I Rois 18 - Ma Zhiklè

¹ Te deɓ nʼnzi a zhè, Ndo nzi pèc pècèk a ngaɗa na Elie, te mvi mamakaraʼa: Do a ka ngra na va ngaya a Achab. I woy a i zlindè iyam a hi a herkeda.

² A Elie a mdo aman a ngra na va nengaʼa a Achab. Mi mbiaʼa a ngu te kokwar Samarie.

³ A Achab a mbaha na Abdias, bigol na. Abdias a woy Ndo nzi pèc pècèk kumba.

⁴ Aman Jézabel a mbazl ta ndohi nhadka ma Ndo nzi pèc pècèk, Abdias a mhul ndohi nhadka ma 100, a nʼnghede ta, 50 te slrats za ngiɗè, 50 te slrats za ngiɗè, a mva ta movar a iyam.

⁵ Achab a ngaɗa na Abdias: Do a sam kokwar tèlèba, a sam thal iyam, a sam woyam tèlèba. Wa ngiɗè ba nga ngècè mandi kètè, a plèshi nga a kdèhi nga ta ndiaʼa. Man ɓai sèi nga da zlah ta ma.

⁶ Te deɓaʼa ta vena va a kokwar tèlèba. Achab a géɗ na a mdo a civèɗ ngiɗè, Abdias a géɗ na a mdo a civèɗ ngiɗè.

Abdias a Elie ta zli gèɗ

⁷ Aman Abdias a zhè a civèɗ, Elie a shkè a ta zlü gèɗ. Abdias a suna, a nkalahi a deɓ sak nengaʼa, a ngaɗa: Ka Elie, bi ga, dè?

⁸ A nengaʼa a ngaɗa na: I nengaʼa. Do a ka gada na bi ngaya: Elie a zhè!

⁹ A nengaʼa a ngaɗa! I ge mali mè, man ka viyè a ri a Achab, aman a kedyè?

¹⁰ Ara man Ndo nzi pèc pècèk, Zhiklè ngaya, a zhè, a sam tèlèba tʼherkeda, a kokwar-bi tèlèba, bi ga a nzlündo ndo a pa, aman ta has ka. Aman ta gada na: Az a haha ɓai! A ndzhoɗo kokwar-bi a ndohi herkeda tèlèba. Aman ta mbada na tèlèba ara man ta ngatsa ɓai.

¹¹ Antanta ka gaɗa: Do a ka gada na bi ngaya: Elie a zhè!

¹² Aman antanta i dè ga, a Mèzhèɓ Ndo nzi pèc pècèk a ce ka auda a haha, i sun sam man ka a pa ɓai, a i dè a sam Achab a i ngra na, a nengaʼa a da ngats ka ɓai, a da kedyè. Iyè, ɓèl ngaya, i slubordo Zhiklè te kra.

¹³ Ta ngra ka ɓi dè, skwi man i gau, aman Jézabel a mbazl ta ndohi nhadka ma Ndo nzi pèc pècèk, a i ngheda te va ndohi nhadka ma nengaʼa 100, 50 te slrats za ngiɗè, 50 te slrats za ngiɗè, a i va ta movar a iyam te pa?

¹⁴ Antanta ka gada: Do a ka gada na bi ngaya: Elie a zhè! Nengaʼa a da kedyè!

¹⁵ Elie a ngaɗa: Ara man Ndo nzi pèc pècèk, Zhiklè bi wuɗai a zhè, man i gi mizlinè nengaʼa, a pats patsna i da ngra na va ga a Achab.

¹⁶ A Abdias a mdo aman ta zli gèɗ a Achab, a nʼngra na maʼa, a Achab a mdo aman ta zli gèɗ a Elie.

A géɗ za Carmel

¹⁷ Aman Achab a rka Elie, a mbaha na: Ka shkè dè, ndo ngedèsh kokwar Israel!

¹⁸ A nengaʼa a ngaɗa: I gedassa kokwar Israel ɓai; aman kinè a ndohi ngaya, a géɗ man kin jèkeda ma nkwèr Ndo nzi pèc pècèk, a kin dzodzor Baalhai.

¹⁹ Anai zlündo ndo, a ka ɓicka ta ndohi Israel tèlèba a sam ga a géɗ za Carmel, a nda ndohi nhadka ma Baal 450, a nda ndohi nhadka ma Astarté 400, man ta ndi skwi te gi Jézabel tèlèba.

²⁰ A Achab a nzlündo ndo a sam ndohi Israel tèlèba, a mbaha ta ndohi nhadka ma a géɗ za Carmel.

²¹ A Elie a mshke a sam ndohai, a ngaɗa: Kin pi gèɗ cèw cèw ta ahngwa? Aman Ndo nzi pèc pècèk Bi Zhiklè, vo-dzodzor nengaʼa! Aman Baal Bi Zhiklè, vo-dzodzor nengaʼa! Aman ndohi ta mbeɗa na a ma ɓai, ko staɗ.

²² A Elie a ngaɗa ta ndohai: Te va ndohi nhadka ma Baal, ta 450. Te va ndohi nhadka ma Ndo nzi pèc pècèk tèlèba, njèkè iyè staɗgenè.

²³ Va-hulko nga marihi cèw. Ndohi nhadka ma Baal ta cè marai te va staɗ, a ta zlèhaʼa, a ta peda a géɗ shègwa, aman ta fi vogwa a pa azɓai. Iyè, i cè mari ngiɗè, a i peda a géɗ shègwa, aman i fi vogwa a pa azɓi genè.

²⁴ Te deɓaʼa kin tsi ri a nzlembaɗ Zhiklè kinè. A iyè, i tsi ri a nzlembaɗ Ndo nzi pèc pècèk. Nengaʼa man a da mbeɗka nga a ma, a zlindkoɗi vogwa, nengaʼa Zhiklè. A ndohi tèlèba ta gada: Amba!

²⁵ A Elie a ngaɗa ta ndohi nhadka ma Baal: Va-woy mari te vaʼa, va-tilaʼa nshèlèkuraʼa – kinè ndohi man kinè a vata. Va-tsu ri a nzlembaɗ zhiklè kinè, aman kin fu vogwa a pa ɓai!

²⁶ A ta co marai, a ta tilaʼa, a ta tsu ri a nzlembaɗ Baal, daga prèk, ha ndè a géɗ pats, a ta boho: Baal, mbeɗka nga a ma! – Aman tètèʼa, a mʼmbeɗka ta a ma ɓai. A ta gècè a ta tèuda sam mvi skwi man ta gau a pa.

²⁷ A géɗ pats ma, Elie a ngwossaha ta, a ngaɗa: Vo-boho a vata! Nengaʼa zhiklè ka ɓi dè: gar a hér gèɗ ngiɗè tsaɗ – gar na te ngwi ɓai – gar kala nshèwèlè – gar a nzhuna, a da pidèkwe na.

²⁸ A ta boho a vata, a ta bazla va ta a gwèsh a tsakwal, ara mʼmbèh skwi ta, ha Pombaz a hakaɗauda.

²⁹ A géɗ pats nkalda ma, a ndzakaɓama ta gèɗ, ha dakwaɗ, tiɗè sam mvi skwi a Zhiklè. Aman cèɓèk cèɓèk, a ntsena ma ta ɓai, a mʼmbeɗa ta a ma ɓai.

³⁰ Te deɓaʼa Elie a mbaha ta ndohi tèlèba: Vo-washkè a sam ga! Ndohi tèlèba ta herda na va. A nɗizlda sam mvi skwi a Ndo nzi pèc pècèk a pa zaʼa, man ndohi ta mbeɗdahi pats ngiɗè.

³¹ Elie a nhul kwa 12, a ngro ara verzi ndohi Jacob, man Ndo nzi pèc pècèk a mva na nzlembaɗ na Israel.

³² A ndizla kwa a ngi a sam mvi skwi a Zhiklè a nzlembaɗ Ndo nzi pèc pècèk, a ntèuda sam mvi skwi a Zhiklè a vèvèɗ, samaʼa aman ta zleki dau guv guv ri cèw.

³³ A nlèɓèslè shègwa, a nzlaha marai, a mpeda a géɗ shègwa,

³⁴ a ngaɗa: Vo-ɓolko iyam duzlak fad, va-ncha na a géɗ zluèɗ marai, a géɗ shègwa cèw ba! A ta gu arsa. A ngaɗa: Vo-do a va zaʼa! A ta gu a va zaʼa. A ngaɗa: Va-gaka na va zaʼa! A ta gu mamakaraʼa.

³⁵ A iyam a hi tʼhwaɗ sam mvi skwi a Zhiklè, ko vèvèɗ nraʼa nʼndha a iyam.

³⁶ Tidè samaʼa man ta vi skwi a Zhiklè, Elie ndo nhadka ma Zhiklè, a nherdeka va, a ntsu rai: Ndo nzi pèc pècèk, Zhiklè Abraham, Isaac a Israel, ngreda ta a patsna, aman ka Zhiklè Israel, a iyè i ɓèl ngaya, a i gi skwi haha tèlèba ara man ka gadayè.

³⁷ Mbeɗkay a ma, Ndo nzi pèc pècèk, mbeɗkay a ma! Aman ndohi haha ta da suna, ka Ndo nzi pèc pècèk, ka Bi Zhiklè, a ka ngwoda ta ndav!

³⁸ A vogwa Ndo nzi pèc pècèk a nkalkaɗahai, a nʼndau zluèɗ marai, a shègwa, a kwa, a hutsoɗ a nsha iyam te vèvèɗ, tèlèba,

³⁹ Aman ndohi ta rkaʼa, ta gurɓahai a ta gaɗa: Ndo nzi pèc pècèk, nengaʼa Bi Zhiklè, Ndo nzi pèc pècèk, nengaʼa Bi Zhiklè!

⁴⁰ Elie a ngaɗa ta: Va-par ta ndohi nhadka ma Baal tèlèba, ko staɗ da mbel na ɓai! A ta par ta. A Elie a nde ta a ma woyam Kison, a mbazl ta a pa.

⁴¹ A Elie a ngaɗa na Achab: Do, ndau, sau, iyam a kuɗkaɗi ma, a woya a nshkè.

⁴² Aman Achab a mdo, aman a ndi a si skwai, Elie a mdo a géɗ za Carmel, a ngurʼbahai a herkeda, a nfeda gèɗ a husloɓ na.

⁴³ Te deɓaʼa a mbaha na gol nengaʼa: Do, da ngul dai te civèɗ woyam mbiaʼa! A nengaʼa a mdo, a nʼngul dai, a ngaɗa: Skwa a te pa ɓai! A nengaʼa a ngaɗa: Do a deɓa zaʼa! A gol nengaʼa a mdo a deɓa sak tsaraɗ.

⁴⁴ Aman a mdo sak matsaraɗaʼa, a ngaɗa: Na haha, vani kèpkata nara ri ndo a nslambaɗa a géɗ woyam mbiaʼa! A Elie a ngaɗa na: Do a sam Achab a ka ngra na: Feda kiki a gerzi plèsh, hu ngaya, man ɓai iyam a da ngats ka!

⁴⁵ Tsam-tsam vanihi liverliveraʼa ta zhè, a ndombozlor, a iyam mbiaʼa a nshkè. A Achab a mdo a kikai, a ndè Jizreel.

⁴⁶ A ri Ndo nzi pèc pècèk a zhè a gèɗ Elie. A nengaʼa a ndzawa va na, a mhu a ma Achab, ha a ndikè a Jizréel.