I Chroniques 13 - Ma Zhiklè

David a hèr koti Zhiklè

¹ David a ntsomma a nda bihi a géɗ ndohi gozhèm gozhèm, a bihi a géɗ ndohi 100, 100, a nda bihi sojè tèlèba,

² a ngaɗa ta ndohi Israel mɓicaʼa tèlèba: Aman ambaha kinè, aman ambaha Ndo nzi pèc pècèk, Zhiklè nga, nga da zlinda ta ma a kramamhi nga tèlèba, te kokwar Israel tèlèba, a sam ndohi mvi skwi a Zhiklè ba, a sam ndohi Lévi a kokwar tengaʼa, a sam a tsagiaʼa tèlèba, a nga baha ta, aman ta ɓica va a nda nga,

³ a nga da cko koti Zhiklè nga a deɓa a sam nga. Te va man Saul bai, nga fa na gèɗ ɓai.

⁴ A ndohi mɓicaʼa tèlèba ta woy a ta gi arsa: Skwi haha ambaha ta ndohi tèlèba zuraʼa.

David a ckoɗi koti Zhiklè a deɓa

⁵ David a mɓic ta ndohi Israel tèlèba, a hinè te Shichor te Egypte, ha ndè a kokwar Hamath, aman ta ckoɗi koti Zhiklè a deɓa te Kirjath-Jearim.

⁶ David a ndohi Israel tèlèba to do a kokwar Baala, a Kirjath-Jearim, te Juda, aman ta ckoɗi koti Zhiklè, man ta baha na nzlembaɗ Ndo nzi pèc pècèk, man a nzi a géɗ chérubimhai, a pa, a deɓa.

⁷ A ta feda koti Zhiklè a géɗ kiki mɓuaʼa, a ma gi Abinadab. Uzza a Achjo to do a ma nengaʼa.

⁸ David a ndohi Israel tèlèba ta gècè a vata a sam Zhiklè, ta sli dimèsh, a ta tsi ganzavar, a tèzlèzlèu, a ganga, a dakocèr a tolom.

⁹ Aman ta ndikè a hedak te Kidon, Uzza a ngsa koti Zhiklè te rai, a géɗ man zlèhi ta woya ta kalda.

¹⁰ A Ndo nzi pèc pècèk a ngu ndav a vata a géɗ Uzza, a nkeɗaʼa a pa, a géɗ man a nlama na koti Zhiklè a rai. A mʼmets na a pa a sam di Zhiklè.

¹¹ A ndza na a ndav a David, a géɗ man Ndo nzi pèc pècèk a nceda Uzza a ma, a mverzlaha ta, a ta baha na samaʼa Pérets-Uzza.

¹² A pats nasa David a gi zlau Zhiklè, a ngaɗa: Man ar haha, i slaha a i ckoɗi koti Zhiklè a sam ga ɗè?

¹³ A David a nckoɗi koti Zhiklè a kokwar na ɓai, a ngaɗa ta, aman ta daʼa a gi Obed-Edom te Gath.

¹⁴ Aranta koti Zhiklè a nʼnza te gi ndohi Obed-Edom, ki makar. A Ndo nzi pèc pècèk a mpshè na ma Obed-Edom a ndohi gi nengaʼa tèlèba.