I Rois 20 - Ma Zhiklè

Achab a ngu ngul Ben-Hadad, bi Syrie

¹ A Ben-Hadad, bi Syrie, a mɓic ta ndohi var nengaʼa tèlèba. Bihi kokwar nengaʼa ta zhè 32, a plèsh a kiki var. A to do a ta gu var, a ta kala na a va kokwar Samarie.

² A nzlinde ta ndohi sak a sam Achab, bi Israel, a kokwar,

³ a ngaɗa na: Ben-Hadad a goɗ ar haha: Verzhège-nè a guro ngaya a ga ga. Ngwozi ngaya, a wudahi ngaya mbelaʼa, a ga ga.

⁴ Bi Israel a mʼmbeɗa na a ma, a ngaɗa: Bai, bi ga, ara man ka goɗa. Nga a nda skwi ga man i ngotso tèlèba, a ngaya.

⁵ Aman ndohi sak ta shkè a deɓa a ta gada: Ben-Hadad a goɗ ar haha: A matsa i gada ka: pay verzhègenè a guro a ngwozi a wudahi ngaya.

⁶ Aman angoslèm, a sam aranta, i da zlindè ndohi ga, ta da tivè a gi ngaya, a gi ndohi mizline ngaya. Skwi tèlèba man ambaha ta, ta da cèʼa, a ta heldama.

⁷ A bi Israel a mbaha ta ndohi nhalaʼa te kokwar tèlèba, a ngaɗa: Va-rka, ndo haha a hér skwi man ambaɓai! Aman a zlündo ndo a sam ga, a ndzhoɗo ngwozi a wudahi ga, a verzhègenè a guro ga, i gada na i gada i via azɓi ɓai.

⁸ A ndohi nhalaʼa tèlèba a ndohi tèlèba ta gada na: Ka co ma nengaʼa ɓai, ka fu nzlembaɗ a ma nengaʼa ɓai!

⁹ A nengaʼa a ngaɗa ta ndohi sak Ben-Hadad: Va-gaɗa na bai, bi ga: Skwi tèlèba man ka dzhoɗo nshèlèkuraʼa a sam ɓèl ngaya, i da giaʼa. Aman skwi haha i slaha a i gia ɓai. A ndohi sak to do ta, a ta menda na ma nengaʼa.

¹⁰ A Ben-Hadad a nzlündo ndo, da gada na: zhiklèhi da gay mèmè, da gay skwi ambaɓiaʼa a vaʼa, aman vatasl gi te kokwar Samarie a slra nga a ri ɓai, man i pa ta a ri a ndohi var ga!

¹¹ A Bi Israel a mʼmbeɗa na a ma: Va-gaɗa na: Ndo man a ndzawda godom na a deɓa da fu va ara ndo man a nkelawda godom na a hi ma ɓai!

¹² Aman ngiɗè a ntsena ma haha, ta sau zom a nda bihi te gai, a ngaɗa ta golahi nengaʼa: Va-slambaɗa, va-daha va! A to do a ta hün ngi var a kokwar.

¹³ A ndo nhadka ma a nherda na va a Achab, bi Israel, a ngaɗa: Ndo nzi pèc pècèk a goɗ ar haha: Ka rka ndohi rèdèdèa haha dè? A patsna i da pe ta a ri ngaya, a ka da suna, iyè Ndo nzi pèc pècèk.

¹⁴ Achab a ngaɗa: Nda slaha ta wa? A nengaʼa a ngaɗa: Ndo nzi pèc pècèk a ngaɗa: Golahi bihi kokwar hkèshèa ta slaha. A nengaʼa a ngaɗa: Ndè zlèr var wa? A nengaʼa a ngaɗa: Ka!

¹⁵ A nengaʼa a mparka ta golahi bihi kokwar nkèshèa. Ta tèlèba 232.

¹⁶ A ta slambaɗa, a géɗ pats, a Ben-Hadad a si zom te gai, a zom a nkeɗaʼa, nengaʼa a bihi kokwar nengaʼa 32.

¹⁷ A golahi bihi kokwar nkèshèa ta zlor var. Ben-Hadad a nzlündo ndo aman a ngel dai, a ta shkè a ta ngra na: Ndohi ngiɗè ta shkè te man a civèɗ Samarie.

¹⁸ A ngaɗa: Va-parka ta a ɓèlè, ko ta shkè a mwoy-ma, ko ta shkè a mwoy-ma ka ɓai!

¹⁹ A tengaʼa ta shkè auda te kokwar, a golahi bihi kokwar a ndohi var ta te deɓ ta.

²⁰ A golahi bi Achab tèlèba, ngiɗè a kéɗè a na, ngiɗè a kédè a na. Ben-Hadad, bi Syrie, amʼmbel na a deɓ plèsh, a ndohi plèsh a verzi na. Ndohi Syrie ta hu ta, a ndohi Israel ta hu a verzi ta.

²¹ A bi Israel a mdo, a nhul plèshihai a kiki var man a ndumkoɗi a sam ndohi Syrie kumba.

²² A ndo nhadka ma a nherda na va a bi Israel, a ngaɗa na: Do! Ngatsa na wuɗi a va dai! A tèra bi Syrie a da shkè a deɓa a nda gi var a ka.

²³ A ɓèlèlihi bi Syrie ta gada na: zhiklèhi tengaʼa, zhiklèhi nte za, a géɗ nengaʼa ta fen nga. Anai sèi nga gi var a nda ta a dala. A nga da fen ta.

²⁴ Gu skwi aranta: Cèma ta bi auda te ri bihi kokwar staɗ staɗ tèlèba, a ka feda ngul ndohi var a samaʼa.

²⁵ Ka, ɓica ndohi var a sam ngaya lèmèlèmè ara ndohi var man ta bazl ta a sam ngaya, a plèshihai a kiki var kumba lèmèlèmè ara plèshi a kiki var nshèlèkuraʼa. Te deɓaʼa nga da gi var a tengaʼa a dala, a nga da fen ta. A bi Syrie a nco ma tengaʼa, a ngu arsa.

²⁶ Aman vi kala auda ma, Ben-Hadad a mparka ta ndohi Syrie, a to do a nda Aphek a nda gi var a ndohi Israel.

²⁷ A ndohi Israel ta ɓica va, a skwi nʼndi te ri ta, a to do aman ta zli gèɗ, a ta nza zuraʼa a ma ndohi Syrie, ara rèwè nkèshèa cèw. Ndohi Syrie, ta ndha kokwar.

²⁸ A ndo Zhiklè a nherda na va a bi Israel, a ngaɗa: Ndo nzi pèc pècèk a goɗ ar haha: A géɗ man ndohi Syrie ta gada: Ndo nzi pèc pècèk, Zhiklè nte za, Zhiklè a dala ka ɓai, i da pe ta ndohi rèdèdèa haha tèlèba a ri ngaya, a kin da suna, i Ndo nzi pèc pècèk.

²⁹ A ta ɓica va aranta, zur zuraʼa, te mʼmèn matsaraɗaʼa, var a nhüno. A ndohi Israel ta bazl ta ndohi Syrie, ndohi nda a sak 100.000, a pats staɗ.

³⁰ Njèkèdiaʼa ta hu ta a hwaɗ kokwar Aphek, a zlazlar kokwar a mbeɗka ta a gèɗ a njèkèdia ndohi 27.000. Ben-Hadad a hu na a kokwar, a ndzodzor gi, gi, gi, gai.

³¹ A ɓèlèlihi nengaʼa ta gaɗa na: Nga tsenaʼa, ara man bihi ndohi Israel, ndohi ta se ta te va. Va-nga civèɗ a nga peda maslaka sam kuɗa a va, a nga pèdè hubat a gèɗ, a nga dè a sam bi Israel. Wa ngiɗè ba a da jèka ka nshèffè.

³² A ta peda maslaka sam kuɗa a va, a ta paɗda hubat a gèɗ, a ta shke a sam bi Israel, a ta gada: Ben-Hadad, ɓèl ngaya, a gada: Kam, kam, ka jèkay nshèffè! A nengaʼa a ngaɗa: Na zhè a nshèffè di dè? Nengaʼa kramam ga!

³³ A ndohi ta hur a goɗ ma mbelaʼa, ta co a ta gaɗa na a vaʼa: Ben-Hadad, kramam ngaya! A nengaʼa a ngaɗa: Vo-do, va-bahka na, aman a shkè.

³⁴ Ben-Hadad a ngaɗa na: Kokwarhi man bab ga a helama na bab ngaya, i da va ka a deɓa, ko te Damas. Ka slaha ka gi gi gani a pa, ara man bab ga a ngau te Samarie. Aman nga derzla ma nga aranta, vay civèɗ a i dè ga. A ta derzla ma ta, a mva na civèɗ.

³⁵ A ndo ngiɗè te va ndohi nhadka ma a ngaɗa na mandal na, ara man Ndo nzi pèc pècèk a ngaɗa na: Tsyè dakwa! Aman ngiɗè a woya a ntsia ɓai.

³⁶ A ngaɗa na: A gèɗ man ka tsena ma Ndo nzi pèc pècèk ɓai, na haha, aman ka dè auda a sam ga, marizhèlè a da keɗe ka. A nengaʼa a ndo auda a sam na, a ta zhi gèɗ a marizhèlè, a nkeɗaʼa.

³⁷ A nʼngots ndo ngiɗè, a ngaɗa: Tsyè dakwa! A ndo massa a ntsau, a nʼnga na mblè a va.

³⁸ A ndo nhadka ma a nzlatsa na ma a bai a civèɗ. A nʼngheda va na a maslaka a dai.

³⁹ Aman bai a mbeza na a tsagai, a mbaha na bai, a ngaɗa: Ɓèl ngaya a ndikè a dal var, a ndo ngiɗè a shkè auda te va ndohi var, a nda ndo ngiɗè a ngaɗa: Ɓür ndo haha! Aman a da wuc na, nga pilèʼa a ka, a ka da pil sulai gurso 1.000.

⁴⁰ Aman i gu do auna, do auna, i gi shkè – ndo asaɓai. A bai Israel a ngaɗa: Ka ngul kita a ma ngaya, a ndo massa.

⁴¹ A ngiɗè a nco maslaka na auda a di tsam-tsam, a bi Israel a suna, ndo nhadka ma.

⁴² Nengaʼa a ngaɗa na: Ndo nzi pèc pècèk a goɗ ar haha: A géɗ man ka va na civèɗ a ndo man i phomda, ka paɗda mʼmetsi nengaʼa a daʼai ngaya, a mʼmetsi ndohi nengaʼa a ndohi ngaya.

⁴³ A bi Israel a ndo ngwai, a ndav, ambaha ɓai. A mshkè a kokwar Samarie.