II Samuel 15 - Ma Zhiklè

Absalom a vhè ma a géɗ a David

¹ Te deɓaʼa Absalom a nsum kikai a plèshihai, a golahi 50 man ta feda na ma.

² A prèk a prèk a nzlatsa a civèɗ a ntamagai. Ko wawa man ma nengaʼa a zhè, a woya a ndè a sam bai aman a ga na kita, Absalom a baha na, a ngaɗa: Ka shkè te kokwar mè? Aman a gaɗa: Ɓèl ngaya a shkè te verzi Israel kata kata –

³ Absalom a gaɗa na: Na haha, ma ngaya amba, nzuraʼa. Aman bai a da ga ka kita azɓai.

⁴ Aman agassa iyè ndo kita te kokwar, ar ndo staɗ staɗ tèlèba man ma nengaʼa a zhè, man kita nengaʼa a zhè, a shkè a sam ga; ar i ga na kita na.

⁵ Aman ndo ngiɗè a nherda na va, a ngurɓahi a sam na, Absalom a ngeda ri na, a ngso ri na, a nga na mbalai.

⁶ Absalom a gu arsa a sam ndohi Israel tèlèba man ta woy a ta dè a sam bai, aman a ga ta kita. Absalom a mbid ta ndohi Israel a ma.

⁷ Te deɓaʼa, te deɓ mvi fad, Absalom a ngaɗa na bai: Vay civèɗ a i dè a kokwar Hebron, a i gi ara man i gaɗa na hi a Ndo nzi pèc pècèk.

⁸ Te va man i zhè te kokwar Gueshur, te Syrie, i gaɗda ma a hai: Aman Ndo nzi pèc pècèk a da ckay a deɓa a kokwar Jérusalem, i woy a i va na skwi a Zhiklè te kokwar Hébron.

⁹ Bai a ngaɗa na: Do a gumai! A nengaʼa a nslambaɗa, a ndo Hébron.

¹⁰ Absalom a nzlinde ta ndohi nzebi kokwar Israel tèlèba, a ngaɗa ta: Aman ta da tsi tolom, vo-boho: Absalom bai te Hébron!

¹¹ Ndohi 200 man Absalom a mbaha ta te kokwar Jérusalem, to do a ta hur skwi ngiɗè ɓai, ta sun skwa ɓai, to do a verzi nengaʼa.

¹² Absalom a mbaha na Achitophel, ndo Guilo, ndo ncko na gèɗ auda a bi David. Nengaʼa a mshkè te kokwar Guilo, aman Absalom a vi skwi a Zhiklè. A ta vhè ma a géɗ a David holholaʼa, a ndohi man ta dzodzor Absalom ta shkè na va.

David a hi na

¹³ Ndo ngiɗè a mshkè, a nʼngra na David: ndohi Israel to do ta a va Absalom.

¹⁴ David a ngaɗa ta ndohi nengaʼa tèlèba man ta zhè a sam na te kokwar Jérusalem: Va-slambaɗa, ngo-hokoy nga! Man ɓai nga slaha nga mbel nga te ri Absalom azɓai. Vo-do tsam-tsam, man ɓai a da ngatsa nga a civèɗ, a gedas nga, a bazla ndohi kokwar a tsakwal.

¹⁵ Ndohi bai ta gaɗa na: Ara man bi a woyaʼa – nga ɓèlèlihi ngaya.

¹⁶ A bai a mdo auda te kokwar, a ndohi gi nengaʼa tèlèba a verzi nengaʼa. Bai a njèke ta ngwozi nengaʼa kula a deɓa, a ta ɓer ntamagi bai.

¹⁷ Aranta bai a mdo auda te kokwar, a ndohi tèlèba a verzi nengaʼa. A sam ndi-kèma gi tèlèba, ta zlatsa a pa.

¹⁸ Ndohi var nengaʼa tèlèba ta beza na a tsagi a bai. Ndohi Kéreth, ndohi Péleth. A ndohi Gath 600, man ta shkè te Gath, a ta dzodzora, ta beza na a tsagi a bai.

¹⁹ Bai a ngaɗa na Ittai te Gath: Ka ba ka woy a ka dè a verzi nga èhèmè? Men ngaya a deɓa, a ka nza a sam bi mɓuaʼa. Ka ndo mbrok, ndo man ta kwol ka te kokwar ngaya.

²⁰ Ka shkè tok-tok genè; a patsna i ce ka a i sawalda ka gèɗ, a i sun sam man i dè a pa ɓai. Men ngaya a deɓa a ngwai, a nda kramamhi ngaya. Ndo nzi pèc pècèk a da va ka pombai a gumai.

²¹ Ittai a mʼmbeɗa na a ma bai: Ara man Ndo nzi pèc pècèk a zhè, ara man bi ga a zhè, aʼai! A sam man bi ga a dè a pa, ko te mʼmetsai, ko te nshèffè, i ba i zhè.

²² David a ngaɗa na Mai: Amba, do a ma! A Mai te Gath a ndohi nengaʼa tèlèba, a skwi tengaʼa tèlèba, to do a ma.

²³ Ndohi kokwar tèlèba ta kuɗi a vata, a ndohi var tèlèba ta beza na a tsagi a bai. A bai a ntawaɗa woyam Cédron, a ndohi tèlèba ta beza na a tsagai, a ta gs civèɗ ndè hèshèkèɗ.

Tsadok a Abiathar ta da koti Zhiklè a deɓa a kokwar Jérusalem

²⁴ Na haha, Tsadok a Abiathar ba, a ndohi Lévi tèlèba, ta zhè. Ta zuɓ koti nderzlè-ma Zhiklè, a ta fedahi a samaʼa, ha ndohi kokwar tèlèba ta bezda auda a tsagiaʼa ma.

²⁵ Bai a ngaɗa na Tsadok: Da koti Zhiklè a deɓa a kokwar! Aman i da ngècè pombai a sam Ndo nzi pèc pècèk, a nda ckay a deɓa, a i da rka te gi nengaʼa zaʼa.

²⁶ Aman Ndo nzi pèc pècèk a gaɗa: ka ambahay ɓai – nana i zhè; da gau ara man a woyaʼa.

²⁷ Bai a ngaɗa na Tsadok, ndo mvi skwi a Zhiklè: Kinè a Abiathar, vo-do a deɓa a ngwi menè! Achimaats, kra ngaya, a Jonathan, kra Abiathar, wudahi kinè cèw, do do ta a deɓa a nda kinè.

²⁸ Na haha i nzi te hèshèkèɗ, ha kin zlündokoy ma kinè.

²⁹ A Tsadok a Abiathar ta da koti Zhiklè a deɓa a kokwar Jérusalem, a ta nza a pa.

David a Hushai

³⁰ David a nteva za oliviers, a kuɗai, a nʼngheda di a maslaka, kotokoroh a te sak ɓai. Ndohi tèlèba man ta zhè a sam na, to do za, ta ngheda di a maslaka, ta kuɗai.

³¹ A ta ngra na David: Achitophel ba te va ndohi Absalom, man ta vhè ka ma a gèɗ. David a ngaɗa: Ndo nzi pèc pècèk, gedassa skwi man Achitophel a woya a ngiaʼa.

³² Aman David a ndikè a gèɗ za, a sam man ta tsi ri a Zhiklè, Hushai, ndo Arki, a nhaka na ma, a maslaka nkuratsa a va, a herkeda te gèɗ.

³³ David a ngaɗa na: Aman ka da dè a verzi ga, ka pcedyè a hai.

³⁴ Sèi ka dè a deɓa a ngwai, a ka da gaɗa na Absalom: I woy a i gi a ɓèl ngaya, bi ga! Te va nasa, i ɓèl bab ngaya. Aman antanta i woy a i gi a ɓèl ngaya. Aranta ka slaha ka gedassa na skwi man Achitophel a woya a ngiaʼa.

³⁵ Te pa, Tsadok a Abiathar, ndohi mvi skwi a Zhiklè ba, ta zhè a sam ngaya. Skwi tèlèba man ka tsena te gi bai, sèi ka menda ta Tsadok a Abiathar, ndohi mvi skwi a Zhiklè.

³⁶ Achimaats, kra Tsadok, a Jonathan, kra Abiathar, wudahi tengaʼa cèw, ta zhè a sam ta. Tengaʼa ta slaha ta mendayè ma tèlèba man kin tsenaʼa.

³⁷ A Hushai, mandal David, a ndikè a kokwar, aman Absalom a mshkè a kokwar Jérusalem.