II Samuel 12 - Ma Zhiklè

Tsaval-ma Nathan

¹ Ndo nzi pèc pècèk a nzlündo Nathan, ndo nhadka ma a sam David. Aman a mshkè a gi a sam na, a ngaɗa na: Ndohi ngiɗè cèw ta zhè te kokwar staɗ. Ngidè ndo mèshèlè, ngiɗè ndo ntawassaʼa.

² Ndo mèshèlè a nʼngots tambakihi a zlèhi kumba kumba.

³ Ndo ntawassaʼa a nʼngatsa skwi ɓai, sèi kra tambak staɗgenè, man a nsuma, a ngrèʼa, a grè a sam na a nda wudahi nengaʼa. Ta ndau ɗaf a vna, ta sau iyam a vna, ta mana a sam staɗ, a nfu ara dem na.

⁴ Pats ngiɗè, ndo mbrok a mshkè a sam ndo mèshèlè. A nengaʼa a ngu ndrè, a woya a ncè tambak, man ɓai zlè, te va man a nengaʼa ɓai, aman a nta na mbrok man a shkè a sam na. A ndo cko man a ndo ntawassaʼa, a mva na ndo mbrok sa, man a shkè a sam na.

⁵ A ndav a ndza na David a vata a géɗ ndo sa, a ngaɗa na Nathan: Ara man Ndo nzi pèc pècèk a zhè: ndo man a ngau arsa, da mets na!

⁶ Sèi a pil kra tambak, a skwi fad, a géɗ man a ngau arsa, a géɗ man ndo a sia te va azɓai.

⁷ Nathan a ngaɗa na David: Ndoʼa, ka! Ndo nzi pèc pècèk, Zhiklè Israel, a goɗ aranta: Iyè, man i bada ka mbar a gèɗ, a i ge ka a bi Israel. Iyè man i mbel ka auda te ri Saul.

⁸ I va ka gi bi ngaya, a ngwozi bi ngaya aman ka mènè a tengaʼa. I va ka Israel a Juda; aman a slra ka ɓi ba, ar i woy a i va ka a vaʼa genè.

⁹ Ka kwola Ndo nzi pèc pècèk a ka gau skwi man ambaha ɓai èhèmè? Ka keɗa Urie, ndo Heth, a tsakwal, a ka ceda ngwoz nengaʼa a ma a ngwoz. Aman géɗ va nengaʼa ka keɗa a tsakwal ndohi Ammon.

¹⁰ Gar haha var da shkè auda a géɗ gi ngaya ɓi a mèdèp, a géɗ man ka kwolyè, a ka co ngwoz Urie, ndo Heth a ngwoz ngaya.

¹¹ Ndo nzi pèc pècèk a goɗ aranta: Na haha, i slambaɗda matakwan te gi ngaya, a i da hel ta ngwozi ngaya a ma a sam di ngaya, a i pa ta a ndohi ngiɗè, a tengaʼa ta mènè a sam ta, a di pats.

¹² Ka, ka gu skwi a metsar. Aman iyè, i da gi a sam di ndohi Israel tèlèba, a di pats.

¹³ David a ngaɗa na Nathan: I gau malai a sam Ndo nzi pèc pècèk. Nathan a mʼmbeɗa na a ma David: Gar haha Ndo nzi pèc pècèk a mpra ka malai. Ka metsi azɓai.

¹⁴ Aman a géɗ man ka durɗo Zhi-klè a skwi man ka gau a haha, kra ngaya man ngwoz sa a nya ka, a metsi na.

Nyi Salomon

¹⁵ Te deɓaʼa Nathan a mdo ngwai. A Ndo nzi pèc pècèk a nfaha skwi ndzi a kra man ngwoz Urie a nya na David.

¹⁶ David a ntsu ri a Zhiklè a géɗ kra, a njèkeda skwi nʼndai. Aman a mshkè ngwai, a nʼnza a vaɗ, a maslaka kuɗa a va, a mʼmana a herkeda.

¹⁷ A ndohi nhalaʼa te gi na ta shkè a sam na, ta bidèʼa, aman a slèmbèdè. Aman nengaʼa a woya ɓai, a nʼnda skwi a nda tengaʼa ɓai.

¹⁸ Te mʼmèn matsaradaʼa, kra a mʼmets na. Ɓèlèlihi David ta gi zlau aman ta ngra na mʼmetsi kra a David. Ta huro: aman kra a zhè a nshèffè dai, nga bidèʼa, a fi zlembaɗ a ma nga azɓai. A nga da gaɗa na: kra mʼmets na – a da keɗa va na.

¹⁹ Aman David a nrka, ɓèlèlihi nengaʼa ta goɗ a metsar, a suna, kra a mʼmets na. A ndzhaɗ ta ɓèlèlihi nengaʼa: Kra a mʼmets na ɗè? Ta mbeɗa na a ma: Halau, mʼmets na.

²⁰ David a nslambaɗa tʼherkeda, a mpana di na, a mfada mbar a va, a mfeda maslaka ngiɗè a va, a ndo a gi Ndo nzi pèc pècèk, aman a tsi rai. Aman a mshkè a deɓa a ngwai, a ndzhoɗo skwi nʼndai, a nʼndau.

²¹ Ɓèlèlihi nengaʼa ta gaɗa na: Ka ge haha mè? Aman kra a zhè a nshèffè dai, ka jèkeda skwi nʼndai, a ka kuɗai. Anai kra a mʼmets na ma, ka slèmbèdè a ka ndi skwi nʼndai, èhèmè?

²² David a mʼmbeɗa ta a ma: Aman kra a zhè a nshèffè dai, i jèkeda skwi nʼndai, i kuɗai, a i huro: Wa ngiɗè ba i si Ndo nzi pèc pècèk te va, a kra a da nzi a nshèffè.

²³ Aman anai kra a mʼmets na ma, i jèkeda skwi nʼndi èhèmè? I slaha a i ckoɗa deɓa ɗè? Pats ngiɗè i dè a géɗèʼa. Aman nengaʼa a shkè a deɓa a sam ga asaɓai.

²⁴ Aman David a mbidè Bath-Shéba, ngwoz nengaʼa, ma, a ndo a mʼmana a vna. A nengaʼa a nyu kra nguraʼa, a David a mbaha na Salomon. Ndo nzi pèc pècèk a woyaʼa a ndav na,

²⁵ a David a mva na a Nathan, ndo nhadka ma. Nengaʼa a mbaha na Jedidja, te man Ndo nzi pèc pècèk a woyaʼa.

David a duma Rabba

²⁶ Joab a nduma kokwar Rabba, kokwar ndohi Ammon mbiaʼa, a sam man iyam a pa, a ncedama.

²⁷ Joab a nzlinde ta ndohi sak a sam David, a ngaɗa na: I duma kokwar Rabba, a i ceda sam man iyam a pa a ma.

²⁸ Gar haha ɓic ta njèkèɗi ndohi te ngwai, a ta nza na ma a kokwar, a ka gu a ngulaʼa; man ɓai iyè man i gi a ngul kokwar, ta slébèrdyè a géɗèʼa.

²⁹ David a mɓic ta ndohi tèlèba, a ndo Rabba, a nduma kokwar, a ngu a ngulaʼa.

³⁰ A David a ncko skwi mpèɗè gèɗ bi Milcom, man ta tsu a guro kilo 60, a kwa mbelaʼa te vaʼa, a mfeda a gèɗ. A nhulkoɗi skwi var kumba te kokwar.

³¹ Ndohi kokwaraʼa, a nhel ta, a mpe ta a mizlinè mbèzl wof, a ta viɗ züdo, devar, dzana, a ta rèm briques. David a gu arsa te kokwar Ammon tèlèba. Te deɓaʼa David a ndohi tèlèba ta men ta a deɓa a kokwar Jérusalem.