II Samuel 5 - Ma Zhiklè

David, bi Israel tèlèba

¹ Ndohi te verzi Israel ta shkè tèlèba a sam David a kokwar Hebron, a ta gaɗa: nga, vatasl nga a vatasl ngaya, na staɗ. Zluèɗ va nga, a zluèɗ va ngaya, na staɗ.

² Te va nasa ba, aman Saul bi nga dai, ka, ka nde ta ndohi Israel a var, a ka shkè ngwai a nda ta. Ndo nzi pèc pècèk a ngaɗa ka: War ndohi Israel ga, gu bi a géɗ Israel!

³ A ndohi nhalaʼa te Israel tèlèba ta shkè a sam bai te Hébron, ta derzla ma ta a bi David te kokwar Hébron, a sam di Ndo nzi pèc pècèk. Te deɓaʼa ta faɗa na mbar a gèɗ a David, a ta gaʼa a bi Israel.

⁴ Mvi David 30 aman ta feda a bai, a ngu bi ta, mvi 40.

⁵ Te Hébron a ngu bi a géɗ Juda mvi 7 a ki 6. Te Jérusalem a ngu bi a géɗ Israel a Juda tèlèba, mvi 33.

David a duma kokwar Jérusalem

⁶ A bi a nde ta ndohi nengaʼa a kokwar Jérusalem, a ta gi var a ndohi Jébus, man ta zhè te kokwar sa, a ta gaɗa na David: A haha ka slaha ka dè a pa azɓai. Ndohi mandazlai a ndohi vedal ta da dzam ka! Ara man ta gaɗa: David a shkè a sam nta azbai.

⁷ Aman David a nceda gi bi Sion a ma, a wuɗai, nengaʼa kokwar David.

⁸ A pats nasa David a ngaɗa: Ndo man a keɗe ndo Jébus… a ndohi vedal a ndohi mandazlai, mayamhi David… A géɗ nengaʼa ta gaɗa: Ndo mandazlai a ndo vedal da shkè a gi ɓai!

⁹ Te deɓaʼa David a nʼnza te gi bai, a mbaha na kokwar David. A hinè te Millo, a nromko te tsagi te tsagai, a ndikeda hwaɗ gai.

¹⁰ David a grè a ma ma, a ngaʼa a ndo mbiaʼa. Ndo nzi pèc pècèk, Zhiklè bi wuɗai a zhè a nda nengaʼa.

Hiram, bi Tyr, a ce bi David

¹¹ Hiram, bi Tyr, a nzlinde ta ndohi sak a sam David, a wof tsna, a ndohi mbèzl wof a ndohi ngum kwa, a ta rama na gi bi a David.

¹² David a suna, Ndo nzi pèc pècèk a ngaʼa a bai a géɗ Israel, a nzlatseda na kokwar-bi nengaʼa, a géɗ ndohi Israel, ndohi nengaʼa.

Wudahi David man ta yau te Jérusalem

¹³ Te deɓ man a njèkeda kokwar Hebron ma, te Jérusalem, David a nhul ngwozi a vaʼa, a ta ya na wudahi a dalahi a vaʼa.

¹⁴ Nzlembaɗ tengaʼa man ta yau te Jérusalem, ta a haha: Shammua, Shobab, Nathan, Salomon,

¹⁵ Jibhar, Elishua, Népheg, Japhia,

¹⁶ Elishama, Eliada a Eliphéleth.

David a fen ta ndohi Philistie

¹⁷ Aman ndohi Philistie ta tsenaʼa, ta faɗa na mbar a gèɗ a David, a ta feda a bai a géɗ Israel tèlèba, to do tèlèba aman ta gshè David. Aman David a ntsenaʼa, a mshkèhi a sam gi nʼngalaʼa.

¹⁸ Aman ndohi Philistie ta shkè ma, a ta ɗaha va a dal var Rephaim,

¹⁹ David a ndzhoɗo Ndo nzi pèc pècèk, a ngaɗa: I da gu var a ndohi Philistie dè? Ka da pay a ri dè? A Ndo nzi pèc pècèk a mʼmbeɗa na a ma David: Do, i da pa ka ndohi Philistie a rai a vava.

²⁰ A David a ndo Baal-Peratsim, a mbazl ta te pa, a ngaɗa: Ndo nzi pèc pècèk a ndzar ta ndohi mayamhi a ma ga, lèmèlèmè ara iyam man a mbeɗa a sam nʼngaʼa. A géɗ nengaʼa ta baha na samaʼa Baal-Peratsim.

²¹ Ta jèkeda mblom tengaʼa a pa. A David a ndohi nengaʼa ta heldama.

²² Ndohi Philistie to do zaʼa, a ta ɗaha va a dal Rephaim.

²³ Aman David a ndzhoɗo Ndo nzi pèc pècèk, nengaʼa a mʼmbeɗa na a ma: Ko do zuraʼa a tengaʼa ɓai; aman ngalka ta a pa a nʼngélè, a ka kala ta va te civèɗ wof gevda.

²⁴ Aman ka tsena kuɗ te wof, ka ngezla ta va. Nasa Ndo nzi pèc pècèk a zhè a ma ngaya, a ka bazl ta ndohi var Philistie.

²⁵ A David a gu ara man Ndo nzi pèc pècèk a ngaɗa na, a mbazl ta ndohi Philistie, a hinè te Gabaon, ha ndè Guézer.