II Samuel 21 - Ma Zhiklè

Ndohi Gabaonites ta bazl ta ndohi Saul

¹ Te va man David bai, pats ngiɗè, mi a ngau, mvi makar mi a zhè pèc pècèk. Aman David a ntsu ri a Ndo nzi pèc pècèk, Ndo nzi pèc pècèk a ngaɗa: Mali nkeɗe ndo a zhè a géɗ ndohi gi Saul, a géɗ man ta bazl ta ndohi Gabaon.

² A bai a mbaha ta ndohi Gabaon, a ngaɗa ta. – Ta ngra ta ndohi Gabaon a va ndohi Israel ka ɓai, aman ta humde ta a va njèkèdi ndohi Amor. Saul a woya a ngedas ta, a géɗ man a ngu srak a géɗ Israel a Juda, ko ndohi Israel ta gaɗa ta ndohi Gabaon a mʼmbèɗè.

³ A David a ngaɗa ta ndohi Gabaon: I gakaɗa sam kinè mè? I da pela kinè gèɗ a mè, a kin pshè na ma skwi Ndo nzi pèc pècèk?

⁴ Ndohi Gabaon ta mbeda na a ma: Mbèzl va te va nga a ndohi gi Saul a pilè a verzhègenè a guro azɓai. Nga slaha nga kédè ndo Israel, ko staɗ, azɓai. David a ngaɗa: Kin woy aman i ga kinè mè?

⁵ Ta gaɗa na bai: Te va wudahi ndo sa, man a nhéra nga gèɗ a va, a woya a ngedas nga, a woy a nga nzi te kokwar Israel tèlèba azɓai,

⁶ nga jhèdè tsaraɗ, a nga man ta a wof a sam Ndo nzi pèc pècèk, te Guibéa, a géɗ za Ndo nzi pèc pècèk. Bai a gaɗa: I da pa kinè.

⁷ Aman bai a mva ta Mephibosheth, kra Jonathan, kra Saul, ɓai, a géɗ ma mʼmbèdè man David a Jonathan, kra Saul, ta mbada a sam Ndo nzi pèc pècèk.

⁸ Aman wudahi cèw man Ritspa, dem Ajja, a nya na Saul: Armon a Mephibosheth, a wudahi zlam man Mérab, dem Saul, a nya na Adriel te Mehola, kra Barsillai, David a mhel ta,

⁹ a mpe ta a ri ndohi Gabaon. Tengaʼa ta man ta a wof a géɗ za a sam Ndo nzi pèc pècèk. A ta bazl ta tsaraɗ tèlèba a sam staɗ. Ta bazl ta, te va man ta tsi dau.

¹⁰ Ritspa, dem Ajja, a nco maslaka kuɗa, a mwuzhda a gèɗ kwa, a mʼmana a pa, te va man ta tsi dau, ha ndè a via, a mɓer ta ndohi mʼmetsaʼa te ri ɗiakihai tʼhwaɗ gidfèk a skwi dak a vaɗ.

¹¹ Aman ta ngra na skwi man Ritspa, dem Ajja, ngwoz Saul, a ngau, a David,

¹² David a mdo, a ndzhoɗo vatasl Saul a Jonathan, kra nengaʼa, te ri ndohi Jabès te Galaad, man ta heldama a metsar a dal kokwar Beth-Shan, a sam man ndohi Philistie ta zlatsede ta a pa a pats man ta keɗe Saul te Guilboa.

¹³ A ncko vatasl Saul a Jonathan, kra nengaʼa, te pa. A ta ɓic ta vataslihai ndohi man ta man ta a wof,

¹⁴ a ta peda a nda vatasl Saul a Jonathan, kra na, a kokwar Benjamin, te Tséla, a gi dzavi Kis, bab Saul. Ta gu tèlèba ara man bai a njè ta a gèɗ. A Zhiklè a mva ta pombai a kokwar zaʼa.

Var ndohi Philistie

¹⁵ Te deɓaʼa ndohi Philistie ta gu var zaʼa a nda ndohi Israel. David a ndo a nda ɓèlèlihi nengaʼa, a ta nza te kokwar Gob, a ta gu var a nda ndohi Philistie. David a ngeza. A Jishbi-Benob a nslambaɗa,

¹⁶ staɗ te va ndohi ngur-gurèʼa. Tsakwal nengaʼa, nʼnjèl nengaʼa a gi kilo makar; kafahi gwèsh mɓuaʼa, mʼmana te zlazlar. A hur a ngaɗa: i da keɗa David.

¹⁷ Abishai, kra Tseruja, a mshkè a ntakaha David, a nkeɗe ndo Philistie. A pats nasa ndohi ta gaɗa na David: Kam kam, ko do var a verzi nga asaɓai; skwi nhél sam Israel da mbatsa ɓai!

¹⁸ A ta gu var zaʼa a ma kokwar Gob a nda ndohi Philistie. Sibbecai, ndo Hushat, a nkeda Saph, staɗ te va ndohi ngur-gurèa.

¹⁹ A ta gu var te Gob a ndohi Philistie zaʼa. Elchanan, kra Jaaré-Oreguim, te Bethléhem, a nkeda Goliath te Gath, tsakwal Goliath nara wof nciɓè.

²⁰ A ta gu var zaʼa, a ma kokwar Gath. Ndo ngurèa a zhè, wud ri nengaʼa 6 wud sak nengaʼa 6, a gi tèlèba 24. Nengaʼa ba te va ndohi ngur-gurèa.

²¹ Aman a nderɗe ta ndohi Israel, Jonathan, kra Shimei, kramam David, a nkeɗaʼa.

²² Ndohi fad haha, te va ndohi ngur-gurèa te kokwar Gath, a David a ndohi nengaʼa ta bazl ta.