I Rois 15 - Ma Zhiklè

Abiam a Asa, bihi Juda

¹ Aman Jéroboam, kra Nebath, a ngu bi te mvi 18, ta feda Abiam a bi te Juda.

² Nengaʼa a ngu bi te Jérusalem, mvi makar. Nzlembaɗ mam na, Maaka, dem Absalom.

³ A nengaʼa a ndzodzor mali bab na man a nyokoɗi tèlèba. Ndav nengaʼa a ngsa va a Ndo nzi pèc pècèk, Zhiklè nengaʼa, tèlè bai, az ara David, babab na ɓai.

⁴ Aman a géɗ David, Ndo nzi pèc pècèk, Zhiklè nengaʼa, a mfu kra nengaʼa a bai te deb nengaʼa, a mva na skwi nhél sam te Jérusalem, a Jérusalem a nzi dai,

⁵ te man David a ngau skwi man ambaha Ndo nzi pèc pècèk, te nshèffè nengaʼa tèlèba ndzara ma bai, a mfu gèɗ a ma nengaʼa tèlèba, sèi a sam Urie, ndo Heth, man a ngu malai.

⁶ A Roboam a Jéroboam ta gu var pèc pècèk, a pats nshèffè ta tèlèba.

⁷ Ma mizlinè Abiam ngiɗè, a géɗ skwi tèlèba man a gau, ta windeda ɗèlèwèr ma bihi Juda. Abiam a Jéroboam ta gu var.

⁸ A Abiam a mʼmets na a va babhi na, a ta raʼa te kokwar David. A Asa, kra nengaʼa, a ngu bi te di man a nengaʼa.

⁹ Aman Jéroboam, bi Israel, a ngu bi te mvi 20, ta feda Asa a bi te Juda.

¹⁰ A nengaʼa a ngu bi te Jérusalem, mvi 41. Nzlembaɗ mam na, Maaka, dem Absalom.

¹¹ Asa a ngau skwi man ambaha Ndo nzi pèc pècèk, lèmèlèmè ara David, bab na.

¹² A ndzam ta ndohi mali Sodome auda te kokwar, a nwusheda zhiklèhi mʼmbèh skwi ambaɓihiaʼa man bababhi nengaʼa ta gau, tèlèba aussa.

¹³ Ko mam na, a ncèma na nzlembaɗ ngul ngwozi auda a va, te man a mpoko skwi mʼmbèh skwai a Astarté. Asa a nʼngelda skwi hori sa a hai, a nfa na vogwa a ma woyam Cédron.

¹⁴ Aman sam mʼmbèh skwi a géɗ za, a ngedas ta ɓai, ko ndav Asa a ngso va a Ndo nzi pèc pècèk a pats nshèffè nengaʼa tèlèba.

¹⁵ Skwi man bab nengaʼa a mva na Zhiklè, a skwi man nengaʼa a mva na Zhiklè, guro a kolongwi tsaɗ tsaɗ, a nhulkoɗa a gi Zhiklè.

Asa a Ben-Hadad ta derzla ma ta

¹⁶ Nda Asa a Baescha, bi Israel, ta gu var pèc pècèk.

¹⁷ Baescha, bi Israel, a ndo a nza na a ma Juda, a nʼngalda Rama a pa a zlazlar, a ndo ngiɗè a slaha a nshkè auda te pa, a dè a sam Asa, bi Juda, asaɓai.

¹⁸ A Asa a mhul njèkèɗi verzhègenè a guro tèlèba te gi mèshèlè Zhiklè, te gi bi ba, a mpa ta a ri a ɓèlèlihi nengaʼa, a nzlündo a sam Ben-Hadad, kra Thabrimmon, kra Hezjon, bi Syrie, man a nza te Damas, a ngaɗa na:

¹⁹ Nderzlè-ma te ndev nga a ka, te ndev bab ga a bab ngaya a zhè. Na haha i zlinda ka skwi mbalai, verzhègenè a guro. Do, pra nderzlè-ma ngaya a Baescha, bi Israel, aman a dè na auda a tsagi ga.

²⁰ A Ben-Hadad a nco ma bi Asa, a nzlinde ta bihi sojè nengaʼa a kokwarhi Israel. A nduma Iyon, Dan, Abel-Beth-Maaka, Kinneroth, tèlèba, a herkeda Nephthali teleba.

²¹ Aman Baescha a ntsenaʼa, a njèkeda nrèm gi te Rama, a mʼmen na a deɓa a kokwar Thirtsa.

²² A Asa a mbaha ta ndohi Juda gedam tèlèba. A ta hulkoɗi kwa a wof te Rama, man Baescha a rom gi a vna, a bi Asa a nrom gi a vaʼa te Guéba Benjamin, a Mitspa, a vna.

²³ Ma mizlinè Asa ngiɗè tèlèba, a géɗ maya na, a géɗ skwi tèlèba man a gau, a géɗ kokwar man a roma, ta windeda ɗèlèwèr ma bihi Juda. Aman nhala ma, a shèdè asaɓai, sak a dza na.

²⁴ Te deɓaʼa Asa a mʼmets na a va babhi na, a ta raʼa a kokwar David, bab na. A Josaphat, kra nengaʼa, a ngu bi te di man a nengaʼa.

Nadab, bi Israel

²⁵ Nadab, kra Jéroboam, a ngu bi te Israel, man Asa, bi te Juda, mvi macecèwaʼa ma. A ngau bai a géɗ Israel, mvi cèw.

²⁶ A nʼnga skwi man ambaha Ndo nzi pèc pècèk ɓai. A ndzodzor civèɗ bab na, a mali bab na, man a pe ta ndohi Israel a wi a vna.

²⁷ Baescha, kra Achija, te verzi Issacar, a hüno aman ta vhè ma a géɗ a bai. A Baescha a nkeɗaʼa te Gibbethon, kokwar Philistie, te va man Nadab a ndohi Israel tèlèba ta nza na ma a Gibbethon.

²⁸ Baescha a nkeɗaʼa, aman Asa, bi Juda, a ngu bi te mvi mamakaraʼa. A Baescha a ngu bi te di man a Nadab.

²⁹ Aman a gi bi ma, a bazl ta ndohi gi Jéroboam tèlèba, a njèka ndo te verzi Jéroboam a nshèffè ɓai, ara man Ndo nzi pèc pècèk a goɗ te ma Achija, ɓèl nengaʼa, te Silo,

³⁰ a géɗ mali Jéroboam, a mali man a pe ta ndohi Israel a wi a vna, a mpoko na gèɗ ndav auda a Ndo nzi pèc pècèk, Zhiklè Israel, a vna.

³¹ Ma mizlinè Nadab ngiɗè, a géɗ skwi tèlèba man a gau, ta windeda ɗèlèwèr ma bihi Israel.

³² Nda Asa a Baescha, bi Israel, ta gu var a va pèc pècèk.

Baescha, bi Israel

³³ Aman Asa, bi Juda, a ngu bi te mvi mamakaraʼa, ta feda Baescha, kra Achija, a bi a géɗ Israel tèlèba, te Thirtsa. A ngu bi mvi 24.

³⁴ A nengaʼa a nʼnga skwi man ambaha Ndo nzi pèc pècèk ɓai. A ndzodzor civèɗ Jéroboam, a ngu mali lèmèlèmè ara Jéroboam, man a pe ta ndohi Israel a wi a vna.