II Samuel 7 - Ma Zhiklè

Nathan a nhodko ma

¹ Aman pats ngiɗè, bai a nʼnza te gi bi na. Ndo nzi pèc pècèk a mva na nshèk va a sam mayamhi nengaʼa tèlèba.

² David a ngaɗa na Nathan, ndo nhadka ma: Na haha, i nzi a gi man ta gu a wof tsna. Aman koti Zhiklè a zhè te gi maslaka ambalai.

³ Nathan a mʼmbeɗa na a ma bai: Gau skwi tèlèba ara man ka hérèʼa. Aman Ndo nzi pèc pècèk a zhè a nda ka.

⁴ Aman a vaɗ sa, Ndo nzi pèc pècèk a ngaɗa na Nathan:

⁵ Do a ka gaɗa na David, ɓèl ga: Ndo nzi pèc pècèk a goɗ aranta: Ka, man ka da ramay gi a i nzi a pa ɗè?

⁶ Daga man i helka ta ndohi Israel auda te kokwar Egypte, ha patsna, i nza a gi ɓai, i sawala te gi maslaka genè.

⁷ Aman i sawala te kokwar Israel tèlèba, i gaɗa na ndo kita Israel ngiɗè, man i ga ta a ndohi nwèr ndohi Israel ga: kin gay gi a wof tsna azɓi èhèmè, – i goɗ dè?

⁸ Gar haha sèi ka gaɗa na David, ɓèl ga: Ndo nzi pèc pècèk, Zhiklè bi wuɗai, a goɗ aranta: I cka ka a sam tambakihi te dak; a ka gi a bi Israel, ndohi ga.

⁹ A sam tèlèba man ko do a pa, nga a ka, a i gedas ta mayamhi ngaya tèlèba. I woy a i ga ka nzlembaɗ ngaya a mbiaʼa, man a fena ngiɗè tèlèba tʼherkeda.

¹⁰ I woya ta sam nʼnzi a ndohi Israel, ndohi ga, a i pe ta a pa, a ta nzi a gumai, a ta gi zlau te deɓaʼa asaɓai, a ndohi wuɗai ta slaha ta ga ta matakwan ara zlèzlèa asaɓai,

¹¹ ara man ta gau man i pu ndohi kita a géɗ Israel, ndohi ga. I woy a i va na nshèk va te ri mayamhi nengaʼa tèlèba. Aman ka, Ndo nzi pèc pècèk a da mana ka verzi ngaya, a da ga ka gai.

¹² Aman a di pats ngiɗè nshèffe ngaya a ndev na, a ka dè a géɗ a bababhi ngaya, i woy a i Zlatseda na gèɗ a ndo nte verzi ngaya. Nengaʼa man a shkè tʼhwaɗ ngaya, a i nzala kokwar-bi nengaʼa.

¹³ Nengaʼa a da rèm gi a nzlembaɗ ga, a i woy a i nzala sam nʼnzi bi nengaʼa a mèdèp.

¹⁴ I woy a i gi a bab na, a nengaʼa a gi a kra ga. Aman a nda gu skwi ambaɓiaʼa, i woy a i ngatsa na maya, ara bab wudahi man ta ngézh wudahi a mènèwèd.

¹⁵ Aman pombi ga a shkè auda a géɗ nengaʼa azɓai, ara man i co auda a géɗ Saul, man a nza, te va man ka bi di ka ɓai.

¹⁶ Aman gi ngaya a kokwar-bi ngaya sèi ta nzi a sam ga a mèdèp. A sam nʼnzi bi ngaya da nza a mèdèp.

¹⁷ Nathan a mʼmenda na ma Ndo nzi pèc pècèk a David.

¹⁸ A David a ndo a gai, a ngurɓahai a sam Ndo nzi pèc pècèk, a ngaɗa: Zhiklè, Ndo nzi pèc pècèk, i wa, gi ga wa, aman ka ckayè a haha?

¹⁹ Ko arsa a slra di ɓai, Zhiklè, Ndo nzi pèc pè-pèk; ka pasla ta ri a hai a ndohi gi ɓèl ngaya a ma ma dra, a ka ngray verzi ndohi man ta shkè a ma ma dai, Zhiklè, Ndo nzi pèc pècèk!

²⁰ David a da gaɗa ka a vaʼa ma mè? Ka sun ɓèl ngaya, Zhiklè Ndo nzi pèc pècèk!

²¹ Ka gu skwi aranta a géɗ ɓèl ngaya, ara man ndav ngaya a woyaʼa, a ka ngray skwi mbiaʼa haha tèlèba.

²² A géɗ nengaʼa ka mbiaʼa, Zhiklè, Ndo nzi pèc pècèk. Ngar ka asaɓai. Zhiklè ngiɗè a tsagi ngaya asaɓai, te ma tèlèba man nga tsena a nzlembaɗ nga.

²³ Ndohi a géɗ herkeda ngiɗè ta tema, ara ndohi Israel, ndohi ngaya, a géɗ tengaʼa Zhiklè a mdo, a nsumka ta a deɓa a ndohi na, a mva ta nzlembaɗ mbiaʼa, a ngau skwi mbiaʼa mwuɗitpa a géɗ tengaʼa, a ndzam ta ndohi ngiɗè a zhiklèhi tengaʼa auda a ma tengaʼa?

²⁴ Aman ka, ka ga ta ndohi Israel a ndohi ngaya a mèdèp; ka Ndo nzi pèc pècèk ka gaʼa a Zhiklè tengaʼa.

²⁵ Gar haha, Zhiklè Ndo nzi pèc pècèk, gau ara man ka pasla na ri a hi a ɓèl ngaya, a gi nengaʼa, a ka gu ara man ka goɗo.

²⁶ A nzlembaɗ ngaya a ngi a mbiaʼa pèc pècèk, a ndohi ta gaɗa: Ndo nzi pèc pècèk, Zhiklè bi wuɗai, nengaʼa Zhiklè ndohi Israel. A gi David, ɓèl ngaya, a nzi dai a sam ngaya.

²⁷ Aman ka, Ndo nzi pèc pècèk, Zhiklè bi wuüai, Zhiklè ndohi Israel, ka ngreda na ɓèl ngaya, a ka gaɗa: I woy a i tila ka gai. A géɗ nengaʼa ɓèl ngaya a sassaya di na, a tsi ri a sam ngaya arsa.

²⁸ Anai, Bai, Ndo nzi pèc pècèk, ka Zhiklè, ma ngaya ma nzuraʼa. Ka pasla na ri a hai a ɓèl ngaya: manam a da geda ka.

²⁹ Gar haha mpshè na ma a gi ɓèl ngaya, a ndohi gi nengaʼa da nza a mèdèp. Aman ka, Bai, Ndo nzi pèc pècèk, ka goɗo. Te mpshè ma ngaya, gi ɓèl ngaya a nʼngots mpshè ma a mèdèp.