I Rois 16 - Ma Zhiklè

¹ A Ndo nzi pèc pècèk a ngaɗa na Jéhu, kra Hanani, a géɗ Baescha:

² Ko i cka ka auda te mèrwèc, a i fe ka a bi a géɗ Israel, ndohi ga, ka dzodzor civèɗ Jéroboam, a ka pe ta ndohi Israel a wai a ta gi mali a sam ga, a ta pokoy gèɗ ndav auda.

³ Na haha, i woy a i patseda ndohi gi Baescha aussa a mèdèp, a i ga ta ndohi gi ngaya lèmèlèmè ara man i ga ta ndohi gi Jéroboam, kra Nebath.

⁴ Ko wawa te ndev ndohi Baescha man a da metsi na te kokwar, kdadihi ta da ndiaʼa. Ko wawa man a da metsi na a dal kokwar, ɗiakihi tʼhwaɗ giɗfèk ta da ndiaʼa.

⁵ Ma mizlinè Baescha ngiɗè, a géɗ skwi man a gau, a géɗ maya na, ta windeda ɗèlèwèr ma bihi Israel.

⁶ A Baescha a mʼmets na a va babhi na, a ta raʼa te Thirtsa. A kra nengaʼa a ngu bi te di man a nengaʼa.

⁷ A Ndo nzi pèc pècèk a ngaɗa na Baescha a ndohi gi na, te ma Jéhu, ndo nhadka ma, kra Hanani, a géɗ skwi man ambaɓi tèléba man a gu a sam Ndo nzi pèc pècèk, a géɗ skwi man ri nengaʼa a ngau, aman a poko na gèɗ ndav auda a vna, lèmèlèmè ara ndohi gi Jéroboam ta gau, a Ndo nzi pèc pècèk a ngedas ta aussa.

Ela, bi Israel

⁸ Aman Asa, bi Juda, a ngau bi te mvi 26, ta feda Ela, kra Baescha, a bi a géɗ Israel, te Thirtsa. A ngu bi mvi 2.

⁹ Zimri, bigol nengaʼa, bi a géɗ ndohi kiki var rètaʼa, a hüno mvhè ma a géɗ nengaʼa, a pats man Ela a zhè te Thirtsa, a nsau zom te gi Artsa, ndo mɓer gi bai te Thirtsa.

¹⁰ A Zimri a ndo a gai, a nkeɗaʼa, a ngu bi te di man a nengaʼa.

¹¹ Aman a ngu bai, a nʼnza a géɗ sam nʼnzi bai, tsam-tsam a mbazl ta ndohi gi Baescha, ngurhi ngurhi tèlèba, a gwoli ta, a mandalahi ta, ko staɗ njèka ɓai.

¹² Aranta Zimri a ngedas ta ndohi gi Baescha tèlèba, ara man Ndo nzi pèc pècèk a gaɗa na Baescha, te ma Jéhu, ndo nhadka ma,

¹³ a géɗ mali Baescha, a Ela, kra nengaʼa, tèlèba man ta gau, a ta pe ta ndohi Israel a wi a vna, a ta poko na gèɗ ndav auda a Ndo nzi pèc pècèk, Zhiklè Israel, a skwi mʼmbèh skwi tengaʼa ambalai.

¹⁴ Ma mizlinè Ela ngiɗè, skwi tèlèba man a gau, ta windeda ɗèlèwèr ma bihi Israel.

¹⁵ Aman Asa, bi Juda, a ngu bi mvi 27, Zimri a ngu bi te Thirtsa mʼmèn 7. A ndohi var ta ɓica va a ma Gibbethon, kokwar ndohi Philistie.

¹⁶ A ndohi var man ta ɓicko va, ta tsenaʼa ara man ta gèɗèʼa: Zimri a hüno mvhè ma a gèɗ bai, a nkeɗaʼa. A Israel tèlèba a mfeda Omri, bi sojè, a bai a géɗ Israel tèlèba, a pats nasa, a sam ndohi var mɓicaʼa.

¹⁷ A Omri, a ndohi Israel tèlèba a verzi nengaʼa, a njè-keda Gibbethon, a nʼnza na ma a Thirtsa.

¹⁸ Aman Zimri a rka, ta duma kokwar ma, a mdo a gi ngurèa te gi bai, a nfa na vogwa a gai a ri na, a mʼmets na,

¹⁹ a géɗ mali man a gau, aman a nga skwi man ambaha Ndo nzi pèc pècèk ɓai, a ndzodzor civèɗ Jéroboam, man a pe ta ndohi Israel a wi a vna.

²⁰ Ma mizlinè Zimri ngiɗè, a géɗ mvhè ma nengaʼa, ta windeda ɗèlèwèr ma bihi Israel.

²¹ Te deɓaʼa ndohi Israel ta ngela a va cèw: rèta ndohi ngiɗè to do a verzi Tibni, kra Guinath, a ta woya a ta fi a bai. Rèta ndohi ngiɗè to do a verzi Omri.

²² Ndohi man ta dzodzor Omri ta kumba, a fena tengaʼa man ta dzodzor Tibni, kra Guinath. A Tibni a mʼmets na, a Omri a ngu bai.

Omri, bi Israel

²³ Aman Asa a ngu bi te Juda, te mvi 31, ta feda Omri a bi a géɗ Israel. A ngu bi mvi 12. A ngu bi te Thirtsa mvi 6.

²⁴ Te deɓaʼa a nsum za te Samarie, te Schémer, a Suli gozhèm cèw, a nrom gi te pa, a mbaha na kokwar man a roma sa, kokwar Samarie, ara Shémer, ndo man za a nengaʼa nshèlèkuraʼa.

²⁵ A Omri a nʼnga skwi man ambaha Ndo nzi pèc pècèk ɓai, a ngu mali a fena ngiɗè tèlèba man ta gu pats ngiɗè.

²⁶ Te skwi tèlèba a ndzodzor Jéroboam, kra Nebath, a ngu mali lèmèlèmè ara nengaʼa, a mpe ta ndohi Israel a wi a vna, a skwi mʼmbèh skwi tengaʼa ambalai a mpoko na gèɗ ndav auda a Ndo nzi pèc pècèk, Zhiklè Israel.

²⁷ Ma mizlinè Omri ngiɗè, a géɗ skwi tèlèba man a gau, a géɗ maya na, man a ngreda auda, ta windeda ɗèlèwèr ma bihi Israel.

²⁸ A Omri a mʼmets na a va babhi na, a ta raʼa te Samarie. A Achab, kra nengaʼa a ngu bi te di man a nengaʼa.

Achab, bi Israel

²⁹ Achab, kra Omri, a ngu bi a géɗ Israel, man Asa, bi Juda, a ngu bi te mvi 38. A Achab, kra Omri, a ngu bi a géɗ Israel, te Samarie, mvi 22.

³⁰ Achab, kra Omri, a nʼnga skwi man ambaha Ndo nzi pèc pècèk ɓai, a fena tengahia ngiɗè man ta gu pats ngiɗè.

³¹ A ga mali Jéroboam, kra Nebath, genè ka ɓai, aman a ngu mali a vaʼa: a nco Jézabel, dem Ethbaal, bi ndohi Sidon, a ngwoz. A ndzodzor Baal, a ntsu ri a nengaʼa.

³² A nrom sam mvi skwi a Baal, te gi Baal, man a rom te Samarie.

³³ Achab a ngau Astarté a vaʼa, a ngau skwi ngiɗè tsaɗ tsaɗ, a mpoko na gèɗ ndav auda a Ndo nzi pèc pècèk, Zhiklè Israel, holholaʼa, a fena bihi Israel man ta gu pats ngiɗè tèlèba.

³⁴ Te ndev man Hiel te Bethel a zhè, a nɗaɗayda kokwar Jéricho a mpau verzi gai, Abiram, tsuvom nengaʼa a mʼmets na. Aman a vi ntatak ntamagai, Segub, ntabawaʼa a mʼmets na, ara man Ndo nzi pèc pècèk a gada na Josué, kra Nun.