I Rois 11 - Ma Zhiklè

Mʼmbèh skwi Salomon

¹ Bi Salomon a woy ngwozi, man verzi ta tsaɗ tsaɗ, kumba, a va dem Pharaon: ngwozi Moab, Ammon, Edom, Sidon, Heth,

² te va ndohi man Ndo, nzi pèc pècèk a ngaɗa ta ndohi Israel: kin derzla va a tengaʼa ɓai, a tengaʼa da derzla va a kinè ɓai! Man ɓai ta da pe kinè a wai a kin jèjèr zhiklè tengaʼa. Aman ngwozi sa ta co ndav Salomon.

³ Ngwozi man a ngra ta ma, 700, dalahi bai, a ngwozi ngiɗè 300. A ngwozi nengaʼa ta ngwodama na ndav.

⁴ Aman Salomon nhala ma, ngwozi ta zlakeda a civèɗ na, a ta gedessama na ndav aussa, a njèjèr zhiklè ngiɗè, a hér Ndo nzi pèc pècèk staɗ genè ka ɓai, ara man David, bab na, a gau.

⁵ A Salomon a ndzodzor Astoreth, zhiklè mʼmbèh skwi ndohi Sidon, a Milkom, skwi ndohi Ammon man a ndara na Zhiklè.

⁶ Salomon a nʼnga skwi man ambaha Ndo nzi pèc pècèk ɓai, a ndzodzor Ndo nzi pèc pècèk tèlè ɓai, ara man David, bab nengaʼa a gau.

⁷ A nrom sam mʼmbèh skwi a Kemosch, skwi Moab man a ndara na Zhiklè. A nrom sam mʼmbèh skwi a Moloch, skwi ndohi Ammon man a ndara na Zhiklè; a géɗ za a tsagi Jérusalem, te civèɗ mvèng pats.

⁸ A nrom skwiaʼa, a ngwozi man verzi ta tsaɗ tsaɗ tèlèba arsa, aman ta ndara na a ta zla na skwi a zhiklèhi tengaʼa.

⁹ A Ndo nzi pèc pècèk a ngu ndav a géɗ Salomon, a géɗ man a ngwoda na deɓa, Zhiklè Israel, man a ngudoko na va a dai sak cèw.

¹⁰ Nengaʼa man a mfa na ma a gèɗ: Ka dzodzor zhiklèhi ngiɗè ɓai! Aman Salomon a nfa na gèɗ a ma Ndo nzi pèc pècèk ɓai.

¹¹ A Ndo nzi pèc pècèk a ngaɗa na Salomon: A géɗ man ka gu mali aranta, a ka dzodzor nderzlè-ma ga a ma man i njè ka a gèɗ ɓai, i da ngezlama ka kokwar-bi ngaya auda te rai, a i da va na ɓèl ngaya.

¹² Aman i cè di azɓai, man ka zhè a nshèffè dai, a géɗ David, bab ngaya. Aman i da cè auda te ri kra ngaya.

¹³ I da cèma na auda te ri tèlè azɓai. I da va na verzi ndohi staɗ a kra ngaya, a géɗ David, ɓèl ga, a géɗ Jérusalem man i ngotskoɗauda.

Mayamhi Salomon

¹⁴ A Ndo nzi pèc pècèk a nʼngwoda Hadad, ndo Edom, te verzi bi Edom, a mayam Salomon.

¹⁵ Aman David a mbazl ta ndohi Edom, a Joab, bi-sojè a mdo a raʼa ndohi mbazlaʼa. A mbazla ngurhi ngurhi tèlèba.

¹⁶ Joab a ndohi nengaʼa ta nza te pa ki 6, ha a ngedassa ngurhi ngurhi te Edom tèlèba.

¹⁷ Aman Hadad a mhu na a nda ndohi mizlinè bab na, ndohi Edom, kètè, a kokwar Egypte. Hadad wudahi dai.

¹⁸ Ta slambaɗa te Madian, a ta shkè Paran, a ta pe ta ndohi Paran kètè a verzi ta, a to do a kokwar Egypte, a sam Pharaon, bi Egypte. Nengaʼa a mva na gai, a mva na skwi nʼndai, a mva na dak.

¹⁹ A Pharaon a nfu a ndo na, a mva na demam ngwoz na a ngwoz, demam Takpenes, ngwoz bai.

²⁰ Demam Takpenes a nya na Guenubath, kra na, a gra te gi bi Pharaon. A Guenubath a gra te va wudahi bi Pharaon, te gi Pharaon.

²¹ Te Egypte, Hadad a tsenaʼa, David a mʼmets na a va babhi na, a Joab, bi-sojè a mʼmets na. A Hadad a ngaɗa na Pharaon: Vay civèɗ a i dè a deɓa a kokwar ga!

²² Aman Pharaon a ngaɗa na: Skwi man ka ngatsa ɓai a sam ga a zhi dè? Ka woy a ka dè a deɓa a kokwar ngaya èhè-mè? A nengaʼa a ngaɗa: Aʼai! Vay civèɗ genè! A Hadad a mʼmen na a deɓa a kokwar na. A ngau bi a géɗ Edom, a nʼnga na matakwan a Israel.

²³ A Zhiklè a nʼngwoda Rezon, kra Eliada, a mayam Salomon zaʼa. Rezon a mhu na a sam Hadadézer, bi Tsoba, bi na,

²⁴ a mɓic ta ndohi a verzi nengaʼa, a ngu bi ndohi nkeda ndo. A nduma Damas, a nʼnza a pa, a ngu bi te Damas.

²⁵ A ngu a mayam Israel a pats nshèffè Salomon tèlèba.

Achija a hodko ma a géɗ Jéroboam

²⁶ A Jéroboam, kra Nebath, ndo Ephrata te Tsereda, mam nengaʼa Tserna, ngwoz mazai, ndo mizlinè bi Salomon, a nsala na va a gèɗ a bai, aranta:

²⁷ Salomon a nrom kokwar Millo, a mpizlè zlazlar kokwar David, bab na, a vna.

²⁸ Jéroboam, masli sa, ndo man a sun mizlinè, mwosla a sam mizlinè. Aman Salomon a rkaʼa, a ngu gol sa a ndo mɓer mizlinè gi Joseph.

²⁹ Te ndev nasa, Jéroboam a mshkè auda te kokwar Jérusalem, a ta zlü gèɗ a Achija, ndo nhadka ma, te Silo, a civèɗ. Achija a maslaka mɓuaʼa a va. Ta cèw te dak, ta a géɗ ta.

³⁰ A Achija a ngso maslaka mɓuaʼa a va nengaʼa, a nkuratsa te va 12.

³¹ A ngaɗa na Jéroboam: Hul a ngaya 10, te man Ndo nzi pèc pècèk, Zhiklè Israel, a gaɗa: Na haha i ngezlama na bi auda te ri Salomon, a i pa ka verzi ndohi 10.

³² Njèkè verzi staɗgenè a nengaʼa a géɗ David, ɓèl ga, a géɗ Jérusalem, kokwar man i ngotskoɗauda te va verzi ndohi Israel tèlèba.

³³ A géɗ man Salomon a njèkyè, a tsi ri a Astarté, zhiklè mʼmbèh skwi Sidon, a Kemosch, zhiklè ndohi Ammon, a ndzodzor civèɗ ga ɓai, a nʼnga skwi zuraʼa a sam di ga ɓai, a ndzadzara ma nkwèr ga a ma man i da ta a vna ɓai, ara man David, bab na, a gau.

³⁴ Aman i da ngezlama na bi auda te ri a nengaʼa azɓai, da nza a bai, ha a mʼmets na, a géɗ David, ɓèl ga, man i ngotskoɗauda, man a ndzodzor ma nkwèr ga a ma man i de ta a vna.

³⁵ Aman i da ngezlama na bi auda te ri a kra na, a i pa ka verzi ndohi 10.

³⁶ A kra na i da va na verzi ndohi staɗgenè, a skwi nhél sam David, ɓèl ga, a zhè a sam di ga te Jérusalem pèc pècèk, te kokwar man i ngotskoɗauda, a nzlembaɗ ga da nza a pa.

³⁷ Aman ka, i woya aman ka gi bai a géɗ skwi tèlèba man ndav ngaya a woyaʼa, a ka gi bi a géɗ Israel.

³⁸ Aman ka da fi géɗ a skwi tèlèba man i ngreda ka, aman ka dè a civèɗ ga, a ka gi skwi zuraʼa a sam di ga, a ka jèjèr ma nkwèr ga a ma kita ga, ara man David, ɓèl ga, a gau, i da zhè a nda ka, i da tila ka gi ngaya gedeng-gedengaʼa, a verzi ngaya a dè a ma ma, ara man i tila na David, a i da va ka Israel.

³⁹ A i da manda ta gèɗ a hai a ndohi te verzi David aranta kètè, aman a mèdèp ka ɓai.

⁴⁰ Salomon a hèsh maya, a woya a nkeda Jéroboam. A Jéroboam a mhu na a kokwar Egypte, a sam Shishak, bi Egypte, a nʼnza a kokwar Egypte, ha Salomon a mʼmets na.

Mʼmetsi Salomon

⁴¹ Ma Salomon ngiɗè tèlèba, skwi man a gau, ma maya nengaʼa, ta windeda ɗèlèwèr Salomon.

⁴² Salomon a ngu bi te Jérusalem, a géɗ Israel tèlèba, mvi 40.

⁴³ Tedeɓaʼaa mʼmets na a va babhi nengaʼa. A ta rda a kokwar David, bab na. A Roboam, kra nengaʼa, a ngu bi te di man a nengaʼa.