II Samuel 24 - Ma Zhiklè

David a nger ta ndohai

¹ A ndav Ndo nzi pèc pècèk a ndza na worworaʼa zaʼa a géɗ ndohi Israel, a mpoko na géɗ auda a David a géɗ tengaʼa, a ngaɗa: Do, da nger ta ndohi Israel, a ndohi Juda!

² A bai a ngaɗa na Joab, a ngaɗa ta bihi sojè man ta zhè a sam na: Vo-do a sam ndohi te verzi Israel tèlèba, a hinè te Dan, ha ndè Beer-Shéba, va-nger ta ndohai, a i shinèʼa, ndohi a gi ngama?

³ Joab a mʼmbeɗa na a ma bai: Ndo nzi pèc pècèk, Zhiklè ngaya, da pa na va a ndohi haha a gi 100, 100, a vaʼa, bi ga; a bi ga a nrka a di na dai. Aman bi ga a woya a nʼngér ndo èhèmè?

⁴ Aman David a nfa ta ma a gèɗ a Joab a bihi sojè, aman ta gia genè. A Joab a bihi sojè bai to do, a ta nger ta ndohi Israel.

⁵ Ta tawaɗa woyam Jourdain, a ta hüno te kokwar Aroer, a kokwar te ndev slrats, a civèɗ ndè Gad a Jaezer.

⁶ Te deɓaʼa ta ndikè a kokwar Galaad, a kokwar ndohi Tachthim-Hodshi. Aman ta ndikè a kokwar Dan, to do auna a kokwar Sidon.

⁷ Te deɓaʼa ta shkè a kokwar Tyr man ntèuda a pa a zlazlar mbiaʼa, a kokwar ndohi Hévi a ndohi Canaan tèlèba. Te deɓaʼa a kokwar te dukwaɗ, te Juda, te Beer-Shéba.

⁸ Ta sawala te kokwar tèlèba, a ta shkè a kokwar Jérusalem. Ta gu ki 9 a mʼmèn 20.

⁹ A Joab a nʼngreda na bai: Ndohi var 800.000, ndohi man tsakwal ta a zhe; ndohi Juda 500.000, man a ngerka ta.

Kita David

¹⁰ Te deɓ nengaʼa, mèzhèɓ ndav a nʼngra na David: i gau ambaɓai, a géɗ man i nger ta ndohai. A ngaɗa na Ndo nzi pèc pècèk: I gau malai te skwi man i gau. Anai, Ndo nzi pèc pècèk, pray malai. I gau ara ndo nrzlaʼa.

¹¹ Aman Ndo nzi pèc pècèk a ngaɗa na Gad, ndo nhadka ma, ndo nsun skwi David:

¹² Do a ka gaɗa na David: Ndo nzi pèc pècèk a goɗ aranta: Skwi makar i ngreda ka: Woy staɗ te vaʼa, a i ga ka. Aman David a nslambaɗa a prèk,

¹³ Gad a mshkè a sam David, a nʼngra na: Ka woya mi a gi a kokwar ngaya mvi makar dè, dè ka woy a ka hi ngaya a ndohi mayamhi ngaya ki makar dè, dè ka woya gidiɓèr a gi te kokwar ngaya mʼmèn makar ɗè? Ka woya te va mè? Wor a ka huro, i da menda na ndo nzlindekayè kè?

¹⁴ David a ngaɗa na Gad: I gi zlau a vata; aman dara nga kala a ri Ndo nzi pèc pècèk. Aman nengaʼa, ndohi ta sia te va a vata. I woy a i kèlè a ri ndohi ɓai.

¹⁵ A David a ndzhoɗo gidiɓèr. A pats man matakwan a nhüno, ndohi ta ɓicè dau; a ta bazl ta, a hinè te Dan, ha ndè Beer-Shéba, ndohi 70.000.

^16-17 Aman David a nrka gol Zhiklè man a bèzlè ndohai, a ngaɗa na Ndo nzi pèc pècèk: Na haha, mali ga. Iye i gau skwi ambaɓiaʼa. Aman rèwè ndohi haha a ge mè? Ri ngaya da kedyè, a ndohi gi bab ga! Aman gol Zhiklè a ntarda ri a géɗ kokwar Jérusalem, a woya a ngédèshèʼa, Ndo nzi pèc pècèk a mhur ngiɗè tsaɗ a géɗ matakwan, a ngaɗa na gol Zhiklè man a mbazl ta ndohai: Dèʼa! Mendkoɗi ri ngaya a deɓa! Gol Ndo nzi pèc pècèk a zhè a sam hedak Aravna, ndo Jébus.

David a rèm sam mvi skwi a Zhiklè

¹⁸ A pats nasa Gad a mshkè a sam David, a ngaɗa na: Do a ka gu sam mvi skwi a Zhiklè, Ndo nzi pèc pècèk, a sam hedak Aravna, ndo Jébus.

¹⁹ A David a mdo, ara man Gad a gaɗa na, ara man Ndo nzi pèc pècèk a dzhoɗo.

²⁰ Aman Aravna a pu dai, a nrka bai a ɓèlèlihi nengaʼa, man ta shkè a sam na. Aravna a kizlè dau. A mdo a ngurɓahai a sam bai, a ntseda medi a herkeda.

²¹ Aravna a ngaɗa: Bai, bi ga, a shkè a sam ɓèl nengaʼa èhèmè? David a ngaɗa: I woy a i shum hedak te ri ngaya, a i rèm sam mvi skwi a Zhiklè a samaʼa, a gidiɓèr a ndal na a sam ndohai.

²² Aravna a ngaɗa na David: Bai, bi ga, do co, da vau skwi a Zhiklè ara man ambaha. Na haha, zlèhi man ka ndara ta a Zhiklè; a kolongwi nkizlè dau, a wof a daʼai zlèhai, hul ashègwa.

²³ I vaka skwi haha tèlèba, bi ga, bai a géɗ bihai. Aravna a ngaɗa na bai: Ndo nzi pèc pècèk, Zhiklè ngaya, da va ka pombai!

²⁴ Aman bai a mʼmbeɗa na a ma Aravna: Aʼai, skwi man i ngots ambalai, i woy a i ndara na a Zhiklè ɓai. I woy a i shum te ri ngaya. A David a nsum hedak a zlèhi a Suli 7.500.

²⁵ David a nrom sam mvi skwi a Ndo nzi pèc pècèk a samaʼa, a nʼndara na skwi a Zhiklè, a mva na skwi a Zhiklè te nshid gèɗ. A Ndo nzi pèc pècèk a ntsena ntsi rai a géɗ kokwar, a gidiɓèr te Israel a ndal na.