II Samuel 3 - Ma Zhiklè

¹ Var ndohi gi Saul a ndohi gi David a ngeslè azɓai. Ndohi David ta grè a ma ma, a ndohi gi Saul ta minèhi a hai.

Wudahi David man ta yu te Hébron

² Te Hébron, David a nʼngots wudahai: tsuvomaʼa, Amnon; mam na Achinoam te Jizreel;

³ mbegèdèʼa Kiléab; mam na Abigail, ngwoz Nabal te Carmel. Mamakaraʼa Absalom; mam na Maaca, dem Talmai, bi Gueshur.

⁴ Mafaɗaʼa Adonija, kra Haggith. Mazlamaʼa Shephathia, kra Abithai.

⁵ Mamokwaʼa Jithream; mam na Egla, ngwoz David. Nasa wudahi man David a yau te Hébron.

Abner a jèkeda Ish-Bosheth

⁶ Aman ndohi gi Saul a ndohi gi David ta gi var genè. Abner nte civèɗ ndohi gi Saul, zuraʼa.

⁷ Ngwoz kalak Saul a zhè, nzlembaɗ na Ritspa, dem Ajja. Ish-Bosheth, kra Saul, a ngaɗa na Abner: Ka mana a ngwoz kalak bab ga èhèmè?

⁸ A Abner a ngu ndav kumba a géɗ ma Ish-Bosheth, a ngaɗa: I ndo ambalai man i humdè a Juda dè? I woy ta ndohi gi Saul, bab ngaya, a i ga ta skwi man amba a kramamhi nengaʼa a mandalahi nengaʼa, a i pe kinè a ri David ɓai; a patsna ka gay ndzoan a géɗ ngwoz kè!

⁹ Ndo nzi pèc pècèk a mbada na David:

¹⁰ I da koldko ta ndohi gi Saul auda te bai, a i da tila na sam nʼnzi bai a David a géɗ Israel a Juda, a hinè te Dan, ha ndè Ɓeer-Shéba. Zhiklè da gay skwi ambaɓiaʼa, aman i da ga a sam David arsa bai.

¹¹ A Ish-Bosheth a gi zlau Abner, a mʼmbeɗa na a ma ɓai.

Abner a humdè va a va David

¹² Abner a nzlinde ta ndohi sak a sam David, a ngaɗa na: Nda kwèr kokwar haha wa? Sèi nga derzla ma nga a ka, a i takaha ka, aman ndohi Israel tèlèba ta gshè va a ka.

¹³ David a mʼmbeɗa na a ma: Amba! nga derzla ma nga a ka. Aman i jhèdè skwi staɗ a sam ngaya. Ka zlècè a sam ga di azɓai, sèi man ka shkè a ka Ckoy Mical, dem Saul.

¹⁴ A David a nzlinde ta ndohi sak a sam Ish-Bosheth, kra Saul, a ngaɗa na: Vay Mical, ngwoz ga, man i tsu maʼa a mbèbèc ngwon ndohi Philistie 100.

¹⁵ A Ish-Bosheth a nzlündo ndo, a ta cko ngwoz a sam Palthiel, baki nengaʼa, kra Laish.

¹⁶ Baki nengaʼa a ndzodzora, a kuɗi a verzi nengaʼa, ha ndè Bachurim. Te deɓaʼa Abner a ngaɗa na: Men ngaya a deɓa a ngwai! A nengaʼa a mʼmen na a deɓa a ngwai.

¹⁷ A Abner ta tsomma a ndohi Israel nhalaʼa, a ngaɗa: Nʼnzi a zhè kin woy David a bi kinè.

¹⁸ Anai va-gu arsa mènè! Aman Ndo nzi pèc pècèk a ngaɗa na David: A nda David, ɓèl ga, i woya man i mbel ta ndohi Israel ga te ri ndohi Philistie, te ri ndohi mayamhi tengaʼa tèlèba.

¹⁹ Abner a ngaɗa ta ndohi Benjamin lèmèlèmè. Te deɓaʼa Abner a ndo a sam David a kokwar Hebron, a mʼmenda na ma tèlèba, man Israel a ndohi gi Benjamin tèlèba ta mbakaɗa a ma ta.

²⁰ Aman Abner a mshkè a sam David a Hébron, a nda ndohi 20, David a ntau skwi nʼndi ngolala, a nslébèrdè Abner a ndohi nengaʼa.

²¹ Abner a ngaɗa na David: I woy a i dè a i ɓic ta ndohi Israel tèlèba a verzi bai, bi ga, a ta derzla ma a ka, a ka gi bai, a sam tèlèba ara man ndav ngaya a woyaʼa. A David a mva na civèɗ a Abner, a nde na a gumai.

Joab a nkeɗa Abner

²² Ɓèlèlihi David a Joab ta shkè ngwi te var, a kolongwi man ta hulkoɗi te var kumba. Abner az a sam David te Hebron ɓai. David a mpraʼa, a nde na a gumai.

²³ Aman Joab a ndohi var nengaʼa tèlèba ta shkè ngwi ma, ta gaɗa na Joab: Abner, kra Ner, a nshkèda sam bai, a nengaʼa a mva na civèɗ a nde na a gumai.

²⁴ Joab a ndo a sam bai, a ngaɗa: Ka ge mè? Abner a ndo a sam ngaya. Ka praʼa a nde na a gumai èhèmè?

²⁵ Ka sun ɗi ɗè? Abner, kra Ner, a mshke a sam ngaya, a nda ngwode ka, a mpèr ma auda tʼhwaɗ ngaya, a woy a nsun skwi tèlèba man ka woy a ka giaʼa.

²⁶ Aman Joab a mshkè auda te gi David ma, a nzlinde ta ndohi sak a verzi Abner. A ta ckoɗa deɓa a sam thal iyam Sira. David a sun ɓai.

²⁷ Aman Abner a mshkè a deɓa a Hebron, Joab a ndaʼa a daɓagai, ara man ta da tsi mbrok. Te pa a ntuzo a hwaɗ, a mʼmets na — a mpela Asael, kramam na.

²⁸ Aman David a ntsenaʼa, a ngaɗa: Mali ga azɓai, mali kokwar bi ga azɓai, a géɗ man ta keɗa Abner, kra Saul, mali az a sam Ndo nzi pèc pècèk ɓai a mèdèp.

²⁹ Mali do do a géɗ Joab a ndohi verzi nengaʼa tèlèba! Te gi Joab, matakwan da nza pa pèc pècèk: Gurdzo, hutsoɗ, ndohi vedal, ndohi man ta bazl ta a tsakwal, ndohi mai!

³⁰ Aman Joab a Abishai, kramam nengaʼa ta keɗa Abner a géɗ man nengaʼa a nkeda Asael, kramam ta, te dal var Gabaon.

³¹ David a ngaɗa na Joab a ndohi tèlèba man ta zhè a sam na: Va-kuratseda maslaka kinè aussa, va-feda maslaka sam kuɗa va, va-tsu nguzlah a verzi Abner! A bi David a ndzodzor nckondo.

³² Aman ta ra Abner te Hébron ma, bai a nkuɗau a verzi nengaʼa.

³³ A ntsu nguzlah, a nkudi Abner, a ngaɗa: Abner a mʼmets na ara man ndo shèwa a mʼmets na èhèmè?

³⁴ Ri ngaya ndzawa ɓai, sak ngaya a te shèla ɓai, ta keɗe ka ara ndèrkèzhè ndo. A ndohi tèlèba ta kuɗia a za vaʼa.

³⁵ Aman pats a zhè dai, ndohi tèlèba ta shkè a ta tètika na skwi nʼndi a gèɗ a David. Aman David a mbada: Zhiklè da gay skwi ambaɓiaʼa, i ndi movar azɓai, i tèr skwi nʼndi azɓai, sèi pats nkala.

³⁶ Aman ndohi tèlèba ta tsenaʼa, ambaha ta. Skwi tèlèba man bi a ngau, ambaha ta ndohi tèlèba kumba.

³⁷ A pats nasa, ndohi tèlèba, a Israel tèlèba, ta suna, mʼmetsi Abner, kra Ner, bai a ngod ka ɓai.

³⁸ A bai a ngaɗa ta ɓèlèlihi nengaʼa: Kin sun ɓi dè? A patsna ta keɗa bai, ndo mbiaʼa te Israel.

³⁹ Iyè, a patsna, wuɗi ga azɓai, i slra a ngi bi asaɓai. Ndohi haha, wudahi Tseruja, ta fenyè a wuɗai. Ndo nzi pèc pècèk da pela na skwi ambaɓia haha te ndo ngau.