II Samuel 17 - Ma Zhiklè

¹ Te deɓaʼa Achitophel a ngaɗa na Absalom: I woy a i par ta ndohi 12.000, a i dè a nga hi a verzi David a vaɗ haha.

² A nga da kala na va, te va man ntulè a keɗaʼa, a ndav nengaʼa mʼmbeɗa dai. Aman i da pa na zlau a gèɗ arsa, ndohi man ta zhè a sam na tèlèba, ta da hi ta, a i slaha a i kédè bai man na pa a géɗ na.

³ Te deɓaʼa i woy a i helka ta ndohi tèlèba a deɓa a sam ngaya, ara man ta cko bidali ngwoz a deɓa a sam baki na. A woy ka zede nshèffè ndo stadgenè, a ndohi tèlèba ta nzai ta.

⁴ Ma haha ambaha Absalom a ndohi Israel nhalaʼa.

⁵ Aman Absalom a ngaɗa: Va-baha na Hushai, ndo Arki, dai, aman nga tsena ma nengaʼa ba.

⁶ Aman Hushai a mshkè a sam Absalom, Absalom a ngaɗa na: Achitophel a ngaɗayè, aman i gi kata kata. Amba aman nga gi ara man a goɗ dè? Man ɓai, goɗ ar ka!

Hushai a ngatsa na maya a Absalom

⁷ Hushai a ngaɗa na Absalom: Ma man Achitophel a ngreda kinè a patsna, ambaɓai.

⁸ A Hushai a goɗ a vaʼa: Ka suna, bab ngaya a ndohi nengaʼa, ngul ndohai; ndav tengaʼa a mbeɗè azɓai, ara marizhèlè te dak man ta cèma na kra na. Bab ngaya, ndo var, nengaʼa a ndohi nengaʼa ta shèk va a vaɗ azɓai.

⁹ Ko antanta ba, gar na zhè a nʼngheda va te slrats, man ɓai a sam ngiɗè. Aman David a da bèzlè ndohi ngiɗè kètè, a ndohi ta tsenaʼa, ta da gaɗa: ndohi David ta fen ta ndohi man a verzi Absalom.

¹⁰ Te deɓaʼa ko ndo slagama holholaʼa, man a gi zlau azɓai ara marizhèlè, ndav nengaʼa a mbedè. Aman ndohi Israel tèlèba ta suna, bab ngaya ndo ngul skwai, ndohi nengaʼa ndohi slagama.

¹¹ Aranta ka, bai, i gaɗa ka: Ndohi Israel tèlèba, a hinè te Dan, ha Beer-Shéba, da ɓica va a verzi ngaya, ara dzarai; ka ba ka dè var a nda tengaʼa.

¹² Aman nga zli gèɗ a vna a sam man nga ngècèʼa a pa, nga woy a nga kala na va, ara minmèn man a wushahai a herkeda, a nengaʼa a ndohi nengaʼa tèlèba, ko staɗ, nga jèkeda azɓai.

¹³ Aman nda hu a kokwar ngiɗè, ndohi Israel tèìè-ba da duma a kwa, nga ndedahi tohtohaʼa.

¹⁴ Absalom a ndohi Israel tèlèba ta gaɗa: Ma Hushai, ndo Arki, a fena man a Achitophel. Ndo nzi pèc pècèk a ngau, aman ma Achitophel, man maya te pa, a nkalahai. A woya a ngedassa Absalom.

Ta menda na ma a David

¹⁵ Te debaʼa Hushai a ngaɗa ta Tsadok a Abiathar, ndohi mvi skwi a Zhiklè: Achitophel a nʼngra na Absalom, a ndohi Israel nhalaʼa, kata kata. Aman iyè, i ngra ta kata kata.

¹⁶ Gar haha va-zlündo ndo a sam David tsam tsam, a kin gaɗa na: A vaɗ kin nza a hèshèkèɗ ɓai. Va-tawaɗa woyam Jourdain, man ɓai kinè a ndohi ngaya tèlèba ta da bazl kinè.

¹⁷ Jonathan a Achimaats ta zlatsa a ma thal. Pats ngiɗè ngiɗè dem mizlinè ngiɗè a dè, a da hada ta ma man ta gèɗè te gi bai. Te deɓaʼa to do a ta menda na bi David. Ta slaha ta dè a kokwar a di ndo azɓai.

¹⁸ Aman gol ngiɗè a nrka ta, a nda ngra na Absalom. A ndohi sa to do tsam tsam, a ta shkè a gi ndo ngiɗè te Bachurim. Thal iyam te ngwi nengaʼa. A ta sulomkaɗa pa.

¹⁹ A ngwoz a nco huba, a mpizlè thal iyam, a nwuzheda dau a géɗèʼa, ndo ngiɗè a senaha ɓai.

²⁰ Aman ɓèlèlihi Absalom ta shkè a sam ngwoz a gai, ta dzhoɗo: Achimaats a Jonathan, ta tema? Ngwoz a ngaɗa ta: Ta slambaɗa a haha a to do a ma woyam Jourdain. A to do a ta woy ta. Aman ta ngats ta ɓai, ta men ta a deɓa a kokwar Jèrusalem.

²¹ Aman to do ta ma, Achimaats a Jonathan ta shkè auda te thal iyam, a to do, a ta menda na bi David, a ta gaɗa na: Va-slambaɗa! Va-tawaɗa woyam tsam tsam; aman Achitophel a ngod kata kata a géɗ kinè!

²² David a ndohi nengaʼa tèlèba ta slambaɗa, a ta tawaɗa woyam Jourdain. Aman sam nciɗaha ta, tèlèba ta zhè, te wud woyam Jourdain. Ndo man a ze na ba, azɓai.

Achitophel a keɗa va na

²³ Aman Achitophel a nrka, ta gu ara ma nengaʼa ɓai, a mfeda skwi a deɓ kɗèh, a nslambaɗa, a mdo a deɓa a kokwar na, a njè ta ma a ndohi gi na. Te deɓaʼa a mʼmanda teɓa a daʼai na, a mʼmets na. A ta feda a gi dzavi bab na.

David a fena Absalom

²⁴ David a ndohi na ta shkè a kokwar Mahanaim. Aman Absalom a ndohi Israel tèlèba ta tawaɗa Jourdain.

²⁵ Absalom a mfeda Amasa a bi sojè ndohi var te di man a Joab. Amasa, kra ndo Israel, nzlembaɗ na Jithra, aman a nza a Abigail, dem Nachash, demam Tseruja, mam Joab.

²⁶ Absalom a ndohi Israel tèlèba ta nza te kokwar Galaad.

²⁷ Aman David a mshkè a kokwar Mahanaim, Shobi, kra Nachash, te Rabba, te verzi ndohi Ammon; Makir, kra Amiel, te Lodebar; Barsillai, ndo Galaad, te Roguelim,

²⁸ ta hulkoɗi sam mʼmènè a borkwa, a kokwi a shiɗèf, a dau a marorai a gufa a dau nsulaʼa, a dia a menda,

²⁹ vongwom a wa, a tambakihi a mbar wa, a ta hulkoda a sam David, aman nengaʼa a ndohi nengaʼa ta ndiaʼa. Ta hur: ndohi ta shkè tʼhèshèkèɗ, mi a keɗ ta, ta ngeza, iyam a dza ta.