II Samuel 6 - Ma Zhiklè

David a ckoɗi koti Zhiklè a Jérusalem

¹ David a mɓic ta ndohi var mparaʼa te Israel zaʼa, ndohi 30.000.

² A David a nslambaɗa, a nde ta ndohi tèlèba man ta zhè a sam na, a kokwar Baalé-Juda, aman ta ckoɗi koti Zhiklè a deɓa, man ta baha na nzlembaɗ Ndo nzi pèc pècèk a pa, Zhiklè Bi wuɗai man a nzi a géɗ chérubimhai.

³ A ta feda koti Zhiklè a kiki mɓuaʼa, a ta daʼa auda te gi Abinadab man a zhè a géɗ za. Uzza a Achjo, wudahi Abinadab, ta ngèzlè kikai.

⁴ Uzza a mdo a tsagi koti Zhiklè. Achjo a mdo a ma kikai.

⁵ David a ndohi gi Israel tèlèba ta gècè a wuɗai a sam Ndo nzi pèc pècèk, ta sli dimèsh, a ta tsi ganzavar, a tèzlèzlèu a ganga a dakocèr a dasal.

⁶ Aman ta ndikè a hedak Nacon, Uzza a ngsa koti Zhiklè te rai, a géɗ man zlèhi ta woy a ta kalda.

⁷ A Ndo nzi pèc pècèk a ngu ndav a vata a géɗ Uzza; a Zhiklè a nkeɗaʼa a pa, a géɗ man a nlama na koti Zhiklè a rai. Uzza a mʼmets na a pa, a tsagi koti Zhiklè.

⁸ A ndza na a ndav a David, a géɗ man Ndo nzi pèc pècèk a nceda Uzza a ma, a ta baha na samaʼa Pérets-Uzza, ha patsna.

⁹ A pats nasa David a gi zlau Ndo nzi pèc pècèk, a ngaɗa: Man ar haha, i slaha a i ckoɗi koti Zhiklè a sam ga dè?

¹⁰ David a woya man ta ckoɗi koti Ndo nzi pèc pècèk a kokwar na ɓai. A ngaɗa ta, aman ta daʼa a tsagai, a gi Obed-Edom, te Gath.

¹¹ Aranta koti Ndo nzi pèc pècèk a nʼnza te gi Obed-Edom te Gath, ki makar. A Ndo nzi pèc pècèk a mpshè na ma Obed-Edom a gi nengaʼa tèlèba.

¹² Aman ta ngra na bi David: Ndo nzi pèc pècèk a mpshè na ma gi Obed-Edom a skwi nengaʼa tèlèba, a géɗ koti Zhiklè, David a ndo, a nckoɗi koti Zhiklè auda te gi Obed-Edom, a ndaʼa a kokwar Jérusalem a mwuffe.

¹³ Aman ndohi nzuɓ koti Ndo nzi pèc pècèk ta co, a ta pra sak mokwa ma, ta zlaha na zlè a kra zlè ngraʼa a Zhiklè.

¹⁴ David a gècè a wuɗai a sam Ndo nzi pèc pècèk; a maslaka Ephod ntsentsai a ntseda hwaɗ.

¹⁵ Aranta David a ndohi gi Israel tèlèba ta da koti Ndo nzi pèc pècèk a pa a mwuffe, a dimèsh, a tolom.

¹⁶ Aman koti Ndo nzi pèc pècèk a mshkè a kokwar David, Mical, dem Saul, a mpu di a nvakavar. Aman a nrka bi David, a nzevai, a gècè a sam Ndo nzi pèc pècèk, a nʼndara na.

¹⁷ Aman ta da koti Ndo nzi pèc pècèk a gi ma, a ta feda a sam nʼnzi na, a gi maslaka man David a ntila na. Te deɓaʼa David a nʼndara na skwi a Zhiklè, a mva na skwi a Zhiklè a nshid gèɗ.

¹⁸ Aman David a ndara na skwai, a mvi skwi a Zhiklè a nshid gèɗ klèng ma, a mpshè ta ma ndohi a nzlembaɗ Ndo nzi pèc pècèk, Zhiklè bi wuɗai.

¹⁹ A nkezla ta ndohi tèlèba, ndohi Israel mɓicaʼa tèlèba, ko ngurhi, ko ngwozhihi staɗ staɗ, movar staɗ, zluèɗ kètè, a matawi kètè. Te deɓaʼa ndohi to do ta ngwai.

²⁰ Aman David a mshkè ngwai, ndohi gi nengaʼa ta ga na mbalai. Mical, dem Saul, a ndo aman tazli gèɗ, a ngaɗa: Bi Israel, a patsna ka pa ta hori a di a ndohi mi-zlinè ngaya, ngwozi a ngurhi; ka suɗa na maslaka ngaya auda a va, ara ndohi ambalai, èhèmè?

²¹ David a ngaɗa na Mical: I woy a i gècè a sam Ndo nzi pèc pècèk. I shid gèɗ a Ndo nzi pèc pècèk, man a nckay auda, a nfiyè te di man a bab ngaya, a ndohi gi nengaʼa tèlèba, a nfyè a bai ndohi Ndo nzi pèc pècèk, a géɗ Israel. I woy a i gècè a sam Ndo nzi pèc pècèk.

²² A i woy a i manda gèɗ ga a hi holholaʼa, a fena nta ba, a i ndara ka holholaʼa zaʼa. Aman dalahi mizlinè ga a haha, tengaʼa ta da slebardyè.

²³ A Mical, dem Saul, a nʼngatsa kra ɓai, ha a mʼmets na.