I Rois 19 - Ma Zhiklè

A der za Horeb

¹ A Achab a njè na skwi man Elie a ngau tèlèba a Jézabel, ara man a bazl ta ndohi nhadka ma tèlèba a tsakwal.

² A Jézabel a nzlündo ndo sak a sam Elie, a mʼmenda na: Aman ka, Elie – i ba i Jézabel! Angoslèm a sam aranta, i da keɗe ka lèmèlèmè ara man ka ga ta tengaʼa; man ɓai zhiklè da gay skwi mèmè!

³ A Elie a gi zlau, a nslambaɗa, a dè na, aman a mbelda nshèffè na. A ndikè a Beer-Schéba te Juda, a njèkeda gol nengaʼa a pa.

⁴ Géɗ va na a ndo na hèshèkèɗ, a vak a civèɗ pats staɗ, te deɓaʼa a nʼnzahai a verzi wof tusntusaʼa, a nzhun na.

⁵ A gol Zhiklè a nlama na, a ngaɗa: Slambaɗa, ndau!

⁶ A nengaʼa a mpu dai, a nʼngots movar a sam nfi gèɗ nengaʼa, a gogula iyam. A nengaʼa a nʼndau, a msau, a mʼmanahi zaʼa.

⁷ A gol Ndo nzi pèc pècèk a mshkè macecèwaʼa, a nlama na, a ngaɗa: Slambaɗa, ndau, man ɓai ka da tiɗ ngaya, aman civèɗ dra.

⁸ A nengaʼa a nslambaɗa, a nʼndau, a msau, a nʼngots wuɗi a skwi nʼndai, a mdo a ma ma mʼmèn 40, a pats ba a vaɗ ba, ha a ndikè a sam za Horeb.

⁹ Te pa a mdo a vèvèɗ za ngiɗè, a nʼnza te pa a vaɗ. Na haha Ndo nzi pèc pècèk a ngaɗa na: Elie, ka gi a haha mè?

¹⁰ A nengaʼa a ngaɗa: I gu mizlinè a géɗ Ndo nzi pèc pècèk, Zhiklè bi wuɗai, a srak kumba. Ndohi Israel ta jèkeda nderzlè-ma ngaya. Ta mbeɗda sam mvi skwi a Zhiklè a hi tèlèba, a ta bazl ta ndohi nhadka ma a tsakwal. Njèkè staɗ, iyè genè. A ta woy a ta zeday nshèffè ga.

¹¹ A ngaɗa: Do auda, zlatsa a géɗ za a sam Ndo nzi pèc pècèk! Na haha Ndo nzi pèc pècèk a bizhè a samaʼa. Ndombozlor mbiaʼa mwuɗitpa a shkè a ma Ndo nzi pèc pècèk, a wurzleda zahai. Aman Ndo nzi pèc pècèk a te va ndombozlor ɓai. Ndombozlor klèng, herkeda a gudzai. Aman Ndo nzi pèc pècèk a te vaʼa ɓai.

¹² Te deɓ ngudzi herkeda, vogwa a shkè, aman Ndo nzi pèc pècèk a te va vogwa ɓai. Aman vogwa klèng, sam a nʼnza diɓèkaʼa, ara kozlar man a gi fèrferaʼa.

¹³ Aman Elie a ntsena aranta, a feda maslaka a di na, a ndo auda. A nzlatsa a ma vèvèɗ te za, a ntsena ngèɗè ngiɗè man a ngaɗa na: Elie ka gi a haha mè?

¹⁴ A nengaʼa a ngaɗa: I gu mizlinè a géɗ Ndo nzi pèc pècèk, Zhiklè bi wuɗai, a srak kumba. Ndohi Israel ta jèkeda nderzlè-ma ngaya. Ta mbeɗda sam mvi skwi a Zhiklè a hi tèlèba, a ta bazl ta ndohi nhadka ma a tsakwal. Njèkè staɗ, iyè genè. A ta woy a ta zeday nshèffè ga.

¹⁵ A Ndo nzi pèc pècèk a ngaɗa na: Do! Men ngaya a deɓa a civèɗ a ka beza a ndev hèshèkèd ndè Damas. Ko do a pa a ka bada na mbar a gèɗ a Hazaél, a ka feda a bi Syrie.

¹⁶ A ka bada na mbar a gèɗ a Jéhu, kra Nimshi, a ka feda a bi Israel. A ka bada na mbar a gèɗ a Elisée, kra Shaphan, te Abel-Mehola, a ka feda a ndo nhadka ma te di man a ngaya.

¹⁷ A da gi ar haha: Ndo man a da mbel ha te ri tsakwal Hazaél, Jéhu a da keɗaʼa; a ndo man a da mbel na te ri tsakwal Jéhu, Elisée a da keɗaʼa.

¹⁸ Aman i da jèkeda ndohi Israel 7.000, ta tèlèba man ta gurɓahi ɓai a sam Baal, a ta tsu ri a nengaʼa ɓai.

¹⁹ A Elie a ndo na, a ta zlü gèɗ a Elisée, kra Shaphath nengaʼa a pizhè. Zlèhi nengaʼa ntserzlaʼa cèw, cèw – 12. A nengaʼa a zhè a sam makulagéɗèacèwaʼa. A Elie a mbeza a sam na, a mco dawar na a va, a nkalda na a va.

²⁰ A nengaʼa a njèkeda zlèhi a pa, a ndzodzor Elie, a ngaɗa: Vay civèɗ a i dè a i ga ta mbali a bab ga a mam ga dai. Te deɓaʼa i da shkè, a i dè a verzi ngaya. A Elie a ngaɗa na: Do, a ka menkada deɓa. Skwi man i takaha ka a vna a zhi dè?

²¹ A Elisée a nʼngwoda va na, a mhul zlèhi ntserzlaʼa cèw, a nzlah ta. A nta zluèɗ a wof nkelawaʼa a daʼai zlèhai, a mpa ta ndohi a ta ndiaʼa. Te deɓaʼa a nslambaɗa, a ndo a ndzodzor Elie, a nhün mizlinè nengaʼa.