I Rois 21 - Ma Zhiklè

Gi lak Naboth

¹ Te deɓ skwi haha, a gu aranta: Te Jizréel, Naboth a nʼngots gi wof, a tsagi gi bi Achab, bi Samarie.

² Achab a ngaɗa na Naboth: Vay gi wof ngaya, i da gi a gi lak ga, a géɗ man a zhè ndul ndul a sam gi ga. I da va ka gi wof man a fena nengaʼa te diaʼa. Man ɓai, aman ka woyaʼa, i shumaʼa a sulai.

³ Aman Naboth a ngaɗa na Achab: Ndo nzi pèc pècèk da ɓeryè, i va ka skwi nʼndi gi babhi ga azɓai!

⁴ A Achab a nshkè ngwai, a ɓüc ma, a gi ndav, a géɗ ma man Naboth a ngaɗa na, i vi skwi nʼndi gi babhi ga azɓai. A mʼmanahi a sam-mʼmènè na, a nʼngwoda ma na a dergai, a woy skwi nʼndi ɓai.

⁵ A Jézabel, ngwoz na, a nshkè a sam na, a ngaɗa: Ka ɓüc ma, ka ndi skwi azɓai, nʼnga ka mè?

⁶ A ngaɗa na: A géɗ man nga goɗ a Naboth te Jizréel. I gada na: Vay gi wof ngaya, a i shumaʼa. Man ɓai, man ka woyaʼa, i da va ka gi wof ngiɗè te diaʼa man a fena nengaʼa. Aman nengaʼa a ngaɗa: I va ka gi wof ga azɓai.

⁷ Jézabel, ngwoz nengaʼa, a ngaɗa: Ngi bi te Israel wa? Slambaɗa, ndau skwai, gau langlangaʼa! I gi maya aman a ka ngècè gi wof Naboth te Jizréel.

⁸ A nengaʼa a mwindo ɗèlèwèr, a nzlembaɗ Achab, a ntkotsama na ma a tèslri bai. A nzlinda ta ndohi nhalaʼa a mbibihiaʼa te kokwar na, man ta nza te kokwar staɗ a nda Naboth.

⁹ Te ɗèlèwèr a ngaɗa: Vo-boho aman ndohi ta jèkeda skwi nʼndai. Va-va na sam nʼnzi man a géɗèʼa a Naboth, te va nhèyè ndohai.

¹⁰ Te deɓaʼa va-nzede ndohi falihi cèw zuraʼa a ma nengaʼa, aman ta da pinèʼa, a ta gada: Ka durɗo Zhiklè, ka durɗo bai! Te deɓaʼa va-daʼa auda a dal kokwar, a kin keɗaʼa a kwa.

¹¹ A ndohi nhalaʼa a ndohi mbibihiaʼa te kokwar nengaʼa ta gu ara man Jézabel a dzhaɗ ta, ara man a Windo te ɗèlèwèr man a zlinde ta.

¹² Ta boho aman ndohi ta jèkeda skwi nʼndai. Ta nzede Naboth a sam nʼnzi man a géɗèʼa te va nhèyè ndohai.

¹³ A ndohi cèw ta shkè, falihai, a ta nzahi zuraʼa a ma nengaʼa. A falihi sa ta pin Naboth a sam di ndohai, a ta gada: Naboth a ndurɗo Zhiklè, a ndurɗo bai! A ta daʼa auda a dal kokwar, a ta keɗaʼa a kwa.

¹⁴ A ta zlündo ndo a sam Jézabel a ta menda na: Ta kola Naboth a kwa, a mʼmets na ma.

Elie a hodko ma kita a géɗ Achab

¹⁵ Aman Jézabel a ntsena ma haha ma, ara man ta kol Naboth a kwa, a mʼmets na ma, Jézabel a ngaɗa na Achab: Slambaɗa, co gi wof Naboth te Jizréel man a woya a mpra ka ɓai – a ngaya ma! Nshèffè Naboth klèng ma, a mʼmets na ma.

¹⁶ Aman Achab a ntsenaʼa, Naboth mʼmets na ma, a nslambaɗa, a ndo a gi wof Naboth te Jizréel, a ncèʼa aman a na.

¹⁷ A Ndo nzi pèc pècèk a ngaɗa na Elie te Thishbé:

¹⁸ Slambaɗa, do a kin da zli gèɗ a Achab, bi Israel. Na zhè te Samarie. Nengaʼa a mdo a gi wof Naboth tok tok haha, a woya a ncè aman a na.

¹⁹ A ka gaɗa na: Ndo nzi pèc pècèk a goɗo ar haha: Ka keɗa ndo a ka ndi skwi nengaʼa langa dè? Te deɓaʼa ka da gaɗa na ar haha: Ndo nzi pèc pècèk a goɗo ar haha: A sam man kdadihai ta nèkèɗè pombaz Naboth, kdadihai ta da nèkèdè pombaz ngaya arsa.

²⁰ A Achab a ngaɗa na Elie: Ka ndo mayam ga, kashkè a sam gaza ɗè? A Elie a ngaɗa na: I shkè a sam ngaya zaʼa, te man ka zede gèɗ ngaya, a ka gu skwi man ambaha Ndo nzi pèc pècèk ɓai.

²¹ Iyè i woy a i zlindè skwi mwuɗitpa a géɗ ngaya, i kalde ka aussa, a i zede verzi ngaya, ngurhi ngurhi tèlèba, golahi a ngurhi te Israel, ko ɓèlè, ko kra ngwai.

²² I gi a ndohi gi ngaya lèmèlèmè ara man i ga ta ndohi gi Jéroboam, kra Nebath, a ndohi gi Baescha, kra Achija, a géɗ man ta pokoy gèɗ ndav auda, a ka peda Israel a wai a ngi malai.

²³ A Ndo nzi pèc pècèk a goɗ a géɗ Jézabel ba: Kdadihai ta da ndeda Jézabel a ma a dergi kokwar Jizréel.

²⁴ Ndo te verzi Achab man a da metsi na te kokwar, kdadihi ta da ndiaʼa. A ndo man a da metsi na a dala, ɗiakihai tʼhwaɗ giɗfèk ta da ndiaʼa.

²⁵ A vava, ndo ngiɗè a ngau skwi man ambaha Ndo nzi pèc pècèk gar Achab ɓai. Jézabel, ngwoz nengaʼa, a mpeda a wai.

²⁶ Nengaʼa a ngau skwi man a ndèrè a ndo, a ndzodzor vrihai, lèmèlèmè ara ndohi Amor man ta gau, a Ndo nzi pèc pècèk a ndzam ta a ma ndohi Israel.

²⁷ Aman Achab a ntsena ma haha, a nkuratseda maslaka nengaʼa aussa, a mfeda maslaka sam kuɗa a va, a njèkeda skwi nʼndai. A vaɗ a mʼmanahi a maslaka sam kuɗa a va, a pats a shèwèlè a gèɗ a ndav.

²⁸ Te deɓaʼa Ndo nzi pèc pècèk a ngaɗa na Elie, ndo Thishbé:

²⁹ Ka rka ara man Achab a manda gèɗ a hi a sam ga dè? A géɗ man a manda gèɗ a hi a sam ga, i zlinda na skwi mwuɗitpa aman a zhè a nshèffè di azɓai. Aman a pats man kra nengaʼa a gi bai, i dè zlindè skwi mwuɗitpa a géɗ ndohi gi nengaʼa.