II Samuel 11 - Ma Zhiklè

David a Bath-Shéba

¹ Mvi ngiɗè, ara man ta gi a mvi a mvai, bihi ta ɓica va a ta dè var, David a nzlinda Joab a ndohi nengaʼa, a ndohi var Israel tèlèba, aman ta dè a ta nza na ma a kokwar Rabba, a ta duma ndohi Ammon. David, nengaʼa a nʼnza te kokwar Jérusalem.

² Pats ngiɗè, a dakwaɗ, aman David a nslambaɗa a sam mʼmènè na, a shèwèlè a géɗ gi bi na, a mpoko di a hai, a nrka ngwoz ngiɗè a pèn va. Va nengaʼa amba, mbikaɓai.

³ A David a nzlündo ndo, da junjor ngwoza dai, ngwoz ngè? A ta gaɗa na: Nengaʼa Bath-Shéba, dem Eliam, ngwoz Urie, ndo Heth.

⁴ Te deɓaʼa David a nzlinde ta ndohi sak, ta da baha na. Aman a mshkè a sam na, a mʼmana a vna. Ngwoz a mpana hwaɗ auda a va na ma. Te deɓaʼa a mʼmen na a deɓa a ngwai.

⁵ A ngwoz a ngu a hwaɗ. A nzlündo ndo a sam David, da gaɗa na: Iyè a hwaɗ.

⁶ Te deɓaʼa David a nzlündo ndo a sam Joab: Zlündokoy Urie, ndo Heth! A Joab a nzlündo Urie a sam David.

⁷ Aman Urie a mshkè a sam na, David a ndzhoɗo: Joab a ndohi ta nza genè dè? Var a gu kè?

⁸ A David a ngaɗa na Urie: Do a gi ngaya, a ka pana sak ngaya. Aman Urie a nshkè auda te gi bi ma, ndohi bai to do a verzi nengaʼa, a ta da na skwi man bai a mvoko na.

⁹ Urie a mʼmanahi a ma gi bai, a va ɓèlèlihi ngiɗè, a nda a gi nengaʼa ɓai.

¹⁰ Aman ta ngra na David: Urie a ndo a gi nengaʼa ɓai, David a ngaɗa na: Ka shkè ngwi te nshèwèlè. Ko do a gi ngaya ɓi èhèmè?

¹¹ Urie a ngaɗa na David: Koti Zhiklè, a ndohi Israel, a ndohi Juda, ta nzi te gi maslaka genè, a Joab, tsuvom ga, a ɓèlèlihi bi ga, ta te dak, a iyè a i dè a gi ga a i da ndi skwai, a i da si skwai, a i da mènè a sam ngwoz ga dè? I slaha a i gi aranta azɓai, a vava, ara man ka zhè a nshèffè.

¹² David a ngaɗa na Urie: A patsna ba nza a haha. Angoslèm i woy a i pre ka. Urie a nʼnza te kokwar Jérusalem a pats sa. Te mangoslèmaʼa,

¹³ David a mbaha na, aman a ndi skwai, a si skwai a sam na, a nsa na zom a hwaɗ a vata, a zom a nkeɗaʼa. Aman a dakwaɗ a ndo auda, a mʼmana a ntamagi bai a sam ɓèlèlihi bi na; aman a nda a gi nengaʼa ɓai.

David a hér mʼmetsi Urie

¹⁴ A prèk David a mwindo ɗèlèwèr a sam Joab, a nzlinde na a ri Urie.

¹⁵ Te ɗèlèwèr a mwindo: Zlatseda Urie a zolom var zuraʼa, a kinè, kin nzi te deɓ nengaʼa; a ta keɗaʼa a ma var.

¹⁶ A Joab, aman ta nza na ma a kokwar, a nzlatseda Urie a sam man a suna, ndohi mayamhai, ndohi var, ta shkè zuraʼa a nengaʼa.

¹⁷ Aman ndohi ta hakaɗauda te kokwar a ta gi var a Joab, ndohi David tsaɗ tsaɗ ta bazl ta. Urie, ndo Heth ba, ta keɗaʼa.

¹⁸ Joab a nzlündo ndo a sam David, da menda na ma var tèlèba,

¹⁹ a nfa na ma a gèɗ a ndo sak: Aman ka ngra na ma var tèlèba a bai,

²⁰ a bai a da gi ndav, a gaɗa: Man kin gi var, kin herda na va a kokwar ndul ndul èhèmè? Kin suna, ndohi ta da zlatskaɗa gèɗ gai a ta da ɓarka kinè tʼhai, kin sun ɓi dè?

²¹ Nkeda Abimélec, kra Jerubbésheth, wa? Ngwoz ngiɗè a nzukdoko vova a hai a gèɗ gai, a nkalka na gèɗ ka ɓi dè? A mʼmets na te Thébeth. Kin herda na va a kokwar ndul ndul èhèmè? – Ka da gaɗa na bai: Urie, ɓèl ngaya ba, ndo Heth, a mʼmets na.

²² A ndo sak a mdo. Aman a mshkè, a nʼngra na David ma tèlèba man Joab a ngaɗa na. A David a ngu ndav.

²³ Ndo sak a ngaɗa na David: Ndohi ta fen nga, a ta hakaɗi a verzi nga a dal var. Aman nga, nga dzam ta a deɓa a ma kokwar ta.

²⁴ A ndohi lèkèɗ ta zlatskaɗa gèɗ gai, a ta ɓarka ta ɓèlèlihi ngaya, a ɓèlèlihi bai tsaɗ tsaɗ ta bazl ta. Urie, ɓèl ngaya, ndo Heth, ba, ta keɗaʼa.

²⁵ David a ngaɗa na ndo sak: Do a ka gaɗa na Joab: Ka hur gèɗ a géɗ nengaʼa ɓai. Sulom a mbazla ndohi mènè. Nzala va a ma ma genè, a ka duma kokwar. Ka da va na wuɗi a va arsa.

²⁶ Aman ngwoz Urie a ntsenaʼa, Urie, baki nengaʼa, a mʼmets na, a nkudi baki nengaʼa.

²⁷ Aman nkuɗa klèng, nʼnda baki na a vèvèɗ ma, David a nzlündo ndo a sam nengaʼa, da baha na a gi na. A nco a ngwoz na, a ngwoz a nya na kra nguraʼa. Aman skwi man David a ngau, ambaha Ndo nzi pèc pècèk ɓai.