I Rois 13 - Ma Zhiklè

Zhiklè a hodko ma a géɗ sam mʼmbèh skwi te Bethel

¹ A Ndo nzi pèc pècèk a mbaha na ndo Zhiklè man a shkè te Juda, a Bethel, aman Jéroboam a nzlatsa a sam mʼmbèh skwi na, a nʼndor ɓurdi a pa.

² Ndo nzi pèc pècèk a ngaɗa na, aman a ndérɗè sam mʼmbèh skwi na. A mboho, a ngaɗa: Sam mʼmbèh skwai! Sam mʼmbèh skwai! Ndo nzi pèc pècèk a goɗ ar haha: Te verzi ndohi gi David, ta da yi kra nguraʼa, nzlembaɗ na Josias. Nengaʼa a da zlama ta daʼai a ndohi mvi skwi a zhiklèhi ngaya, tengaʼa man ta ndèr burdi a sam ngaya. A ta da ndèr vatasl ndohi a sam ngaya, te di man a burdi.

³ A pats nasa a nrka nrkedai, a nhodko ma: Na haha skwi malwuɗi Ndo nzi pèc pècèk, man a ngra kinè, a goɗ arsa a vava. Sam mʼmbèh skwi a da wurzl na, a mèr-wèc man a géɗèʼa a da bedèkwè na.

⁴ Aman bi a ntsena ma ndo Zhiklè man a boho, a nderɗa sam mʼmbèh skwi te Béthel a vna, a ntor ri a géɗ sam mʼmbèh skwai, a ngaɗa: Vo-gso! A ri nengaʼa man a toro, a ngwor na, a slaha a mendkoɗa deɓa asaɓai.

⁵ Sam mvi skwi a zhiklèhi na a mwurzl na, a mèrwèc man a géɗèʼa mʼmbedakwe na, ara malwuɗi man ndo Zhiklè a ngau, ara man Ndo nzi pèc pècèk a goɗa.

⁶ A bai a hüno a ngaɗa na ndo Zhiklè: Kam kam, büd Ndo nzi pèc pècèk, Zhiklè ngaya, a ka tsu ri a géɗ ga, a i slaha i mendkoɗi ri ga a deɓa. A ndo Zhiklè a mbüdo Ndo nzi pèc pècèk, a ri bai a nʼnge na ara ri na.

⁷ A bai a ngaɗa na ndo Zhiklè: Washkè a gi ga, a ka da ndau skwai, a i va ka skwi mbalai.

⁸ Aman ndo Zhiklè a ngaɗa na bai: Ko ka vay rèta skwi ngaya, i dè a sam ngaya azɓai, i ndi movar, i si iyam a haha azɓai.

⁹ Aman Ndo nzi pèc pècèk a mfay ma a gèɗ: ka da ndau movar ɓai, ka da sau iyam ɓai, ka da gsko civèɗ man ka beza a pa ɓai!

¹⁰ A nengaʼa a ndo na, a mbeza a civèɗ ngiɗè, a ngso civèɗ man a da a Bethel matsa bai.

Ndo nhadka ma a gi mèdégèɗ a sam Zhiklè

¹¹ A ndo nhadka ma nhalaʼa ngiɗè a zhe te Bethel, a wudahi nengaʼa a ta shkè a ta nje na skwi tèlèba man ndo Zhiklè a ngau a pats nasa te Bethel. A ta nje na ma tèlèba man a ngaɗa na bai, a bab ta.

¹² A bab ta a ngaɗa ta: A beza a civèɗ nangwa? A wudahi ta ngra na civèɗ man ndo Zhiklè te Juda a beza a pa.

¹³ A ngaɗa ta wudahi nengaʼa: Va-vay skwi a deɓ kɗèh! A ta va na skwi a deɓ kɗèh, a nengaʼa a nʼnza a deɓaʼa.

¹⁴ A mhu a verzi ndo Zhiklè, a nʼngotso te verzi mbrom, a ngaɗa na: Ka ndo Zhiklè man ka shkè te Juda de? A nengaʼa a ngaɗa: I nengaʼa.

¹⁵ A ngaɗa na: Washkè a gi ga a ka da ndau skwai!

¹⁶ A nengaʼa a ngaɗa na: I slaha a i dè a deɓa a verzi ngaya asaɓai. I ndi skwi azɓai, I slaha a i dè a gi ngaya azɓai. I ndi skwi azɓai, i si skwi a nda ka a haha azɓai.

¹⁷ Ndo nzi pèc pècèk a mfay ma a gèɗ, a ngaɗayè: Ka da ndau skwi a ka da sau skwi te pa ɓai. Aman ka shkè a deɓa, ka gs civèɗ man ka beza a pa ɓai!

¹⁸ A nengaʼa a ngaɗa na: I ba i ndo nhadka ma, lèmèlèmè ara man a ngaya. Gol Zhiklè a mʼmenday ma Ndo nzi pèc pècèk, a ngaɗa: Da ckoɗa gi ngaya, aman a da ndi skwai, a si iyam. A nʼngul ma a sam na.

¹⁹ A ndo sa a nshkè a deɓa a verzi nengaʼa, a nʼndau skwai, a nsau skwai te gi na.

²⁰ Aman a nʼnza a sam skwi nʼndai, Ndo nzi pèc pècèk a ngaɗa na ndo nhadka ma man a nckoɗa deɓa,

²¹ a mboho a sam ndo Zhiklè man a shkè te Juda, ar haha: Ndo nzi pèc pècèk a goɗ ar haha: A géɗ man ka gu mèdègèd, a ka tsena ma Ndo nzi pèc pècèk ɓai, man a fa ka ma a gèɗ, a ka dzodzor ma nkwèr Ndo nzi pèc pècèk, Zhiklè ngaya ɓai,

²² a géɗ man ka men ngaya a deɓa, a ka ndau skwai a ka sau iyam a sam man i gada ka: Ka ndau skwi a ka sau iyam a pa ɓai! Ka da metsi ngaya a géɗ pats ngaya azɓai.

Mʼmetsi na

²³ Aman a nʼndau skwai a nsau skwi klèng ma, ndo nhadka ma man a nckoɗa deɓa a mva na skwi a deɓ kɗèh,

²⁴ a nengaʼa a mdo na. A civèɗ marizhèlè a hakaɗai, a nkeɗaʼa, nckondo nengaʼa a zolom civèɗ, kɗèh a nzlatsa a tsagiaʼa, marizhèlè a tsagi nckondo.

²⁵ A ndohi man ta beza a civèɗ ta rka nckondo a zolom civèɗ, marizhèlè a tsagiaʼa. Ta shkè a deɓa a kokwar a ta goɗ ma haha a sam man ndo nhadka ma nhalaʼa a nʼnza te pa.

²⁶ A ndo nhadka ma man a nckoɗa a deɓa a civèɗ na, a ntsenaʼa, a ngaɗa: Nasa ndo Zhiklè man a nfa na gèɗ a ma Ndo nzi pèc pècèk ɓai, a Ndo nzi pèc pècèk a mva na a ri marizhèlè man a nkuratsa, a nkeɗaʼa, ara man Ndo nzi pèc pècèk a gada na.

²⁷ A ngaɗa ta wudahi na: Va-vay skwi a deɓ kɗèh! A ta va na skwi a deɓ kɗèh.

²⁸ A nengaʼa a mdo, a nʼngots nckondo a zolom civèɗ, kɗèh a marizhèlè ta zlatsa a tsagiaʼa. Marizhèlè a nʼnda nckondo ɓai, a nʼnda kɗèh ɓai.

²⁹ A ndo nhadka ma a nco nckondo ndo Zhiklè, a mfeda a deɓ kɗèh, a nda a kokwar. Te deɓaʼa ndo nhadka ma nhalaʼa a mshkè a kokwar, aman a kuɗiaʼa, a nda riaʼa raʼa.

³⁰ A ta a gi-dzavi nengaʼa, a nkuɗiaʼa: Woba, kramam ga!

³¹ Aman a nraʼa ma, a ngaɗa ta wudahi nengaʼa: Aman i da metsi ga, vafyè a géɗ ndo Zhiklè, a vatasl ga a vatasl nengaʼa ta humda a sam staɗ.

³² Aman ma man a goɗ, man a ndurɗo sam mʼmbèh skwi te Bethel, a sam mʼmbèh skwi a géɗ za te kokwar Samarie tèlèba, ara man Ndo nzi pèc pècèk a njè na ma a gèɗ, a da gi arsa.

³³ Ko te deɓ skwi haha, Jéroboam a njèka civèɗ nengaʼa ambaɓiaʼa ɓai A mpe ta ndohi ngiɗè ambalai a ndohi mvi skwi a zhiklèhi na a géɗ za, ko wawa man a woya a ngi mizlinè sa.

³⁴ Nasa man ndohi gi Jéroboam ta wushahi a malai, a ta gedas ta, a ta ze ta a géɗ herkeda.