II Rois 9 - Ma Zhiklè

Elisée a mbada na mbar a gèɗ a Jéhu

¹ Elisée, ndo nhadka ma a mbaha na gol ndohi nhadka ma staɗ, a ngaɗa na: Dzawa va ngaya, co gatsak mbar haha, a ko do Ramoth te Galaad.

² Aman ka da ndikè a pa, dzhoɗo Jéhu, kra Josaphat, kra Nimshi. Do a gai a ka gaɗa na, da slambaɗa te ndev kramamhi na, da zlatsa, a ka da a gi ntʼhwaɗaʼa.

³ Te pa co gatsak mbar a ka bada na a gèɗ, a ka gada: Ndo nzi pèc pècèk a goɗ ar haha: I bada ka mbar a gèɗ, a i ge ka a bi Israel. Te debaʼa ka da winè ntamagai a ka hu ngaya tsam-tsam.

⁴ A gol matsa a mdo, gol ndohi nhadka ma, a ndo Ramoth te Galaad.

⁵ Aman a ndikè a pa, bihi sojè ta ɓica te pa, a ngaɗa: Bi-sojè, ma ga a zhè a sam ngaya! Jéhu a ngaɗa: Ka woy wa? A ngaɗa: Ka, bi soje!

⁶ A Jéhu a nslambaɗa, a ndo a gai; a ngiɗè a mbada na mbar a gèɗ, a ngaɗa na: Ndo nzi pèc pècèk, Zhiklè Israel, a goɗa ar haha: I bada ka mbar a gèɗ, a i ge ka a bi Israel, ndohi Ndo nzi pèc pècèk.

⁷ Ka da zeda ndohi gi Achab, bi ngaya, a i da pil nshèffè ndohi nhadka ma, ɓèlèlihi ga, a vna, man Jézabel a mbazl ta, nshèffè ɓèlèlihi Ndo nzi pèc pècèk tèlèba.

⁸ Ndohi gi Achab sèi ta bazl ta tèlèba, verzi Achab tèlèba i zeda, ngurhi ngurhi tèlèba, ngurhi a wudahi te Israel.

⁹ I da gi a sam ndohi gi Achab lèmèlèmè ara man i gu a sam ndohi gi Jéroboam, kra Nebath, lèmèlèmè ara man i gu a sam ndohi gi Baesha, kra Achija.

¹⁰ Kdadihi Jézabel ta da ndi Jézabel te dak Jizreel, ndo a da rda a vèvèɗ azɓai. Te deɓaʼa a mwina ntamagai, a mwuc na.

¹¹ Jéhu a mshkè auda te gai a sam golahi bi na, a ta gaɗa na: Mè? Ndo madzagi a mshkè a sam ngaya èhèmè? A ngaɗa ta: Kinè ba kin sun ndoʼa a tsaval ma nengaʼa.

¹² Aman ta gada: Ma nzli ma! Séi ka ngra nga skwiaʼa! A ngaɗa: Nengaʼa a ngadayè kata kata, a gada: Ndo nzi pèc pècèk a goɗ ar haha: I bada ka mbar a gèɗ, a i ge ka a bi a géɗ Israel.

¹³ A ta hul maslaka auda a va ta tsam-tsam, a ta peda a civèɗ a sam sak na, a sam ntiv-ntivè gai. Te deɓaʼa ta tsu tolom, a ta boho: Jéhu, bai!

Jéhu a keɗa Joram a Achazia

¹⁴ Aranta, Jéhu, kra Josaphat, kra Nimshi, a nhüno aman ta vhè ma a géɗ a Joram. A Joram a ndohi Israel tèlèba ta nza a ta ɓer Ramoth te Galaad te ri Hazael, bi Syrie.

¹⁵ Aman bi Joram a mshkè a deɓa a kokwar Jizreel, aman ta mana na mblè man ndohi Syrie ta ɓoro a lèkèɗ, aman a ngu var a Hazael, bi Syrie. Jehu a ngaɗa: Aman a da ambaha kinè, ndo do do auda te kokwar, a nʼngreda ma haha auda te kokwar Jizreel ɓai.

¹⁶ A Jéhu a ndo Jizreel a kiki nengaʼa, te man Joram a bi Juda ta derzla va, a Achazia a mdo a nʼngela na di a Joram.

¹⁷ Ndo nʼngél di te gi ngurèa te Jizreel a nrka ndohi nhayaʼa a verzi Jéhu ta shkè, a ngaɗa: I rka ndohi nhayaʼa! Joram a ngaɗa: Baha na ndo plèsh, da hau aman ta da zli gèɗ, do dzhoɗo: Ma amba dè?

¹⁸ A ndo plèsh a mdo a ta zli gèɗ, a ngaɗa: Bai a jhèɗèʼa: Ma amba dè? Jéhu a ngaɗa: Man amba, man ambaɓai, ma ngaya te pa dè? Ngoldoko ma a verzi ga! A ndo nʼngél di a ngreda, a ngaɗa: Ndo sak a ndikè a sam ta, aman a shkè a deɓa azɓai.

¹⁹ A nzlündo ndo plèsh macecèwaʼa, aman a ndikè a sam ta, a ngaɗa: Bai a goɗ ar haha: Amba dè? Jéhu a ngaɗa: Man amba, man ambaɓai, ma ngaya te pa dè? Ngoldoko ma a verzi ga!

²⁰ A ndo nʼngél di a ngreda, a ngaɗa: A ndikè a sam ta, aman a shkè a deɓa azɓai. Aman a hai, nhi na lèmèlèmè ara Jéhu, kra Nimshi, aman nengaʼa a hi ara ndo madzagai.

²¹ A Joram a ngaɗa: Va-feda kiki a verzi plèsh! A ta feda kiki a verzi plèsh, a Joram, bi Israel, a Achazia, bi Juda, a to do, staɗ staɗ a kiki na, aman ta da zli gèɗ a Jéhu. A ta ngots a sam dak Naboth te Jizreel.

²² Aman Joram a nrka Jéhu, a ngaɗa: Jéhu, amba dè? A nengaʼa a ngaɗa: Amba mè, aman mphömè Jézabel, mam ngaya, a dè a ma ma, a mʼmbèh skwi nengaʼa kumba sa!

²³ Joram a nʼngalda ma na, a mhu na. A ngaɗa na Achazia: Achazia, ta ga nga ri a gèɗ!

²⁴ A Jéhu, sulom a deɓ rai, a mɓor Joram a zai deɓa, a ntsoko gèɗ auda a ndav, a nkalda gèɗ a ndav te kikai.

²⁵ Jéhu a ngaɗa na Bidkar, bi sojè na: Co a ka kalda a ndev dak Naboth te Jizreel. Hur ara man nga hu a verzi Achab, bab na, nga cèw a ka, a Ndo nzi pèc pècèk a nhodko ma a géɗ nengaʼa ar haha:

²⁶ I rka pombaz Naboth a pombaz wudahi nengaʼa adatsa, Ndo nzi pèc pècèk a gada: I dè pilè a ka te dak haha. Ani co, a ka kalda a ndev dak, ara man Ndo nzi pèc pècèk a ngoɗa.

²⁷ A Achazia, bi Juda, aman a nrka skwi haha, a mhu na a civèɗ ndè Beth-haggan. Jéhu a mhu a verzi nengaʼa, a ngaɗa: Va-ɓara na va! A ta ɓoro te kiki nengaʼa, a slrats Gur, a tsagi Jibleam. A mhu na a kokwar Meguiddo, a mʼmets na a pa.

²⁸ A golahi nengaʼa ta feda a kikai a ta da a Jérusalem, a ta rda a sam bab na, te kokwar David.

²⁹ Aman Joram, kra Achab, a ngu bi mvi 11, ta feda Achazia a bi a géɗ Juda.

Mʼmetsi Jézabel

³⁰ Jéhu a mʼmen na a deɓa a Jizreel. Jézabel, aman a ntsenaʼa, a mfaɗda mbar a dai, a cèffè gèɗ na, te deɓaʼa a nʼngel di auda a nvakavar.

³¹ Aman Jéhu a mbeza a ntamagi kokwar, nengaʼa a ngaɗa: Zimri, ndo nkeda bi ngaya, amba dè?

³² A nengaʼa a nceda gèɗ a zhiklè, a mpu di a pa, a ngaɗa: Ndo ndayè a va a iyè wa? A ndohi mizlinè bi ngiɗè cèw, man makar, ta ngelda di auda a nvakavar zaʼa.

³³ A ngaɗa: Va-zukdokaɗahai! A tengaʼa ta zukdahai, a Pombaz nengaʼa a nguca a der kokwar, a va plèshihai man ta mbatsaha a sak.

³⁴ Te deɓaʼa Jéhu a mdo a gai, a ndau skwai, a nsau skwai, a ngaɗa: Vo-co ngwoz mphomaʼa matsa, va-rda a vèvèɗ, te man nengaʼa dem bai.

³⁵ A to do, ta woy a ta riaʼa, aman ta ngatsa ɓai, sèi vatasl gèɗ, a sak a rai.

³⁶ Ta shkè a deɓa a ta ngra na Jèhu, a nengaʼa a ngaɗa: Nasa ara man Ndo nzi pèc pècèk a goɗ te ma Elie, ndo Thishbè, ɓèl na, man a gada: Kdadihai ta da ndi zluèɗ va Jézabel te dak te Jizreel.

³⁷ A nckondo Jézabel a da gi a ndaderɗa te dak te Jizreel, a ta sun sam man Jézabel a pa ɓai.