II Rois 7 - Ma Zhiklè

¹ Elisée a ngaɗa: Va-tsena ma Ndo nzi pèc pècèk: Ndo nzi pèc pècèk a goɗa ar haha: Angoslèm, a sam aranta, bho gufa dau staɗ a da gi Suli 1.000 tʼhwaɗ kokwar Samarie. A marori bho cèw, Suli 1.000.

² A bigol bai, nengaʼa man a ngu va a vna, a mbeɗa na a ma ndo Zhiklè, a ngaɗa: Ko Ndo nzi pèc pècèk a nzlünko giɗfèk, skwi haha a gi ar haha azɓai. Elisée a ngaɗa: Skwi haha ka da rka a di mènè; aman ka, ka da tèr nengaʼa azɓai.

Ndohi Syrie ta jèkeda sam nʼnzi ta

³ Ndohi hutsoɗ fad ta zhè a ntamagi kokwartʼuda. A ta goɗ a va ta: Nga nza haha gene, a nga zhèr mʼmetsi a pa èhèmè?

⁴ Aman nga huro, nga dè a kokwar, mi te pa, nga da metsi a kokwar holholaʼa. Aman nga nza a haha ha, nga metsi nga gene. Ngo-dokoya a sam ndohi var Syrie mɓicaʼa. Aman ta bazl nga ɓai, nga da nzi a nshèffè. Aman ta bazl nga, nga metsi nga mènè.

⁵ A ta slambaɗa, a sam ratakwaʼa, a to do a sam ndohi var Syrie mɓicaʼa, a ta ndikè a pa, a kuma sam man ndohi Syrie ta ɓicda va a pa. Aman ndo a te pa ɓai.

⁶ Bi-Zhiklè a ngau a ta tsena nhèzlèwè kiki var a sam sak plèshihai a nguzli var mbiaʼa, a ta goɗ a va ta: Bi Israel a mbaha ta bihi Heth a bihi Egypte, a ta humda a ta da dum nga!

⁷ A ta slambaɗa a prèk te gai, a ta hu ta, a ta jèkeda gi ta a pa, a plèshihai a kdèhihai a sam man ta ɓica va a pa tèlèba ambali genè, a ta hu ta, ta woy a ta mbel nshèffè ta.

⁸ A ndohi hutsoɗ matsa, man ta ndikè a samaʼa, to do a gi staɗ, ta ndau skwai, a ta sau skwai, a ta hul Suli a guro te pa, a maslaka, a to do a ta rda a vèvèɗ. A ta shkè a deɓa, a to do a gi ngidè, a ta helda skwi man ta ngotso a ma, a to do a ta rda a vèvèɗ.

⁹ A ta goɗ a va ta: Skwi man nga gi a patsna, ambaɓai. A patsna pats mwuffe, a nga nza tètè, a nga zhèr man sam nciɗaha nga, mali nga. Ngo-dokoya a gi bai, a nga ngreda na skwi haha!

¹⁰ A ta shkè, a ta baha ta ndohi mɓer ntamagi kokwar, a ta ngra ta skwi haha, a ta gaɗa: Ngo do a sam man ndohi var Syrie ta ɓica va a pa; na haha ndo a te pa bai, ko kuɗa ɗiak ba a te pa ɓai. Sèi plèshihai a kdèhihai mʼmana a pa. A gi a nʼnza a pa ambalai.

¹¹ A ndohi mɓer ntamagi kokwar ta tsi lalau, a ta ngreda na bi te gi na.

¹² A bi a nslambaɗa a vaɗ, a ngaɗa ta golahi nengaʼa: I ngra kinè skwi man ndohi Syrie ta woy a ta ga nga. Ta sun a ta gada mi a ga nga, a ta jèkeda sam ta, a ta pi va nga te dak, aman a ta gada: ta da shkè auda te kokwar, nga da par ta a ɓèlèlihai, a nga cè kokwar ta.

¹³ A gol nengaʼa ngidè a mʼmbeɗa na a ma, a ngaɗa: Sèi nga hil plèshihi nga 5 man ta jèkaha, ta da bèzl ta genè ara gwoliaʼa, ara ndohi Israel tèlèba. Nga zlinde ta, a nga jkede ta.

¹⁴ A ta hul kiki var cèw a plèshi nderzlahi cèw, a ta zlinde ta a verzi ndohi var Syrie, a bi a ngaɗa: Vo-do, va-jkede ta!

¹⁵ A to do a ta ndikè a ma woyam Jourdain; a civèd tèlèba ta ngots maslaka a kolongwi man ndohi Syrie ta ksarda pa man ta hu ta tsam-tsam. A ndohi sak ta shkè a deɓa, a ta ngra na bai.

¹⁶ Te deɓaʼa ndohi tèlèba to do a ta dumkoɗi sam man ndohi var Syrie ta ɓica va a pa. A bho dau staɗ a gi 1.000, a bho marori cèw a gi 1.000, ara man Ndo nzi pèc pècèk a goɗa.

¹⁷ A bai a nfu bi-sojè man a ngu va a vna, a ndo mɓer ntamagi kokwar. A ndohi ta mbatsaha a sak a ntamagi kokwar, a mʼmets na, ara man ndo Zhiklè a njè na, ara man a goɗa, a pats man bi a mshkèhi a sam na.

¹⁸ A vava, aman ndo Zhiklè a njè na bai, a ngaɗa: Angoslèm a sam aranta, bho dau staɗ a da gi 1.000, bho marori cèw a da gi 1.000, tʼhwaɗ kokwar Samarie,

¹⁹ bi-sojè a mʼmbeɗa na a ma ndo Zhiklè, a ngaɗa na: Ko man Zhiklè a nzlünko giɗfèk, skwi haha a gi ar haha azɓai. A Elisée a ngaɗa: Skwi haha ka da rka a di mènè, aman ka, ka da tèr nengaʼa azɓai.

²⁰ A ngu a sam na aranta. Ndohi ta mbatsaha a sak a ntamagi kokwar, a mʼmets na.