II Samuel 23 - Ma Zhiklè

Ndivè ma David

¹ Na haha nʼndiv ma David: David, kra Isai, a gèɗèʼa: ndo man ta Zlatseda a gédèʼa, a gédèʼa; ndo man Zhiklè Jacob a mbada na mbar a gèɗ, ndo man a sli dimèsh Israel man amba.

² Mèzhèɓ Zhiklè Ndo nzi pèc pècèk a goɗ te ma ga; ma nengaʼa te nèʼèn ga.

³ Zhiklè Jacob a ngaɗayè; nengaʼa man a ɓer Israel a ngadayè; ndo man a gi bai a géɗ ndohai, zuraʼa, ndo man a gi bai a zlau Zhiklè,

⁴ nengaʼa a hél sam ara man pats a hulko gèɗ, ara pats wushèr man vani a te di ɓai, man a fcè skwi tʼherkeda, man iyam a zhè.

⁵ Gi ga a sam di Zhiklè arsa. Nengaʼa a mpaslay ri a hai a mèdèp, ntila mbelembela tèlèba, a nengaʼa a ɓerèʼa; a nengaʼa a gi a skwi tèlèba a gi a skwi mʼmbelyè a skwi man ambahayè.

⁶ Aman fali ndohai, ta ara vatak man kozlar a nksar ta, ta gshè a ri azɓai,

⁷ ndo a lama ta azɓai, sèi a züdo, a tsaga, a ta ɓicaʼa a ta fa na vogwa a samaʼa.

Ngul ndohi David

⁸ Na haha nzlembaɗ ngul ndohi David: Josheb-Bashébeth, ndo Tachkemon, tsuvom staɗ te va bihi sojè; nengaʼa a ngeda tsakwal a gèɗ ndohi 800, a mbazl ta a sam staɗ.

⁹ Te deɓ nengaʼa Eleazar, kra Dodo, ndo Achochi, staɗ te va ndohi var makar, man ta nza a sam David te kokwar Pas-dammim, aman ndohi Philistie ta ɓica va a pa, aman ta gi var. Aman ndohi Israel ta mende va ta a deɓa,

¹⁰ nengaʼa a nʼnza, a mbazl ta ndohi Philistie, ha a nkaldama na rai, a tsakwal a prè auda te ri azbai. Aranta a pats nasa Ndo nzi pèc pècèk a nge ta a ngul ndohi kumba. A ndohi ta hakaɗa deɓa a verzi nengaʼa, aman ta hil skwi a sam ndohi mbazlaʼa.

¹¹ Te deɓ nengaʼa Shamma, kra Agué, te Harar. Pats ngiɗè, ndohi Philistie ta ɓica va te Léchi. A samaʼa dal gi menda a zhè. Aman ndohi Israel ta hu ta a ndohi Philistie,

¹² nengaʼa a nzlatsa a ndev dal gi menda, a mɓerèʼa, a mbazl ta ndohi Philistie. Aranta Ndo nzi pèc pècèk a nge ta a ngul ndohi kumba.

¹³ Pats ngiɗè, te va man ta tsi dau, tsuvomhi makar te va ndohi 30 ta shkè a sam David a gi za te Adullam, aman ndohi Philistie mɓicaʼa ta nza a dal Rephaim.

¹⁴ David a géɗ za, a ndohi mɓer kokwar Philistie ta te kokwar Bethléhem.

¹⁵ A gèɗ David a iyam te thal ngiɗè a ntamagi kokwar Bethléhem, a ngaɗa: Nda ɓalkay iyam te pa wa?

¹⁶ A ngul ndohi makar ta hau a ta beza zuraʼa a ndev ndohi Philistie mɓicaʼa, ta ɓol iyam te thal a ma kokwar Bethléhem, a ta cko na David; aman nengaʼa a woya a nsia ɓai, a mbadahai a mva na Zhiklè,

¹⁷ a ngaɗa: Ndo nzi pèc pècèk da ɓeryè te ri man i siaʼa! Nshèffè ndohi man ta hur nshèffè ta ɓai, kè! A woya a nsia ɓai. Skwi haha ngul ndohi makar ta gau.

¹⁸ Abishai, kramam Joab, kra Tseruja, tsuvomaʼa te va 30. A ngeda tsakwal a géɗ ndohi mbazlaʼa 30, ndo mbiaʼa te va 30.

¹⁹ Te va 30 ta slubordo, a ta gu a bi sojè tengaʼa. Aman nʼnga lèmèlèmè ara tengahi makar asaɓai.

²⁰ Benaja, kra Jehojada, ndo mbiaʼa, ndo slagama te va 30, ndo mèshèlè, te verzi Kabtseel. A mbazl ta wudahi. Ariel te Moab cèw. Nengaʼa ba, aman pats ngiɗè iyam a ngakaɗai, a ndo a hi a hwaɗ thal, a nkeda marizhèlè.

²¹ Nengaʼa ba a nkeɗe ndo Egypte, ndo ngurèa. Ndo Egypte a tsakwal te rai, a nengaʼa a mdo a sam na a gaɗa, a nʼngezlama na tsakwa auda te rai, a nkeɗe ndo Egypte a vèvèɗ a tsakwal nengaʼa.

²² Skwi haha Benaja, kra Jehojada, a ngau, a ngu a ndo mbiaʼa te va ngul ndohi 30.

²³ A ta slubordo te va 30. Aman nʼnga lèmèlèmè ara tengahi makar asaɓai. David a mfu a ndo mɓer gèɗ bai.

²⁴ Te va ndohi 30: Asael, kramam Joab. Elchanan, kra Dodo, te Bethléhem.

²⁵ Shamma, te Harod, Elika, te Harod.

²⁶ Hélets, te Péleth. Ira, kra Ikkesh, te Tekoa.

²⁷ Abiézer, te Anathoth. Mehunnai, te Husha.

²⁸ Tsalmon, te Achoach. Maharai, te Nethopha.

²⁹ Héleb, kra Baana, te Nethopha. Ittai, kra Ribai, te Guibea, te verzi Benjamin.

³⁰ Benaja, te Pirathon. Hiddai, te Nchalé-Gaash.

³¹ Abi-Albon, te Aaraba. Azmaveth, te Barchum.

³² Eliahba, te Shaalbon. Bené-Jachen. Jonathan.

³³ Shamma te Harar. Achiam, kra Sharar, te Arar.

³⁴ Eliphéleth, kra Achasbai, kra ndo Maacath. Eliam, kra Achitophel, te Guilo.

³⁵ Hetsrai, te Carmel. Paarai, te Arab.

³⁶ Jigueal, kra Nathan, te Tsoba. Bani, te Gad.

³⁷ Tsélek, ndo Ammon. Naharai, te Beéroth, ndo nzuɓa na skwi var a Joab, kra Tseruja.

³⁸ Ira, te Jéther. Gareb, te Jét-her.

³⁹ Urie, ndo Heth. Tèlèba ta gi 37.