I Chroniques 10 - Ma Zhiklè

Mʼmetsi Saul

¹ Ndohi Philistie ta gu vara ndohi Israel, a ndohi Israel ta hu ta a ndohi Philistie. Ta kumba ta bazl ta a tsakwal te za Guilboa.

² Ndohi Philistie ta hu a verzi Saul a wudahi nengaʼa. A ta bazl ta Jonathan, Abinadab a Malkishua, wudahi Saul.

³ Ndohi Philistie ta ɗagola na va a verzi Saul a vata, a ndohi lèkèɗ ta ngotso a ta ɓoro.

⁴ Saul a ngaɗa na gol nzuɓa na skwi var nengaʼa: Pho gwèsh a ka keɗyè! I woya ndohi man ngwon nʼngela ɓi ta keɗyè ɓai, a ta ngwossahayè ɓai. Aman gol nzuɓa na skwi var nengaʼa a woya ɓai, a gi zlau holholaʼa. A Saul a nco gwèsh, a nkalda na va a gèɗ.

⁵ Aman gol nzuɓa na skwi var na a nrka, Saul a mʼmets na, nengaʼa ba a nkalda na va a gèɗ a tsakwal, a mʼmets na.

⁶ Aranta Saul a wudahi nengaʼa makar a ndohi gi nengaʼa tèlèba ta bazl ta a sam staü, pats staü.

⁷ Aman ndohi Israel man ta zhè te kokwar a vara, ta rkaʼa, ndohi Israel ta hu ta, a Saul a wudahi nengaʼa ta bazl ta ma, ta jèkeda kokwarhi ta, a ta hu ta. A ndohi Philistie ta shkè a ta nza a pa.

⁸ Te mangoslèmaʼa, aman ndohi Philistie ta shkè, ta suɗama ta skwi auda a va ndohi mbazlaʼa, ta ngots Saul a wudahi nengaʼa makar, ta bazlaʼa te za Guilboa.

⁹ A ta suɗama na limbèt auda a va, a ta ngelama na gèɗ, a ta hulo a va skwi var nengaʼa. A ta zlündo ma mbelaʼa haha a kokwar ndohi Philistie tèlèba, a ndohi tengaʼa a zhiklèhi tengaʼa tèlèba.

¹⁰ Ta feda skwi var Saul a gi zhiklèhi tengaʼa, a ta dizleda vatasl gèɗ nengaʼa a dergi zhiklè Dagon.

¹¹ Ndohi Jabès te Galaad tèlèba ta tsena skwi man ndohi Philistie ta ga na Saul.

¹² A ndohi var tèlèba ta slambaɗa, a ta ckoɗi nckondo Saul a nckondohi wudahi nengaʼa, a ta helkoɗa kokwar Jabès. Ta rda nckondohi tengaʼa a verzi mbrom te Jabès, a ta jèkeda skwi nʼndai mʼmèn 7.

¹³ Aranta Saul a mʼmets na, a gèɗ mali nengaʼa man a gau a sam Ndo nzi pèc pècèk, a gèɗ man a ndzodzor ma Ndo nzi pèc pècèk ɓai, a gèɗ man a ndzhoɗo vrai, a mʼmboh skwai.

¹⁴ A ndzhaɗa Ndo nzi pèc pècèk man a ngra na skwi ka ɓai. A Ndo nzi pèc pècèk a nzeda, a mva na kokwar bi a David, kra Isai.