II Samuel 20 - Ma Zhiklè

Rubi Shéba

¹ Fali ndo ngiɗè a zhè, a pa, nzlembaɗ na Shéba, kra Bicri, ndo Benjamin. Nengaʼa a ntsu tolom, a mboho: Skwi nga az a sam David ɓai! Nʼndi gi nga az a sam kra Isai ɓai! Israel, ndo staɗ staɗ tèlèba da nza a gi na!

² A ndohi Israel tèlèba ta jèkeda David, a ta gsa va a Shéba, kra Bicri. Aman ndohi Juda ta nza a sam bi ta, a hinè te woyam Jourdain, ha ndè Jérusalem.

³ Aman David a mshkè a kokwar Jérusalem, a gi na, a mhul ngwozi man a jèke ta a pa a ta ɓir ntamagi na, a mpe ta a gai a géɗ ta, a mva ta skwi nʼndai, aman a ngs ta a va a ngwozi asaɓai; a mpizl ta ma a pa, ha pats man ta bazl ta. Ta nza lèmèlèmè ara ngwozi mazihai, ko nshèffè baki ta a zhè dai.

⁴ Bai a ngaɗa na Amasa: Ɓicka ta ndohi Juda! Anvakastaɗ kinè a zhè a haha!

⁵ Amasa a mdo, a mɓicka ta ndohi Juda. Aman a ngoko ndudoh, a mshkè te mpèsl ri ɓai,

⁶ David a ngaɗa na Abishai: Shéba a da ga nga matakwan holholaʼa, a fena Absalom. Hul ɓèlèlihi bi ngaya, hau a verzi ta, aman a slaha a nduma kokwar a mbel na te ri nga ɓai.

⁷ A Joab a ndohi Kéreth a Péleth a ngul ndohi tèlèba to do var a verzi Abishai. Ta slambaɗa te kokwar Jérusalem, to do a ta gi var, a ta hi a verzi Shéba, kra Bicri.

⁸ Aman ta ndikè a sam kwa mbiaʼa te Gabaon, Amasa a zhè ma. Joab, a tsakwal nciɓa te giaʼa, te zlazlar, tʼhwaɗ maslaka nengaʼa; nshkè na, a tsakwal a nkal na hai.

⁹ Joab a ngaɗa na Amasa: Kramam ga, ka nza genè de? A Joab a ngso bozozom Amasa a ri mandai, ara man a surɓama na dai.

¹⁰ Amasa a nrka tsakwal te ri Joab ɓai. A Joab a nteza a hwaɗ, a vayats a mshkè auda, a nwush na hi a herkeda, a mʼmets na. A ntuzo staɗ genè. A Joab a Abishai, kramam nengaʼa, ta hu a verzi Shéba, kra Bicri.

¹¹ Ta gaɗa na ɓèl Joab staɗ, aman a zlècè a tsagi Amasa, a bèhè: Ndo man ndo Joab, a ndo man ndo David, a verzi Joab!

¹² Amasa mʼmana te va Pombaz nengaʼa te ndev civèɗ, mʼmetsa. Aman ɓèl sa a nrkaʼa, ndohi tèlèba ta zlatsa a pa, a nco Amasa auda a civèɗ, a nkalda a zlawa, a mva na maslaka a gèɗ. A géɗ man ndo staɗ staɗ mana mshkè a pa, a zlècèhi a mpi diaʼa.

¹³ Aman ta ca na auda a civèɗ ma, ndohi tèlèba ta dzodzor Joab, a ta hi a verzi Shéba, kra Bicri.

¹⁴ Joab a mhu a ndev ndohi verzi Israel tèlèba, ha nde Abel-Beth-Maaca. Ngul ndohi tèlèba ta ɓica va a ta dzodzora.

¹⁵ Aman Joab a ndohi nengaʼa ta shke a ta pi va a kokwar Abel-Beth-Maaca, ta ngalka ta kokwar a pa a zlazlar. A ndohi tèlèba man ta zhè a sam Joab, ta zlüno zlazlar a ta woy a ta mbeɗdaussa.

¹⁶ A ngwoz ngiɗè, man maya na zhè, a nzlatsa a zlazlar a ntamagai, a mboho te kokwar: Va-tsenaʼa, va-tsenaʼa! Va-gaɗa na Joab, da shkè, i woy a i gaɗa na ma kètè!

¹⁷ Aman a mshkè a sam na, ngwoz a ndzhoɗo: Ka Joab dè? nengaʼa a ngaɗa: I nengaʼa A ngaɗa na: Tsena ma ɓèl ngaya! A nengaʼa a mʼmbeɗa na a ma: I tsenaʼa.

¹⁸ Nengaʼa a ngaɗa: Zlèzlèa ta gaɗa: Sèi da dzhoɗ Abel.

¹⁹ Skwi man ndohi Israel nlèɓèslèa ta goɗa, ta gi antanta azɓi dè? Ka woy a ka gedassa kokwar man ta cüzlko va te pa dè? Ka gedassa nʼndi gi bi èhèmè?

²⁰ Joab a ngaɗa: Aʼai, aʼai! I woy a i gédèshè azɓai, i woy a i ndivdè azɓai.

²¹ I hur arsa ɓai. Aman ndo staɗ, te za Ephraim, nzlembaɗ na Shéba, kra Bicri, a nslambaɗa na va a bi David. Va-ckoɗi nengaʼa genè, i woy a i jèkeda kokwar. A ngwoz a ngaɗa na Joab: Na haha, nga da kalda ka gèdèʼa auda a daɓagai.

²² A ngwoz a ndo a kokwar, a njè ta ndohi tèlèba a maya na. A ta nguzlkoɗi gèɗ a Shéba, kra Bicri, a ta kalda na Joab. A nengaʼa a ntsu tolom, a ta jèkeda kokwar, a ta venda gèɗ ta, staɗ staɗ a gi na. Joab a mʼmen na a deɓa a kokwar Jérusalem a sam bai.

Bihi soje David

²³ Joab, bi sojè ndohi var tèlèba. Benaja, kra Jehojada, tsuvom ndohi Kéreth a Pé-leth.

²⁴ Adoram, tsuvom ndohi mizlinè. Josaphat, kra Achilud, ndo mɓer sulai.

²⁵ Sheja, ndo mwindè ɗèlèwèr. Tsadok a Abiathar, ndohi mvi skwi a Zhiklè.

²⁶ Ira te Jair, slaslam David.