I Rois 12 - Ma Zhiklè

Kokwar-bi nʼngela

¹ A Roboam a mdo Sichem. Ndohi Israel tèlèba ta ɓicko va a Sichem, aman ta fi a bai.

² Aman Jérobo-am, kra Nebath, a ntsenaha te Egypte, a sam man a mhu na auda a pa a bi Salomon, a mshkè a deɓa te kokwar Egypte.

³ Ta zlündo ndo a ta da bahka na. A Jéroboam a mshkè, a nda ndohi Israel mɓicaʼa tèlèba. A ta gaɗa na Roboam aranta:

⁴ Bab ngaya a nʼnga nga matakwan kumba. Anai kedaha gèɗ a hai! A nga gi mizlinè ngaya.

⁵ A nengaʼa a ngaɗa ta: Vo-do a kin manka makar, a kin menkada deɓa a sam ga. A ndohi to do ta.

⁶ A bi Roboam a ta tsomma a nda ndohi nhalaʼa man ta gu mizlinè a sam Salomon, bab na, te va man a zhè a nshèffè dai, a ndzhaɗ ta: Kin ngatsay maya mè, aman i da menda ta ndohi haha?

⁷ A ta gada na: Aman a patsna ka ga ta skwi ara man ta woyaʼa a ndohi haha, a ka ga ta skwi man amba, a ka gada ta ma mbelaʼa, ta da gi mizlinè ngaya a mèdèp.

⁸ Aman nengaʼa a nfa na zlembaɗ a ma ndohi nhalaʼa ɓai, a mdo a ta tsomma a nda slalhi na man ta gu mizlinè a sam na.

⁹ Nengaʼa a ngaɗa ta: Kin ngècè maya mè, a nga da menda ta ndohi haha man ta dzhadyè, ma mè? Ta gadayè: Kedaha gèɗ a hai! Bab ngaya a nʼnga nga matakwan kumba!

¹⁰ A slalhi nengaʼa ta gada na: Ka da gada ta ndohi man ta dzhaɗ ka a ta gada ka: Bab ngaya a nʼnga nga matakwan, kedaha gèɗ a hai, ka gada ta aranta: Kra ri ga haha ndazla nengaʼa a va bab ga.

¹¹ Arsa: Bab ga a nʼnga kinè matakwan kumba, iyè i da ga kinè matakwan a fenaʼa. Aman bab ga a ndah kinè a mè-nèwèɗ, iyè i da tse kinè a gada.

¹² Te mʼmèn mamakaraʼa, Jéroboam a ndohi Israel tèlèba ta shkè a deɓa a sam Roboam, ara man bi a gada ta: vo-washke a deɓa te deɓ mʼmèn makar!

¹³ A nengaʼa a ngaɗa ta ma mwuɗitpa a ndohai, nca maya ndohi nhalaʼa man ta ngra na ɓai.

¹⁴ A ngaɗa ta ara man slalhi na ta ngra na, a ngaɗa: Bab ga a nga kinè matakwan kumba: aman iyè i giaʼa a fenaʼa. Bab ga a ndah kinè a mènèwèd; aman iyè i da tse kinè a gada.

¹⁵ Aranta bai a nfa gèɗ a ma ndohi ɓai. Ndo nzi pèc pècèk a ngau arsa, a woya a gi ara man a goɗ te ma Achija te Silo, a ngaɗa na Jéroboam, kra Nebath.

Roboam

¹⁶ A ndohi Israel tèlèba ta rkaʼa, bai a nfa gèɗ a ma tengaʼa ɓai, a ndohi to do a ta menda na bai a ta gada na: Nga gakaɗa a nda David mè? Nga ndau skwi nʼndi gai te ri kra Isai ɓai! Ndohi Israel, va-slambaɗa, vo-do ngwai!

¹⁷ Anai, David, wor di ndohi gi ngaya! A ndohi Israel to do ta a ngwi ta. A Roboam a ngu bi a géɗ ndohi Israel man ta nza te kokwar Juda.

¹⁸ A bi Roboam a nzlündo Adoram, bi ndohi mizlinè. Aman ndohi Israel ta kola a kwa, a mʼmets na. A bi Roboam a mhu na a kiki a kokwar Jérusalem tsam-tsam.

¹⁹ Aranta ndohi Israel tèlèba ta kezla va ta a ndohi gi David, ha patsna.

²⁰ Aman ndohi Israel tèlèba ta tsena, Jéroboam a mshkè a deɓa ma, ta zlündo ndo da bahka na a sam ndohi mɓicaʼa. A ta feda a bai a géɗ Israel tèlèba. Ndohi man ta nza a ta humda va a ndohi gi David, sèi ndohi te verzi Juda.

²¹ Roboam, kra Salomon, a mshkè a deɓa a kokwar Jérusalem, a mɓic ta ndohi gi Juda tèlèba, a ndohi te verzi Benjamin, ndohi var mparaʼa 180.000, a nda gi var a ndohi Israel, a woya kokwar-bi na a deɓa.

²² Aman Zhiklè a ngaɗa na She-maja, ndo Zhiklè:

²³ Gaɗa na Roboam, kra Salomon, bi Juda, a ndohi Juda, a ndohi Benjamin, a njèkèɗi ndohi tèlèba:

²⁴ Ndo nzi pèc pècèk a goɗ ar haha: Kin gu var a ndohi Israel, kramamhi kinè, ɓai! Va-men kinè a deɓa a ngwai! Aman skwi haha, iyè a ngau! A ta co ma Ndo nzi pèc pècèk, a to do ta ngwai, ara man Ndo nzi pèc pècèka gada.

Mʼmbèh skwi Jéroboam

²⁵ A Jéroboam a nrom gi a vaʼa te kokwar Sichem, te za Ephraim, a nʼnza a pa. Te deɓaʼa a ndo a ma ma, a nrom gi te Penuel a vaʼa.

²⁶ A hur te ndav na: Aranta kokwar-bi a dè a deɓa a ri ndohi gi David.

²⁷ Aman a vava, ndohi ta dè a kokwar Jérusalem, a ta da va na skwi a Zhiklè te gi Ndo nzi pèc pècèk, ta da ngowdko ndav ta a sam bi ta, a sam Roboam, bi Juda, ta da kedyè, a ta humda va zaʼa a Roboam, bi Juda.

²⁸ Gar haha bai a hur maya na ngiɗè tsaɗ: A mvüdo marihi guro cèw a ngaɗa ta ndohai: Kai, kin do Jérusalem pèc pècèk nʼnzi a zhè – dra! Israel, na haha Zhiklè ngaya man a helka kinè auda te kokwar Egypte!

²⁹ A mfeda ngiɗè a Bethel, a mfeda ngiɗè a Dan.

³⁰ Nasa ndohi ta wushahi a malai. Ta dzodzor zlè, ha Dan.

³¹ Te deɓaʼa a ngau sam mʼmbèh skwi tsaɗ tsaɗ a géɗ za, a mpu ndohi ambalai, man ndohi Lévi ka ɓai, a ndohi mvi skwi a zhiklèhi sa.

³² A Jéroboam a mfu ngolala a ki matsamakaɗaʼa, mʼmèn 15 a kia, lèmèlèmè ara ngolala man ta gu te Juda. A ngau ngolala arsa te Bethel, a nzla na skwi a marihi guro man a vüdo, a ngaɗa ta ndohi mvi skwi a zhiklèhi nengaʼa, aman ta gi mizlinè tengaʼa a sam mʼmbèh skwi man a ngau te Bethel.

³³ A mdo a sam mʼmbèh skwi man a ngau te Bethel te mʼmèn 15, a ki matsamakaɗaʼa, a kia man a hur te géɗ na, a mfu a ngolala ndohi Israel, a mdo a sam mʼmbèh skwi na, a nʼndor ɓurdi a pa.