II Samuel 9 - Ma Zhiklè

David a Mephibosheth

¹ David a ngaɗa: Njèkèɗi ndo te gi Saul a zhi ɗè? I woy a i takaha, a géɗ Jonathan.

² Te gi Saul, Ɓèl ngiɗè a zhè, nzlembaɗ na Tsiba. Ta baha na nengaʼa a sam David. Bai a ngaɗa na: Ka Tsiba dè? Nengaʼa a mʼmbeɗa na a ma: ɓèl ngaya!

³ Bai a ngaɗa: Njèkèdi ndo te gi Saul azɓi dè, a takaha ara man Zhiklè a woyaʼa. Tsiba a mʼmbeɗa na a ma bai: Kra Jonathan a zhè, aman vedal.

⁴ Bai a ndzhoɗo: Na tema? Tsiba a mʼmbeɗa na a ma bai: Te gi Makir, kra Ammiel, te Lodebar.

⁵ Bi David a nzlündo ndo, da ckoɗa te gi Makir, kra Ammiel, te Lodebar.

⁶ Aman Mephibosheth, kra Jonathan, kra Saul, a mshkè a sam David, a nkalahai a deɓ sak nengaʼa, a ngurɓahai. David a ngaɗa: Mephibosheth! A nengaʼa a mʼmbeɗa na a ma: ɓèl ngaya: anai.

⁷ David a ngaɗa na: Ka gu zlau ɓai, aman i woy a takaha ka a géɗ Jonathan, bab ngaya, i woy a i va ka sam man Saul, babab ngaya a kworo tèlèba a deɓa. A ka da ndi skwi nte ri ga pèc pècèk.

⁸ Mephibosheth a ngurɓahai, a ngaɗa: Ɓèl ngaya wa, a ka héryè, i kda ambalai.

⁹ Bai a mbaha na Tsiba, ɓèl Saul, a ngaɗa na: Skwi man te va nasa a Saul a ndohi gi nengaʼa tèlèba, i va na kra bi ngaya.

¹⁰ Ka peza na gi dau, kinè a wudahi a ɓèlèlihi ngaya, a kin ɓica na skwai, a ndohi gi bi ngaya ta ngècè skwi nʼndai, a ngu dèha ta. Aman Mephibosheth, kra bi ngaya, da ndau skwi te ri ga pèc pècèk. Wudahi Tsiba, 15, ɓèlèlihi nengaʼa 20.

¹¹ Tsiba a ngaɗa na bai: Da gu tèlèba ara man bai, bi ga, a gaɗa na ɓèl nengaʼa. Ɓèl ngaya a da gi arsa. A Mephibosheth a nʼndau skwi a sam David, lèmèlèmè ara kra bai.

¹² Kra Mephibosheth a zhè, kra nkèshèa, nzlembaɗ na Mica. Ndohi gi Tsiba tèlèba, ɓèlèlihi Mephibosheth.

¹³ Mephibosheth a nʼnza te kokwar Jérusalem, te man a ndi skwi te ri bi pèc pècèk. Vedal, sak cèw ba azɓai.