I Rois 17 - Ma Zhiklè

Elie a Achab

¹ A Elie, ndo Thishbé, te Galaad, a ngaɗa na Achab: Ara man Ndo nzi pèc pècèk, Zhiklè Israel, a zhè, man i gi mizlinè nengaʼa, a mvi a mvai a haha, iyam a shkè azɓai, minmèn a gshè géɗ sam azɓai, sèi man i da goɗa.

² Te deɓaʼa Ndo nzi pèc pècèk a nzlündo ma nengaʼa, a ngaɗa:

³ Do a ka beza a civèɗ mvèng pats, a ka nghede va ngaya a ma woyam Kerith, tʼwud woyam Jourdain.

⁴ A ka su iyam te woyam. A i gada ta ngalawihai a ta da ka skwi nʼndai a pa.

⁵ A nengaʼa a mdo, a ngu ara man Ndo nzi pèc pècèk a gada na, a nʼnza a ma woyam Kerith, tʼwud woyam Jourdain, te civèɗ mvèng pats.

⁶ A ngalawihai ta hulko na movar a zluèɗ a prèk, a movar a zluèɗ a dakwaɗ. Iyam a msu te woyam.

⁷ A pats ngiɗè, woyam a ngwor na, te kokwar tèlèba. Iyam a shkè te zhiklè asaɓai.

Ngwoz mazai te Sarepta

⁸ A Ndo nzi pèc pècèk a ngaɗa na Elie:

⁹ Slambaɗa a ko do a kokwar Sarepta, a tsagi kokwar Sidon, a ka nza a pa. Te pa i gada na ngwoz mazai ngiɗè aman a va ka skwi nʼndai.

¹⁰ A Elie a nslambaɗa, a mdo Sarepta. Aman a mshkè a ntamagi kokwar, a nrka ngwoz mazai man a pèr shègwa. A Elie a mbaha na, a ngaɗa na: Ɓalkay iyam a kokwi kètè dai, a i siaʼa.

¹¹ Aman a mdo a nda ɓala na iyam, a baha na te deɓaʼa: Ckoy ɗaf a vaʼa kètè ba!

¹² A nengaʼa a ngaɗa. Ndo nzi pèc pècèk, Zhiklè ngaya, a suna, a vava ɗaf azbai, sèi njèkè gufa zlukri staɗgenè te shiɗèf, mbar ndèok kata te gatsak. Ani haha i pèr shègwa kètè, aman i dè ngwai, a i da ti skwi nʼndi nga a kra ga; aman nga da nda ma, nga da tiɗè mènè.

¹³ Aman Elie a ngaɗa na: Ka gu zlau ɓai! Do ngwai a ka gu ara man ka goɗo. Aman sèi ka gay skwi nʼndi kètè nshèlèkuraʼa, a ka ckoɗa a sam ga, ga kin gi skwi nʼndi kinè a kra ngaya te deɓaʼa.

¹⁴ Aman Ndo nzi pèc pècèk, Zhiklè Israel, a goɗ ar haha: Gufa a da ndiv auda te shiɗèf asaɓai, mbar a da ndiv auda te gatsak asaɓai, ha pats man Ndo nzi pèc pècèk a da zlindè iyam a herkeda.

¹⁵ A ngwoz a mdo a ngu ara man Elie a gaɗa na. A ta ndau mʼmèn a zhè, ngwoz a nengaʼa a ndohi gi na.

¹⁶ A gufa a nʼndev auda te shiɗèf ɓai, a mbar a nʼndev auda te gatsak ɓai, ara man Ndo nzi pèc pècèk a goɗ te ma Elie.

Elie a mbel kra ngwoz mazai

¹⁷ Te deɓ nengaʼa, kra ngwoz man Elie a nza a pa, mbelakaɓai, a nhertaʼa holholaʼa, njèkè te ndav te ndav.

¹⁸ Te deɓaʼa a ngaɗa na Elie: Nga gakaɗa ka mè, ndo Zhiklè? Ka shkè aman Zhiklè a hér mali ga a nkeɗay kra ga.

¹⁹ Elie a ngaɗa na: Vay kra ngaya! A mco te ri nengaʼa, a nzuɓda a gi nengaʼa te géɗèʼa, a mʼmandahi a sam mʼmènè na.

²⁰ Te deɓaʼa a ntsu ri a Ndo nzi pèc pècèk, a ngaɗa: Ndo nzi pèc pècèk, Zhiklè ga. A vava ka woy a ka ga na skwi mwuɗitpa a ngwoz mazai man i mbrok nengaʼa, a ka gi a kra nengaʼa a metsi na ɗè?

²¹ A ntuzloma na gèɗ a kra, sak makar, a ntsu ri a Ndo nzi pèc pècèk, a ngaɗa: Ndo nzi pèc pècèk, Zhiklè ga, voko na nshèffè a deɓa a kra haha!

²² A Ndo nzi pèc pècèk a ntsena ntsi ri Elie, a nshèffè kra a mʼmenkaɗ na a pa, a nʼnza a nshèffè.

²³ A Elie a mco kra, a nzuɓkoɗahi te gi te géɗèʼa, a gi a godok, a mva na mam na. A Elie a ngaɗa: Na haha, kra ngaya a zhè a nshèffè.

²⁴ A ngwoz a ngaɗa na Elie: Antanta i suna, ka ndo Zhiklè, a ma Ndo nzi pèc pècèk te ma ngaya, ma nzuraʼa.