar na,

³⁷ te man bi a mʼmets na! A ta men ta a deɓa a kokwar Samarie, a ta rda bi a Samarie.

³⁸ Aman ta pana kiki a sam thal iyam te Samarie, kdadihai ta nèkèɗè pombaz nengaʼa, a fali dalahai ta pana va ta te pa, ara man Ndo nzi pèc pècèk a ngoɗa.

³⁹ Ma ngiɗè a géɗ mizlinè Achab, a géɗ skwi man a gau, a géɗ skwi man a rom a zlèʼèn fakawai, a kokwarhi tèlèba man a roma, ta windeda ɗèlèwèr ma bihi Israel.

⁴⁰ A Achab a mʼmets na a va babhi nengaʼa, a Achazia, kra nengaʼa, a ngu bi te di man a nengaʼa.

⁴¹ Josaphat, kra Asa, a ngu bi a géɗ Juda, aman Achab, bi Israel a ngu bi te mvi mafaɗaʼa.

⁴² Mvi Josaphat 35, man ta feda a bai, a ngu bi te Jérusalem mvi 25. Nzlembaɗ mam na Azuba, dem Shilki.

⁴³ A nengaʼa a ndzodzor civèɗ Asa, bab na, te skwi tèlèba, a mbeza zlawa bai, a ngau skwi man ambaha Ndo nzi pèc pècèk.

⁴⁴ Aman sam mvi skwi a Zhiklè a géɗ za, a ngedas ta bai. Ndohi to do a ta zla na skwi a Zhiklè a ta ndara na ɓurdi a géɗ za pèc pècèk.

⁴⁵ A Josaphat a ntsu gumi a bi Israel.

⁴⁶ Ma ngiɗè a géɗ mizlinè Josaphat, a géɗ maya na man a ngreda auda, ara man a gu var, ta windeda ɗèlèwèr ma bihi Juda.

⁴⁷ Njèkèɗi ndohi mali Sodome, man ta jèkaha va a sam Asa, bab na, a ndzam ta aussa te kokwar.

⁴⁸ Te ndev nasa bi a te Edom ɓai, sèi bi Juda a mfeda ndo mbiaʼa a pa.

⁴⁹ A Josaphat a ngu wurom Tarsis 10, a woya a nzlinde ta a Ophir a nda hulkoɗi guro. Aman wuromhi ta pasl ta a iyam te Etsjon-Guéber, ta ndika ɓai.

⁵⁰ A Achazia, kra Achab, a ngaɗa na Josaphat: Va ta civèɗ a ndohi mizlinè ngaya a ta dè a verzi ndohi mizlinè ga a wurom! Aman Josaphat a woya ɓai.

⁵¹ A Josaphat a mʼmets na a va babhi na, a ta rda a kokwar David, bab na. A Joram, kra nengaʼa, a ngu bi te di man a nengaʼa.

⁵² Achazia, kra Achab, a ngu bi a géɗ Israel, te Samarie, aman Josaphat, bi Juda, a ngu bi te mvi 17. A ngau bi a géɗ Israel mvi cèw.

⁵³ A nengaʼa a nga skwi man ambaha Ndo nzi pèc pècèk ɓai. A ndzodzor civèɗ bab na, a civèɗ mam na, a civèɗ Jéroboam, kra Nebath, man a wushede ta ndohi Israel a malai.

⁵⁴ Nengaʼa a ndzodzor Baal, a ntsu ri a nengaʼa, a mpoko na géɗ ndav auda a Ndo nzi pèc pècèk, Zhiklè Israel, lèmèlèmè ara bab na.