I Rois 10 - Ma Zhiklè

Bi te Saba, ngwoz

¹ Te Saba, ngwoz a ngu bai, a ntsena labar ma Salomon, a mshkè aman a njhèɗèʼa

² A mshkè a kokwar Jérusalem, a ndohi a verzi kumba, a zlugumihi man ta zuɓ burdi, a guro, a vata, a kwa mbelaʼa. A ndikakaɗa, a sam Salomon, a ndzhoɗo skwi tèlèba man a hulkoɗi a ndè jhèɗèʼa.

³ A Salomon a mʼmbeɗa na a pa tèlèba. Skwi man bi a sun ɓi ba, azɓai. A skwi man a slaha a mbeɗa na a pa ɓi ba, azɓai.

⁴ Aman bi Saba a rka maya Salomon tèlèba, a gi man a roma,

⁵ skwi nʼndi te gi na, a gi ndohi mizlinè nengaʼa, ara man golahi nengaʼa ta tilèʼa, a maslaka tengaʼa, ndohi ngsa na zom, a skwi man a ndara na a Ndo nzi pèc pècèk te gi Zhiklè, a nrzl na a vata,

⁶ a ngaɗa na bai: Skwi man i tsena te kokwar ga a géɗ ngaya, a géɗ maya ngaya, narsa a vava.

⁷ I gaɗa a ga, az arsa ɓai, ga i shkè a i da rka a di ga. Aman a vava ta ngray tèlè ɓai, ko rètaʼa ba ta ngray ɓai. Maya ngaya a labar ma ngaya a fena man ta gèɗèʼa, man i tsenaʼa.

⁸ Mwuffè a sam ndohi ngaya, mwuffè a sam golahi ngaya, man ta zhe a sam ngaya pèc pècèk, a ta tsena ma ngaya man maya te pa.

⁹ I shid gèɗ a Ndo nzi pèc pècèk, Zhiklè ngaya, man a va ka pombai, a nʼnzede ka a gèɗ sam nʼnzi bi Israel a mèdèp, a nfe ka a bai a ka gi kita zuraʼa.

¹⁰ A nva na guro a bai te di Suli 1.000, 1.000, 1.000, 120, burdi kumba, a kwa mbelaʼa. Burdi kumba ara man bi Saba a mva na bi Salomon, ta ngotso te kokwar te deɓaʼa arsa asaɓai.

Skwi mèshèlè Salomon

¹¹ Ndohi wurom Hiram man ta hulko guro te Ophir, ta hulkoɗi wof nshfaʼa kumba a vaʼa te Ophir, a kwa mbelaʼa.

¹² A bai a nɗaheda wof kurrèʼa a ma gi Zhiklè, a ma gi bai, a ta hulko ta ganzavar a tèzlèzlèu a ndohi nsli dimèsh. Ta ngatsa wof aranta te deɓaʼa te kokwar asaɓai, a ndohi Israel ta rka ɓai, ha patsna.

¹³ A bi Salomon a mva na skwi tèlèba man a woyaʼa a bi Saba, a skwi mbalai a vaʼa. Te deɓaʼa a mʼmèn na a deɓa a kokwar na, a nda golahi nengaʼa.

¹⁴ Guro man ndohi ta hulko na Salomon tʼhwaɗ mvi staɗ, gozhèm a gi 660,

¹⁵ a va skwi man ndohi mprè skwai ta tsokolko na a duak, man ndohi ganai ta pilèʼa, a bihi Arabe a bihi kokwar ta hulko na.

¹⁶ A bi Salomon a ngau gambarhi a guro. Mbibihiaʼa, gambar staɗ a guro te di kilo 6.

¹⁷ Gambarhi nkèshèa 300, a guro. Gambar staɗ te di guro kilo 3. A bai a mpe ta a gi a sam nhèyè wof te Liban.

¹⁸ A bai a ngau sam nʼnzi bi mbiaʼa a zlèʼèn fakawai, mbè te pa a guro ndaɓalaʼa.

¹⁹ Sam sak ntivè a sam nʼnzi bai, a gi 6. Te tsagi cèw ba, ngaʼa ara marizhèlè. A sam nʼnzi bai a ngu sam mpi lolok ara marizhèlèhi cèw. Sam ndingèdè deɓa, nhuɗokoʼa.

²⁰ A sam sak ntivè, marizhèlèhi 12 a pa, Tuna, Tuna. Ta ga arsa te kokwar-bi ngiɗè ɓai.

²¹ Kokwi bi Salomon, guro. Kolongwi gi a sam wof nhayaʼa te Liban tèlèba guro ndaɓalaʼa. Verzhègenè, ta rka ara skwi man gani az a pa ɓai te va man Salomon a zhè.

²² Bai a nʼngots wuromhi te Tarse a géɗ iyam mbiaʼa, a nda ndohi nhèd wurom Hiram. Wuromhi ta shkè ngwi te Tarse, sak staɗ tʼhwaɗ mvi makar, a ta hulko guro a verzhègenè a zlèʼèn fakawai a gelakai a pelaibelökwöm.

Maya Salomon

²³ Bi Salomon a mfena bihi a géɗ herkeda tèlèba, a skwi mèshèlè ba a maya ba.

²⁴ Ndohi tèlèba ta woy a ta rka di Salomon, a ta tsena ma nengaʼa man maya te pa, man Zhiklè a mva na.

²⁵ Tèlèba ta shkè a skwi mbali te rai: verzhègenè, guro, maslaka, skwi var, burdi, plèshi-hai, kdèhihai, a mvi a mvai.

²⁶ A Salomon a mɓüco kiki var, a mɓic ta ndohi plèsh, a nʼngots kiki var 1.400, a ndohi plèsh 12.000, a mpa ta matrihiaʼa a kokwar a sam kiki var, matrhiaʼa a tsagi bai a kokwar Jérusalem.

²⁷ A bai a ngau, a Suli a zhè te Jérusalem kumba ara kwa, a wof ɗawai a zhè kumba ara tèngètè te dak.

²⁸ Plèshihi Salomon a nsumka ta te kokwar Egypte. Ndohi gani bai to do a ta sumkaɗi a ri a rai te kokwar Egypte.

²⁹ Gani kiki var staɗ man a shkè te Egypte, a gi Suli 120.000. A plèsh staɗ a gi 30.000. Kiki var a plèsh man bihi Heth a bihi Syrie ta suma, a bezkaɗa ri ndohi gani Salomon.