I Chroniques 12 - Ma Zhiklè

Ndohi var David

¹ Ndohi haha ta shkè a sam David a kokwar Tsiklag, te va man a nhu na, a ngheda va na a Saul, kra Kis. Ta te va ngul ndohai, slaslamhi te var,

² ndohi godoma man ta sun mɓèr skwai, ndohi man ta sun nkèl vangava ko a ri mandai ko a ri gula. Te va kramamhi Saul, te verzi Benjamin:

³ Achiézer, tsuvomaʼa, a Joas, kra Shemaa, te Guibea. Jeziel a Péleth, wudahi Azmaveth; Beraca; Jéhu, te Anathoth;

⁴ Jishmaeja te Gabaon, bi te va ngul ndohi 30. Jérémie; Jachaziel; Jochanan;

⁵ Jozabad te Guedéra; Eluzai; Jerimoth; Bealia; Shemaria; Shephathia te Haroph;

⁶ Elkana, Jishija, Azareel, Joézer a Jashobeam, ndohi Koré;

⁷ Joéla a Zebadia, wudahi Jerocham, te Guedor.

⁸ Ndohi Gad matrhiaʼa to do a sam David a gi za te hèshèkèɗ. Ndohi slagama man ta slebau var, ta sun mbedi va a gambar a tsakwal. A sam di ndo, digmdigmhiaʼa ara marizhèlè, a ta hai ara mènèɗ a der za.

⁹ Ezer, nshèlèkuraʼa, Abdias macecèwaʼa, Eliab, mamakaraʼa.

¹⁰ Mishmanna mafadaʼa, Jérémie mazlamaʼa.

¹¹ Attai mamokwaʼa, Eliel matsaraɗaʼa.

¹² Jocanan matsamakaɗaʼa, Elzabad macüɗaʼa.

¹³ Jérémie makulaʼa.

¹⁴ Machannai, makula-a-géɗèʼa staɗaʼa. Tengaʼa bihi sojè ndohi var te va ndohi Gad. Ntabaw tengaʼa a slaha a mbazla ndohi 100, mbi tengaʼa a slaha a mbazla ndohi 1.000.

¹⁵ Ta tawaɗa woyam Jourdain a ki nshèlèkuraʼa, aman Jourdain a hi auda a dzah, a to do a ta dzam ta ndohi a vara auda te civèɗ mvèng pats, te civèɗ nkèl pats.

¹⁶ Ndohi Benjamin a Juda ta shkè a sam David a gi za.

¹⁷ A David a mdo a nzlatsa a sam ta, a ngaɗa: Kin shkè a gumi a kin takahayè ɗè? Aman arsa, i humdè va a nda kinè. Aman kin shkè a kin gay ri a gèɗ a sam ndohi mayamhi ga, iyè i gi wuɗi azɓai; Zhiklè da ngwoda kinè a gèɗ a kinè.

¹⁸ A Mèzhèɓ a mshkè a gèɗ Amasai, staɗ te va bihi sojè, a ngaɗa: Gumi a sam ngaya, David, kra Isai! Gumi a sam ngaya! Gumi a sam ndohi ntakaha ka, te man Zhiklè ngaya a ntakaha kal Te deɓaʼa David a nhumda va a nda tengaʼa, a nge ta a ndohi ncè ta ma ndohi var.

¹⁹ Ndohi Manassé ngiɗè man ta shkè a ta gu var a Saul a ndohi Philistie, to do a va ndohi David. Aman ta takaha ta ndohi Philistie ɓai. Bigolahi Philistie ta tsomma, a ta zlinde ta a deɓa, ta gaɗa: ta da ngwodko nga va a gèɗ.

²⁰ Aman a nshkè a deɓa a Tsiklag, na haha ndohi Manassé man ta humda va a vna: Adnach, Jozabad, Jediael, Micael, Jozabad, Elihu a Tsilthai, tsuvom ndohi 1.000 te Manassé.

²¹ Tengaʼa ta takaha David, ta gu a ndohi ncè ta ma ndohi var, te man ta tèlèba ngul ndohai, a ta gu a bihi sojè.

²² Pèc-pècèk ndohi ta shkè na a va David, a ta takaha, ha a nʼngots ndohi var kumba, ara ndohi var Zhiklè.

Ndohi var David te Hébron

²³ Na haha ngul ndohi var a skwi var te rai, man ta shkè Hébron a sam David, aman ta feda a bai te di man a Saul, ara man Ndo nzi pèc pècèk a goɗa.

²⁴ Wudahi Juda, a gambar a tsakwal te rai: 6.800, ntila a var.

²⁵ Wudahi Siméon, ndohi var slagamhiaʼa: 7.100.

²⁶ Wudahi Lévi: 4.600.

²⁷ Jehojada, tsuvom ndohi Aaron, ndohi nengaʼa 3.700.

²⁸ Tsadok, gola, ndo var, slagama, a ndohi gi nengaʼa, tsuvomhi 22.

²⁹ Wudahi Benjamin, kramamhi Saul: 3.000. Mba man ta ɓer ntamagi bi Saul.

³⁰ Wudahi Ephraim: 20.800, ndohi var slagamhiaʼa, ndohi mbibihiaʼa te va ndohi gi bab ta.

³¹ Te va ndohi Manassé rètaʼa: 18.000, man ta baha ta a nzlembaɗ ta a nzlembaɗ ta, a ta shkè a ta feda David a bai.

³² Wudahi Issacar, man ta sun ndèl samaʼa, a ta sun skwi man Israel a da giaʼa. Tsuvomhi tengaʼa 200, a nda kramamhi tengaʼa tèlèba man to do a verzi ta.

³³ Zabulon, ndohi ntila a var, ndzawaʼa a skwi var a va tèlèba, 50.000, man ta gi var zuraʼa.

³⁴ Nephthali: Bihi sojè 1.000 a ndohi 37.000 a verzi tengaʼa, a gambar a tsakwal te rai.

³⁵ Ndohi Dan, ntila a var: 28.600.

³⁶ Aser, ndohi var, ntila a var: 40.000.

³⁷ Te wud woyam Jourdain, ndohi Ruben, ndohi Gad a rèta ndohi Manassé: ndohi 120.000, a kolongwi var tèlèba.

³⁸ Ndohi var haha tèlèba amba a ngi var ta shkè Hébron, ta mana ndav ta a ta da fi David a bai a géɗ Israel tèlèba. Njèkèɗi ndohi Israel ba, lèmèlèmè a ndav staɗ, ta shkè a ta fi David a bai.

³⁹ Ta nza a sam David mʼmèn 3, ta ndau skwai, ta sau skwai. Kramamhi tengaʼa ta tila ta skwi nʼndai.

⁴⁰ Nslamagihi tengaʼa ba, ha ndè Issacar, a Zabulon, a Nephthali, a ta hulko ta skwi nʼndai, a deɓ kɗèh a zlugumihai a plèsh a zlè. Ta hulko gufa dau, a matawai, a vanda nsulaʼa, a barassa a mbar a skwi gi mbiaʼa a nkèshèa a vata ba, te man mwuffe a zhè mbiaʼa te Israel.