II Samuel 8 - Ma Zhiklè

David a zlèzlèmè kokwar-bi na

¹ Te deɓaʼa David a nʼnga a ngul ndohi Philistie, a nge ta a ɓèlèlihai. David a nʼngezlama ta wuɗi bi kokwar tengaʼa.

² A mbazl ta ndohi Moab ba, a mʼmanda ta a herkeda, a nliv ta a teɓa. A mbazl ta, teɓa nlivèa cèw; teɓa nlivèa staɗ, a njèke ta. Aranta ndohi Moab ta gu a ɓèlèlihi David, a ta pela na gèɗ.

³ Te deɓaʼa David a nkeda bi Tsoba, nzlembaɗ na Hadadèzer, kra Rehob, aman a ndo, a woya a ntil kokwar bi nengaʼa a ma Euphrate zaʼa.

⁴ David a nhelama na ndohi plèsh 1.700, a ndohi sak 20.000, a ndzaw ta. A mbazl ta plèshi tèlèba, sèi 100 a njèke ta.

⁵ A ndohi Syrie te Damas ta shkè, aman ta takaha Hadadèzer, bi Tsoba. Aman David a mbazl ta ndohi Syrie 2.000,

⁶ a mpa ta a ri a ndohi ndzaraha ta te Damas. Aranta ndohi Syrie ta gu a ɓèlèlihai, a ta pela na gèɗ a David. Aman Ndo nzi pèc pècèk a ntakaha David a sam tèlèba man a mdo a pa.

⁷ David a nhul gambar guro man ndohi Hadadèzer ta gu var a vna, a nhulkoɗi a kokwar Jérusa-lem.

⁸ Bi David a nhulkoɗi züdo kumba te kokwar Béthach a Bérothai, kokwar Hadedézer.

⁹ Aman Thoi, bi Hamath, a ntsenaʼa, David a mbazl ta ndohi var Hadedézer tèlèba,

¹⁰ a nzlinde Joram, kra nengaʼa, a sam David, da shida na gèɗ, da gaɗa ta: Susai, susai, susai, a géɗ man ka ngul ndohi Hadedézer. – Hadadézer a ngu var a Thoi kumba. – Joram a mva na kolongwi verzhègenè a guro a züdo a David.

¹¹ A David a mpa na Ndo nzi pèc pècèk, lèmèlèmè ara verzhègenè a guro ndohi ngiɗè tèlèba man David a ngu a ngul ta:

¹² ara kokwar Syrie, Moab, Ammon, Philistie, Amalek, a skwi man a nhulkoɗi te var a sam Hadadézer, kra Rehob, bi Tsoba.

¹³ A nzlembaɗ David a nge na mbiaʼa. Aman a mshkè a deɓa, te deɓ man a ngu a ngul ndohi Syrie, a mbazl ta ndohi Edom te slrats boma, ndohi 18.000.

¹⁴ A mfu ndohi ndzaraha ta ndohi Edom. A géɗ Edom tèlèba a mfeda ndohi ndzaraha ta. Kokwar Edom tèlèba a nʼnde na a ɓèl David. Aman Ndo nzi pèc pècèk a ntakaha David a sam tèlèba man a mdo a pa.

Bihi sojè David

¹⁵ David a ngu bi a géɗ Israel tèlèba, a nʼnga ta kita nzuraʼa a ndohi nengaʼa tèlèba.

¹⁶ Joab, kra Tseruja, bi sojè ndohi var. Josaphat, kra Achilud, ndo mɓer ɗèlèwèr.

¹⁷ Tsadok, kra Achithub, a Achimélec, kra Abiathar, ndohi mvi skwi a Zhiklè.

¹⁸ Seraja, ndo mwindè ɗèlèwèr; Benaja, kra Jehojada, bi sojè ndohi Kéreth a Péleth. Wudahi David, ndohi ndzadzarda bai.