I Rois 2 - Ma Zhiklè

David a nje na ma a gèɗ a Salomon

¹ Aman tiɗè mʼmetsi David ma, a njè na ma a gèɗ a Salomon, kra na, a ngaɗa:

² I da metsi ga ara ndohi tʼherkeda tèlè mènè. Mana ndav ngaya ara nguraʼa!

³ Gu mizlinè ngaya a nlèɓèslè a sam Ndo nzi pèc pècèk, Zhiklè ngaya! Do a civèɗ nengaʼa! Dzodzor ma nkwèrè, a ma kita, a ma malwuɗi, a ma nengaʼa man a de nga a vna, ara man ta zhè te ma kita Moise! A skwi mèmè man ka da giaʼa, a skwi mèmè man ka da hinèʼa, a dè amba amba.

⁴ A skwi man Ndo nzi pèc pècèk a mpasla ri a pa, a da gi a ma ma, man a ngadayè: Aman wudahi ngaya ta dè a sam di ga zuraʼa, a ndav tèlèba, a nshèffè tèlèba, i da geda ka verzi ngaya auda a sam nʼnzi bi Israel azbai.

⁵ Ka ba ka sun skwi man Joab, kra Tseraja, a gayè, aman a mbazla bihi sojè Israel cèw: Abner, kra Ner, a Amasa, kra Jéther. A mbazl ta, a pats man var nzlar ɓai, ambalai, a Pombaz a nʼnga na a skwi njèwè va na, a kotokoroh te sak na.

⁶ Maya ngaya a zhè, ko Abner nhala ma, ka da va na civèɗ ndè a vèvèɗ a pombi ɓai.

⁷ A gèɗ wudahi Barsillai te Galaad, ga ta skwi man amba, wara ta dai, da ndu skwi a sam ngaya. A pats man i hu ga auda a sam Absalom, kramam ngaya, tengaʼa ta takahayè.

⁸ Shimei, kra Géra, ndo Benjamin te Bachurim, a zhè a sam ngaya. Nengaʼa man a nderdyè a hai a pats man i do Mahanaim. A mshkè a nga zlü gèɗ a ma woyam Jourdain, a i mbada na a sam Ndo nzi pèc pècèk, a i gaɗa: I da keɗe ka a tsakwal azɓai.

⁹ Anai fa na mali a gèɗ. Ka, maya ngaya a zhè a ka sun skwi man ka da giaʼa. Do do vèvèɗ a mali a gèɗ.

Mʼmetsi David

¹⁰ Te deɓaʼa David a mʼmets na a va bababhi na, a ta rda a kokwar David.

¹¹ David a ngu bai a géɗ Israel, mvi 40. Mvi 7 te Hébron, mvi 33 te Jérusalem.

¹² A Salomon a nʼnza a géɗ sam nʼnzi bi David, bab na, a kokwar-bi nengaʼa a nʼnzal na a ma ma.

Salomon a keɗa Adonia

¹³ Adonia, kra Haggit, a mshkè a sam Batshéba, mam Salomon, a nengaʼa a ngaɗa na: Ka shkè a gumi dè? A nengaʼa a ngaɗa: A gumai.

¹⁴ Te deɓaʼa a ngaɗa: Mbrok ga a zhè a sam ngaya. A nengaʼa a ngaɗa na: Goɗ ma ngaya!

¹⁵ Adonia a ngaɗa: Ka suna, ar i gi bi a géɗ Israel. Ndohi Israel tèlèba ta woy man i gi bai. Antanta nʼngwoda na, a kramam ga a ngau bai, a géɗ man Ndo nzi pèc pècèk a mva na.

¹⁶ Anai i jhèɗè skwi staɗ a sam ngaya. Ka kwola ma ga ɓai! A Batshéba a ngaɗa na: Goɗ ma ngaya!

¹⁷ A nengaʼa a ngaɗa: Do a ka gaɗa na bi Salomon, da vay Abishag, dem Sunem, a ngwoz. Salomon a da kwola ma ngaya azɓai.

¹⁸ A Batshéba a ngaɗa: Amba! I da menda na ma ngaya a bai.

¹⁹ A Batshéba a mdo a sam bi Salomon, aman a menda na ma Adonia. A bai a nslambaɗa aman ta zli gèɗ, a ngurɓahai a sam na, a ndè a nzi a géɗ sam nʼnzi bi nengaʼa. A ta feda sam nʼnzi ngiɗè a pa, a mam bai a nʼnzahi te civèɗ ri mandi nengaʼa.

²⁰ A nengaʼa a ngaɗa na: I woy a i jhèɗè skwi kèshkata a sam ngaya. Ka kwola ma ga ɓai! A bai a ngaɗa na: Dzhoɗo! I kwèl ma ngaya azɓai.

²¹ A nengaʼa a ngaɗa: Va na Abishag, dem Sunem, a ngwoz a Adonia, kramam ngaya!

²² A bi Salomon a mʼmbeɗa na a ma, a ngaɗa na mam na: Ai, ai, ai, ka jhèɗè Abishag, dem Sunem, a ngwoz a Adonia èhèmè? Dara ka jhèɗè kokwar-bi a deɓa! Nengaʼa kramam ga tsuvomaʼa ka ɓi dè? A ta humda ma ta a Abiathar, ndo mvi skwi a Zhiklè, a Joab, kra Tseruja!

²³ A bi Salomon a mʼmbaɗa a sam Ndo nzi pèc pècèk, a ngaɗa: A géɗ man Adonia a ngod ma haha, sèi ta da keɗaʼa, ko Zhiklè a da gay kèkè!

²⁴ Anai, a sam Ndo nzi pèc pècèk man a zhè a nshèffè, man a fiyè a bai, man a nʼnzedyè a géɗ sam nʼnzi bi David, bab ga, nengaʼa man a hün verzi ga aranta, a pats mpatsna Adonia a da metsi na.

²⁵ A bi Salomon a nʼngra na ma haha a Benayahu, kra Jehoyada, a nengaʼa a nkeɗaʼa.

Salomon a kwola Abiathar

²⁶ A bai a ngaɗa na Abiathar, ndo mvi skwi a Zhiklè. Do ngaya a kokwar Anathoth, man gi dau ngaya te pa! Mali ngaya ar ta pilè a mʼmetsai. Aman a patsna i keɗe ka azɓai, a géɗ man ka zuɓ koti nderzle-ma Bi Zhiklè a ma David, a ka su matakwan a verzi bab ga.

²⁷ A Salomon a ndzamda Abiathar auda a sam mizlinè mvi skwi a Ndo nzi pèc pècèk, a ngu ara man Ndo nzi pèc pècèk a goɗ a géɗ ndohi gi Eli, te Silo.

Salomon a keɗa Joab

²⁸ A ma haha a ntsena na a zlembaɗ Joab. Joab ta humda ma ta a Adonia, ko halaʼa ta mba a va Absalom ɓai. A Joab a mhu a gi Zhiklè, a ngso va a drom a tsagi sam mvi skwi a Zhiklè.

²⁹ A ta ngra na bi Salomon: Joab a mhu a gi Zhiklè, a tsagi sam mvi skwi a Zhiklè. A Salomon a nzlündo ndo a sam Joab, aman a gaɗa na: Ka hi a sam mvi skwi a Zhiklè èhèmè? A Joab, a ngaɗa: I gi zlau ngaya, a i hi a tsagi Ndo nzi pèc pècèk. A Salomon a nzlündo Benayahu, kra Jehoyada, a ngaɗa: Do, keɗaʼa!

³⁰ A Benayahu a mshkè a gi Ndo nzi pèc pècèk, a ngaɗa na: Bai a ngaɗkay arsa: Washkè auda! Aman nengaʼa a ngaɗa: Aʼai, sèi i metsi ga a haha. A Benayahu a mʼmenda na ma nengaʼa a bai, a ngaɗa: Joab a ngod kata kata, a mʼmbeɗay a ma kata kata.

³¹ A bai a ngaɗa na: Gau ara man a ngaɗa ka. Keɗa a pa, a ka raʼa. A ka cèmay mali Joab man à mbazl ta ndohi man ta gu mali ɓai auda a géɗ, a gèɗ ndohi gi bab ga.

³² Ndo nzi pèc pècèk a da ngwoda na mali a gèɗ. Nengaʼa man a mbazl ta ndohi nzuraʼa cèw man ta fena nengaʼa, a mbazl ta a tsakwal, a David, bab ga, a sun bai: Abner, kra Ner, a Amasa, kra Jéther, bi-sojè ndohi Juda.

³³ Joab a ndohi te verzi nengaʼa ta pil nshèffè Joab a mèdèp, a ri ta. Aman David a ndohi te verzi nengaʼa, ndohi gi nengaʼa a sam nʼnzi bi nengaʼa, ta ngècè pombai a sam Ndo nzi pèc pècèk a mèdèp.

³⁴ Benayahu, kra Jehoyada, a mdo, a nkeɗaʼa. A ta rda a gi nengaʼa tʼhèshèkèɗ.

³⁵ A bai a mfeda Benayahu, kra Jehoyada, a bi-sojè te di man a nengaʼa. A mfeda Sadok, ndo mvi skwi a Zhiklè, te di man a Abiathar.

Shimei a zeda nshèffè na

³⁶ A bai a nzlündo ndo, da bahka na Shimei, a ngaɗa na: Geda gi ngaya a Jérusalem, a ka nza a pa! Ka sawala a sam ngiɗè asaɓai!

³⁷ A pats man ko do a ka tawaɗa woyam Cédron, ka da metsi ngaya. Mali ngaya a da ngwoda ka va a gèɗ.

³⁸ A Shimei a ngaɗa na bai: Ma ngaya amba. Ɓèl ngaya a da gi ara man bai a gaɗa na. A Shimei a nʼnza a Jérusalem kètè,

³⁹ a ngu mvi makar ba, a ɓèlèlihi Shimei cèw ta wuc ta a sam Akish, kra Maaca, bi Gath. A ndo ngiɗè a nʼngra na Shimei, a ngaɗa: Ɓèlèihi ngaya ta zhè te Gath.

⁴⁰ A Shimei a nslambaɗa, a mʼmana na skwi a deɓ kɗèh, a mdo a kokwar Gath, a sam Akish, a hèsh ɓèlèlihi nengaʼa. Te deɓaʼa Shimei a mshkè a deɓa a nda ɓèlèlihi na man a helka ta a deɓa te Gath.

⁴¹ A ta ngra na ma haha a Salomon: Shimei a njèkeda Jérusalem, a ndo Gath, a mshkè a deɓa.

⁴² A bai a nzlündo ndo, da bahka na Shimei, a ngaɗa na: Ka mbadayè a sam Ndo nzi pèc pècèk, a i fa ka ma a gèɗ: A pats man ka dè ngaya, ko ahngwa ahngwa, gau maya, ka da metsi ngaya. A ka gadayè: Ma ngaya amba, i tsenaʼa.

⁴³ Ka dzodzor ma mʼmbèɗ nga a sam Ndo nzi pèc pècèk, a ma man i fa ka a gèɗ, ɓi èhèmè?

⁴⁴ Te deɓaʼa a ngaɗa na Shimei: Ka ba ka sun te ndav ngaya, skwi ambaɓi tèlèba man ka ga na David, bab ga. Ndo nzi pèc pècèk a nʼngwoda ka shèwa ngaya a gèɗ.

⁴⁵ Aman Bi Salomon a sam nʼnzi bi David a ngècè mpshè ma a nʼnjèlè a ma ma a sam Ndo nzi pèc pècèk.

⁴⁶ A bai a ngaɗa na Benayahu, kra Jehoyada, a nengaʼa a mdo auda, a nkeɗaʼa. Aranta kokwar-bi a nʼngots wuɗai a sam Salomon.