II Samuel 19 - Ma Zhiklè

Joab a ngatsa na maya a David

¹ Ndohi ngiɗè ta ngra na Joab: Na haha, bai a kuɗai, a lèyè Absalom.

² A pats nasa, mwuffè ngul ndohi tèlèba a nʼngwoda na a nkudi ndohai. Aman a pats nasa ndohi ta tsenaʼa: bai a kuɗi a géɗ kra na.

³ Ndohi tèlèba ta wuc ta a kokwar a metsar, ara man ta hu ta a ma var, ta wuc ta a hori a dai.

⁴ Bai a nʼngheda di na a maslaka, a tsi lalau: Kra ga, Absalom! Absalom, kra ga, kra ga!

⁵ A Joab a ndo a gi a sam bai, a ngaɗa: Ka pa ta hori a di a bèlèlihi ngaya, man ta mbel ta nshèffè a wudahi a dalahi ngaya, a ngwozi ngaya, a patsna.

⁶ Ka woy ndohi man ta gi shèwa a ka, a ka gi shèwa a tengaʼa man ta woy ka. A patsna ka ngreda nga, ara man bihi sojè bèlèlihi ngaya, skwi ambali a sam ngaya. Halau, anai i suna: sèi Absalom a zhè a nshèffè dai, a gi ambaha ka te ndav ngaya, ko nga ndohi ngaya tèlèba nga bazl nga a patsna.

⁷ Anai slambaɗa, do auda, tsu tsaval amba amba a bèlèlihi ngaya. Aman i mbada a sam Ndo nzi pèc pècèk: aman ka dè auda azɓai, ndo a nzi a sam ngaya a patsna a vaɗ haha azɓai, ko staɗ. Te deɓaʼa skwi haha a gi mwuɗitpa holholaʼa a sam ngaya, a fena matakwan ngiɗè tèlèba man ka su daga man ka gola.

Gumi te ndev Juda a David

⁸ Bai a nslambaɗa, a nʼnzahi a ntamagai. Ta ngra ta ndohi tèlèba: Na haha, bai a nzi a ntamagai. A ndohi tèlèba ta shkè a sam bai. Te deɓ man ndohi Israel ta hu ta ma, staɗ staɗ a gi na,

⁹ ndohi verzi Israel tèlèba ta gu ma a va ta, a ta gaɗa: Bi David a mʼmbel nga te ri mayamhi nga. Nengaʼa man a mpreka nga auda te ri ndohi Philistie. Te deɓaʼa a mhu na a Absalom, a njèkeda kokwar.

¹⁰ Aman antanta, Absalom, man nga faɗa na mbar a gèɗ a nga fu a bi nga, ta keɗa te var; kin gi ndudoh èhèmè, kin ckoɗi bi David a deɓa a ngwi bi èhèmè?

¹¹ Aman bi David a ntsena man ta gèɗè te Israel, a mzlinda ta Tsadok a Abiathar, ndohi mvi skwi a Zhiklè, a ngaɗa ta: Va-gaɗa ta ndohi Juda nhalaʼa, va-dzhaɗ ta: Kin woy a kin nzi a dèɓa, a kin ckoɗi bi a deɓa a gi na tsam tsam azɓi èhèmè?

¹² Kinè, kramamhi ga, vatasl nga, zluèɗ va nga, na stadgenè. Kin woy a kin nzi a deɓa a kin ckoɗi bi a deɓa a ngwi tsam tsam azɓi èhèmè?

¹³ Va-gaɗa na Amasa ba: Vatasl nga, zluèɗ va nga, na stadgenè ka bi dè? Zhiklè da gay skwi ambaɓiaʼa, aman ka gi a bi sojè ga azɓai a mèdèp te di man a Joab.

¹⁴ A ndohi Juda tèlèba ta ngwodko gèɗ ta a sam bai, a ta gaɗa na bai a ndav staɗ: Washkè a deɓa, kinè a bèlèlihi ngaya tèlèba!

¹⁵ A bai a mshkè a deɓa. Aman a ndikè a ma woyam Jourdain, ndohi ta shkè te Juda, te Guilgal, a ta lamaha bai, a ta fedkona ma a wud woyam Jourdain.

¹⁶ Shimei ba, ndo Benjamin, kra Guéra, te Bachurim, a nhaka na a ma bai a nda ndohi Juda, aman ta zli gèɗ a bai.

¹⁷ Ndohi 1.000 te Benjamin a nda nengaʼa. Tsiba, ɓèl ndohi gi Saul, ta haka na ma a bai a wudahi nengaʼa 15, a bèlèlihi nengaʼa 20, a ma woyam Jourdain.

¹⁸ A ta ngots wurom, a ta de ta ndohi gi bai a wud woyam, a ta gi skwi ara man bai a woyaʼa. Shimei, kra Guéra, a nkalahi a deɓ sak bai, ga bai a ntawaɗa woyam Jourdain,

¹⁹ a ngaɗa na bai: Bi ga da fay mali a gèɗ ɓai, da hur mali ga ɓai man iyè, ɓèl ngaya, a ngau a pats man bai, bi ga, a njèkeda kokwar Jé-rusalem. Bai da hur nengaʼa te ndav na ɓai!

²⁰ Ɓèl ngaya a suna, a ngau malai. Aman a patsna i shkè, i nshèlèkuraʼa te gi Joseph, a i lamaha bai, bi ga.

²¹ Abishai, kra Tseruja, a ngaɗa: Sèi da keɗa Shimei ɓi ɗè, a géɗ man a derde ndo man Ndo nzi pèc pècèk a mbada na mbar a gèɗ.

²² Aman David a ngaɗa: Nga gakaɗa a nda kinè mè, wudahi Tseruja? Kin piyè a wi èhèmè a patsna? A patsna ta kédè ndo azɓai te Israel. I suna, a patsna i bai a géɗ Israel.

²³ A bai a ngaɗa na Shimei: I keɗe ka azɓai. A mʼmbaɗa na.

Mephibosheth a Barzillai ta ga na mbalai a David

²⁴ Mephibosheth, kra Saul ba, a mshke, aman a nlamaha bai. Skwa a te sak ɓai, bozozom ntil ɓai, maslaka mpan ɓai, a hün te pats man bai a njèkeda kokwar, ha pats man a mshkè ngwi amba amba.

²⁵ Aman a mshkè te Jérusalem, a nda zli gèɗ a bai, bai a ngaɗa na: Mephibosheth, ka shkè a verzi ga bi èhèmè?

²⁶ Nengaʼa a mʼmbeɗa na a ma: Bai, bi ga, ɓèl ga a ngwodyè. Aman i gaɗa na ɓèl ga: Feda skwi a deɓ kɗèh, i woy a i nzi a pa a i dè a verzi bai – i vedal.

²⁷ Aman nenga a a nʼngelay ma a va, bi ga. Aman maya bi ga a zhè ara maya gol Zhiklè. Gar haha gau ara man ambaha ka.

²⁸ Aman ndohi gi bab ga tèlèba sèi nga zhèr mʼmetsi te ri bai, bi ga, a ka fiyè a va ndohi ngaya, aman i ndi skwi a sam ngaya genè. I slaha a i jhèɗè a vaʼa mè?

²⁹ Bai a ngaɗa na: Ma mè? Iyè i gèdèʼa. Kinè a Tsiba, sèi kin kezli skwai!

³⁰ Mephibosheth a ngaɗa na bai: Do co tèlèba! Aman bai a mshkè ngwi amba ar haha, dèhayè.

³¹ Barsillai, ndo Galaad ba, a mshkè te Roglim, a ndo a ma woyam Jourdain a nda nengaʼa, a nda ga na mbalai a ma woyam Jourdain.

³² Barsillai nhala kumba, mvi nengaʼa 80. A mva na skwi nʼndi a bai, te va man a nza te kokwar Mahanaim, te man nengaʼa ndo mèshèlè.

³³ Bai a ngaɗa na Barsillai: Sèi ka shkè a verzi ga! A sam ga te kokwar Jérusalem i woy a i va ka skwi nʼndai, te man ka hala ma.

³⁴ Barsillai a mʼmbeɗa na a ma bai: I da nzi a nshèffè tèkè, a i dè a verzi bai a kokwar Jérusalem?

³⁵ Mvi ga 80 ma. I slaha a i pèr skwi mpèrè asaɓai. I tèr skwai – a jén, a jèn ɓai, i sun ɓai. Aman golahi a dalahi ta sli dimèsh, i tsena zlembaɗ asaɓai. I rzla na va a gèɗ a bi èhèmè?

³⁶ I takaha bi ga kèshkata genè. Bai a woya a mvay skwi a deɓa a vata èhèmè?

³⁷ Va na civèɗ a ɓèl ngaya, a ndè a deɓa a ngwai; a i metsi ga te kokwar ga, a sam gi dzavi bab ga a mam ga. Aman Kimham, ɓèl ngaya haha, do do a verzi bai, bi ga. Gau a sam na, ara man ambaha ka.

³⁸ Bai a ngaɗa: Aman aranta, Kimham do do a verzi ga. I woy a i gi a sam na, ara man ambaha ka, a skwi tèlèba man ka jhèdè te ri ga, i woy a i va ka.

³⁹ A ndohi tèlèba ta tawaɗa woyam Jourdain, aman bai a nzlatsa a pa. A bai a nsurɓama na dai a Barsillai, a mpshè na ma. A nengaʼa a mdo a deɓa a kokwar na.

⁴⁰ Te deɓaʼa bai a mdo a ma, a mʼmen na a deɓa a kokwar Guilgal, a Kimham a nda nengaʼa. Ndohi Juda tèlèba to do a verzi bai, a ndohi Israel rètaʼa.

Ndohi Israel ta verslè zaʼa

⁴¹ Ndohi Israel ta shkè tèlèba a sam bi tsam tsam, a ta gaɗa na: Ndohi Juda, kramamhi nga, ta ce ka, a ta da bai a ndohi gi nengaʼa a wud woyam Jourdain, a ndohi nengaʼa tèlèba a nda nengaʼa, èhèmè?

⁴² Ndohi Juda tèlèba ta gaɗa ta ndohi Israel: A gèɗ man bai, verzi nga. Kin gi ndav aranta èhèmè? Nga ndedama dè, nga cèma na bi dè?

⁴³ Aman ndohi Israel ta mbeɗa ta a ma a ndohi Juda: Nga hér bi a fena man kin hérèʼa, a gi sak 10, 10. Nga tsuvomhi a géɗ kinè. Kin kwol nga èhèmè? Nga goɗ nshèlèkuraʼa ka ɓi de, nga da cko bi nga a deɓa a ngwai. Aman ndohi Juda ta versl ma holholaʼa, ta fena ndohi Israel man ta gèdèʼa.