II Samuel 10 - Ma Zhiklè

David a mbazl ta ndohi Ammon a Syrie

¹ Te deɓaʼa bi Ammon a mʼmets na, a Hanun, kra nengaʼa, a ngu bi te di man a nengaʼa.

² David a mhuro: I woy a i gi skwi mbelaʼa a sam Hanun, kra Nachash, lèmèlèmè ara bab nengaʼa a ngau skwi mbelaʼa a sam ga. A David a nzlinde ta ndohai, a ta da gu wobau a géɗ bab na te di man a na. Aman ndohi ta shkè a kokwar ndohi Ammon,

³ bihi Ammon ta gaɗa na Hanun, bi tengaʼa: Ka hur a ka gaɗa David a nzlinde ta ndohi a sam ngaya a ta da gi wobau a géɗ bab ngaya ɓai. A nzlinde ta ndohi a sam ngaya, a nʼngél di a kokwar, a nzeɓiaʼa; te deɓaʼa a njèkèɓè samaʼa.

⁴ A Hanun a mpar ta ndohi David, a ta shèma ta rèta bozozom, a ta ngelama ta maslaka te ndav, a ta zlinde ta a deɓa.

⁵ Aman ta ngra na David arsa, a nzlinde ta ndohi a sam ta; hori a di ndohi kumba. Bai a ngaɗa ta: Va-nza a kokwar Jéricho, ha pats man bozozom kinè a nftskaɗ na a pa te deɓaʼa kin shkè a deɓa a ngwai.

⁶ Aman ndohi Ammon tarkaʼa, David a ngu ndav a géɗ tengaʼa, ta zlinde ta ndohi a sam ndohi Syrie te Beth-Rehob, a ndohi Syrie te Tsoba, a ta ngots sojèhi te pa: ndohi sak 20.000. A sam bai te Maaca ndohi 1.000, a sam ndohi Tob 12.000. A ta takaha ta a ngi var.

⁷ Aman David a ntsenaʼa, a nzlinda Joab a ndohi var tèlèba, ndohi ngul skwai.

⁸ A ndohi Ammon to do a ta gi var, a ta ɗaha va a ntamagi kokwar. Ndohi Syrie te Tsoba, te Rehob, a ndohi Tob a Maaca, ta zlatsa a géɗ ta, a dala.

⁹ Aman Joab a nrka, ta hakaɗa ma, ta hakaɗa te deɓa, a nhel ta ndohi te va ndohi Israel mparaʼa, a nzlatsede ta zuraʼa a ma ndohi Syrie.

¹⁰ Njèkèɗi ndohai a mpa ta a ri Abishai, kramam nengaʼa, a nzlatsede ta zuraʼa a ma ndohi Ammon.

¹¹ A ngaɗa: Aman ndohi Syrie ta da fe-nyè a wuɗai, ka shkè a ka da takahayè. Aman ndohi Ammon ta da fen ka a wuɗai, i dè a i da takaha ka.

¹² Gu slagama, ngo-nzolokoy va a sam ndohi nga, a géɗ kokwarhi Zhiklè nga. Ndo nzi pèc pècèk da gau ara man ambaha.

¹³ A Joab a ndohi man ta zhè a sam nengaʼa to do aman ta gi var a ndohi Syrie, a tengaʼa ta hu ta.

¹⁴ Aman ndohi Ammon ta rka ara man ndohi Syrie ta hi ta, tengaʼa ba ta hu ta a Abishai, a ta hu ta a deɓa a ngwai. A Joab a njèkeda nhi a verzi ndohi Ammon, a mʼmen na a deɓa a kokwar Jérusalem.

¹⁵ Aman ndohi Syrie ta rkaʼa, ndohi Israel ta fen ta, ta ɓica va zaʼa.

¹⁶ Hada-dézer a nzlinde ta ndohi a sam ndohi Syrie, a ngaɗa ta, aman ta dè a wud woyam Euphrate. A ta shkè a kokwar Hélam, a verzi Shobac, bi sojè Hadadézer.

¹⁷ Aman ta ngra na maʼa a David, David a mɓic ta ndohi Israel tèlèba, a ntawaɗa woyam Jourdain, a ta shkè a kokwar Hélam. Ndohi Syrie ta ɗaha va zuraʼa a ma David, a ta gu var a nda tengaʼa.

¹⁸ Aman ndohi Syrie ta gu zlau ndohi Israel, a ta hu ta. A David a mbazl ta ndohi Syrie, ndohi kiki var 700, a ndohi sak 40.000; Shobac, bi sojè, a nʼnga na mblè a va, a mʼmets na a pa.

¹⁹ Aman bihi man a Hadadézer tèlèba ta rkaʼa, ndohi Israel ta ngul ta, ta tsu gumi a Israel, a ta nda a ɓèl ta. A ndohi Syrie ta gu zlau, ta takaha ta ndohi Ammon asaɓai.