I Rois 14 - Ma Zhiklè

Ma kita a géɗ Jéroboam

¹ Te ndev nasa, matakwan a ngso Abia, kra Jéroboam.

² A Jéroboam a ngaɗa na ngwoz na: Slambaɗa, humbaɗda maslaka ngaya, a ta sen ka a ta gada ka ngwoz Jéroboam ɓai, a ko do Silo. Achija, ndo nhadka ma Zhiklè a zhè te pa, nengaʼa man a nhodko ma a géɗ ga, a gaɗa, da da gu bi a géɗ ndohi haha.

³ Helda dari movar a ri kula, a matawi a gogula vongwom, a ko do a sam nengaʼa. Nengaʼa a da ngra ka a géɗ kra, kra a da gi nkekekè.

⁴ A ngwoz Jéroboam a ngu arsa. A nslambaɗa, a ndo Silo, a ndo a gi Achija. Achija a rka di ɓai, babgai.

⁵ Ndo nzi pèc pècèk a ngaɗa na: Na haha, a di ngwoz Jéroboam a shkè a sam ngaya, a da dzhaɗ ka a géɗ kra nengaʼa man mbelakaɓai. Ka da ngreda na kata kata. Aman a da shkè a gai, a maslaka nengaʼa ngiɗè tsaɗ, a nʼngwoda va na a ngwoz ngiɗè.

⁶ Tsam-tsam Achija a ntsena sam sak nengaʼa a ntamagai, a ngaɗa: Washkè a gai, ngwoz Jéroboam, ka ngwoda va ngaya a ngwoz ngiɗè èhèmè? Iyè i ngots ma mwuɗitpa man i da menda ka.

⁷ Do a ka gada na Jéroboam: Ndo nzi pèc pècèk, Zhiklè Israel, a goɗ ar haha: I slambaɗda ka gèɗ te ndev ndohai, a i fe ka a bi a géɗ Israel, ndohi ga,

⁸ i ngezlama na bi auda te ri bi David, a i vaka ka. Aman ka nzuraʼa ara David, ɓèl ga, ka ɓai, man a fu gèɗ a ma nkwèr ga tèlèba, a dzadzarkayè a ndav tèlèba, man a ngu sèi skwi man ambahayè.

⁹ Ka gu skwi ambaɓiaʼa kumba, a fena ndohi mpats ngiɗè tèlèba. Ka gu zhiklèhi ngaya, a ka vüɗo skwi mʼmbèh skwai, a ka pokoy gèɗ ndav auda a vna, a ka ngwoday deɓa.

¹⁰ A géɗ nengaʼa i kalde ta ndohi gi Jéroboam a matakwan, a i gedasseda ndohi te verzi Jéroboam aussa, ko ngurhai, ko wud ngurhai, ko ɓèlè, ko kra ngwai, te Israel tèlèba. I da patsedaussa ara man ta pècè koskosai, ha a nʼndev na tèlèba.

¹¹ Ko wawa te ndev ndohi Jéroboam man a mets na te kokwar, kdadihai ta da ndiaʼa. Ko wawa man a da metsi na a dal kokwar, ɗiakihai tʼhwaɗ giɗfèk ta da ndiaʼa ara man Ndo nzi pèc pècèk a nhodko ma.

¹² Ka, slambaɗa a ko do ngwai. A nʼndikè ngaya a kokwar, kra ngaya a metsi na.

¹³ Ndohi Israel tèlèba ta da kuɗiaʼa, a ta rda a vèvèɗ. Sei nengaʼa staɗgenè te verzi ndohi Jéroboam tèlèba man ta da ri a vèvèɗ, a géɗ man skwi man ambaha Ndo nzi pèc pècèk, Zhiklè Israel, te gi ndohi Jéroboam, sèi te kra sa staɗgenè.

¹⁴ A Ndo nzi pèc pècèk a da ngècè bi a géɗ Israel man a da zede ta ndohi gi Jéroboam. Na haha tiɗè sama ma!

¹⁵ Te deɓaʼa Ndo nzi pèc pècèk a da tsi Israel, a giɗèʼa ara pandar te iyam, a da ksar ta ndohi Israel aussa te kokwar mbelaʼa haha, man a va ta babhi tengaʼa. A da venda ta gèɗ a wud woyam, a géɗ man ta gau skwi mʼmbèh skwai, a ta poko na gèɗ ndav auda a Ndo nzi pèc pècèk a vna.

¹⁶ A da jèkeda Israel, a géɗ mali Jéroboam, a géɗ mali man a mpe ta ndohi Israel a wi a vna.

¹⁷ A ngwoz Jé-roboam a nslambaɗa, a ndo na, a ndo ngwai a Thirtsa. Aman a ndikè a ntamagai, kra a mʼmets na.

¹⁸ A ta raʼa, a ndohi Israel tèlèba ta kuɗiaʼa, ara man Ndo nzi pèc pècèk a goɗ te ma Achija, ndo nhadka ma.

¹⁹ Ma mizlinè Jéroboam ngiɗè tèlèba, ara man a ngu var, ara man a ngu bai, ta windeda ɗèlèwèr ma bihi Israel.

²⁰ Jéroboam a ngau bi mvi 22. Te deɓaʼa a mʼmets na a va babhi na, a Nadab, kra nengaʼa, a ngu bi te di man a nengaʼa.

Mphömè te Juda

²¹ Roboam, kra Salomon, a ngu bi te Juda. Mvi Roboam 41, aman ta feda a bai. A ngu bi te Jérusalem, te kokwar man Ndo nzi pèc pècèk a ngotskoɗauda te va kokwar Israel tèlèba, aman nzlembaɗ nengaʼa a da nzi a pa, mvi 17. Nzlembaɗ mam na Naama, dem Ammon.

²² A Juda a nʼnga skwi man ambaha Ndo nzi pèc pècèk ɓai. A mali tengaʼa man ta gau, a fena man a babhi tengaʼa, a ta poko na gèɗ ndav auda.

²³ Juda ba a ngau sam mʼmbèh skwai a géɗ za. A ta Zlatseda kwa, Astarté, a géɗ za staɗ staɗ tèlèba, te verzi wof tèlèba man vah a wushè azɓai.

²⁴ Ko ndohi mali Sodome ta zhè te kokwar. Ndohi Juda ta dzodzor skwi man a ndèr a ndo, a sam ndohi man Ndo nzi pèc pècèk a ndzam ta auda a ma ndohi Israel.

Metsar te gi Zhiklè

²⁵ Aman bi Roboam a ngu bi, te mvi na mazlamaʼa, Shishak, bi Egypte, a mshkè a ngi var a Jérusalem.

²⁶ A helda skwi mèshèlè te gi Zhiklè, a skwi mèshèlè te gi bai, tèlèba a ma, a gambar guro, man Salomon a ngau.

²⁷ A bi Roboam a ngau gambar züdo te diaʼa, a mpa ta a ri a bi ndohi mɓer gèɗ bai a ma gi bai.

²⁸ Pèc pècèk man bi a dè a gi Zhiklè, ndohi mɓer gèɗ bai ta hulkoɗi gambar a rai. Te deɓaʼa ta shkè a ta de ta a deɓa a gi ndohi mɓer gèɗ bai.

²⁹ Ma ngiɗè a géɗ mizlinè Roboam, a gèɗ skwi man a gu tèlèba, ta windeda ɗèlèwèr ma bihi Juda.

³⁰ Roboam a Jéroboam ta gu var pèc pècèk.

³¹ A Roboam a mʼmets na a va babhi na, a ta feda a gi-dzavi a sam babhi na te kokwar David. Nzlembaɗ mam na Naama, dem Ammon. A Abiam, kra nengaʼa, a ngu bi te di man a nengaʼa.