II Samuel 16 - Ma Zhiklè

David a Tsiba

¹ Aman David a nteva a géɗ za, a mdo a hi kètè ma, na haha Tsiba, ɓèl Mephibosheth, a mshkè a kdèhihi cèw, movar 200, wondar ngworaʼa, nyi wof dezgal-dezgal 100, a duzlak barassa a deɓa,

² Bai a ngaɗa na Tsiba: Ka gia ke? Tsiba a ngaɗa: Kɗèhihai, aman ndohi bai ta nzi a deɓaʼa; movar a nyi wof, aman ɓèlèlihi ta ndiaʼa; barassa, aman ndohi man ntulè a keɗ ta tʼhèshèkèɗ ta siaʼa.

³ Bai a ngaɗa: Mephibosheth, kra Saul, bi ngaya, tema? Tsiba a mʼmbeɗa na a ma bai: A nza te kokwar Jérusalem, a ngaɗa: a patsna ndohi Israel ta vay kokwar bi bab ga a deɓa.

⁴ Bai a ngaɗa na Tsiba: Aman ar haha, skwi Mephibosheth tèlèba, a ngaya! Tsiba a ngaɗa: I kalahai a deɓ sak ngaya! I da ngots pombai a sam ngaya a ma ma, bai, bi ga!

Shimei a dérɗè David

⁵ Aman bi David a ndikè Bachurim, na haha ndo ngiɗè te verzi Saul a mshkè, nzlembaɗ na Shimei, kra Guéra. A ndurɗo ndo,

⁶ a nkola David a kwa, a ɓèlèlihi bi David tèlèba, ko ngul ndohai, ndohi tèlèba man to do a tsagi nengaʼa, ngiɗè te civèɗ ri mandai, ngiɗè te civèɗ ri gula.

⁷ Shimei a ndurɗo David aranta: Do ngaya! Do ngaya! Ka ndo mbèzl ndohai! Ka ndo falai!

⁸ Ndo nzi pèc pècèk a jhèdè nshèffè ndohi gi Saul man ka bazl ta, tèlèba a deɓa te ri ngaya! Ka gu bi te di man a nengaʼa. Zhiklè a mva na kokwar-bi a Absalom, kra ngaya. Na haha, ka gedassa, a géɗ man ka ndo mbèzlè ndo!

⁹ Abishai, kra Tseruja, a ngaɗa na bai: Kda ambali haha a dérɗe bai, bi ga, ambalai èhèmè? I woy a i dè a i ngelama na gèɗ.

¹⁰ Aman bai a ngaɗa: kine wudahi Tseruja, nga gakaɗa a nda kine mè? Da durɗo gene! man Ndo nzi pèc pècèk a ngaɗa na: durɗo David! a slaha a ngèdè: a gu arsa èhèmè, wa?

¹¹ A David a ngaɗa na Abishai a ɓèlèlihi nengaʼa tèlèba: Na haha, kra hwaɗ ga a woy a nzede nshèffè ga; holholaʼa ndo Benjamin haha! Va-jè-keda, da durɗo! Ndo nzi pèc pècèk a ngaɗa na.

¹² Gar Ndo nzi pèc pècèk a da rka nlèyè ga, a da vay pombai a géɗ man a nderdyè a patsna.

¹³ A David a ndohi nengaʼa to do a ma ma, a Shimei a ndo a der za a tsagi nengaʼa, a dérɗè genè, a kèlè a kwa genè, a wushè a herkeda.

¹⁴ A bai a ndohi nengaʼa man ta zhè a sam na, ta ndikè a ma woyam Jourdain. Ntulè nkeɗ ta, a ta shék va a pa.

Achitophel a ngatsa na maya a Absalom

¹⁵ Aman Absalom a ndohi Israel tèlèba ta shkè a kokwar Jèrusalem. Achitophel ba a zhè a sam na.

¹⁶ Aman Hushai, ndo Arki, mandal David, a mshkè a sam Absalom, a ngaɗa na: Bai, Zhiklè da jèka ka nshèffè ngaya! Zhiklè da jèka ka nshèffè ngaya!

¹⁷ Absalom a ngaɗa na Hushai: Aranta man ka woy mandal ngaya ɗè? Ko do a verzi mandal ngaya bi èhèmè?

¹⁸ Hushai, a mʼmbeɗa na a ma Absalom: Aʼai, sèi nengaʼa man Ndo nzi pèc pècèk a mfeda a bai, man ndohi nengaʼa a ndohi Israel tèlèba ta feda a bai, a i nzi a sam nengaʼa.

¹⁹ I da gi mizlinè ngè? A kra bi ga ka bi dè? Ara man i gu mizlinè a sam bab ngaya, lèmèlèmè i woy a i gi a sam ngaya ba.

Absalom a ngwozi David

²⁰ Absalom a ngaɗa na Achitophel: Ngatsay maya dai, nga da gi mè?

²¹ Achitophel a mʼmbeɗa na a ma Absalom: Do a ka mana a ngwozi bab ngaya, man a njè-ka ta a ta ɓer ntamagi na. A ndohi Israel tèlèba ta suna, kinè a bab ngaya, kin mba a va ɓai. A ndohi tèlèba man ta zhè a verzi ngaya ta gi zlau azɓai.

²² A ta tila na sam mʼmènè Absalom a géɗ gai, a nengaʼa a mdo a mʼmana a ngwozi bab nengaʼa a di ndohi Israel tèlèba.

²³ Aman te va nasa ta dzhoɗo skwi a sam Achitophel, a nengaʼa a nʼngatsa ta maya, ta co lèmèlèmè ara man Zhi klè a gaɗa ta. A gu arsa a sam David a Absalom ba.