II Rois 6 - Ma Zhiklè

Elisée a dzana te iyam

¹ Pats ngiɗè, golahi ndohi nhadka ma ta gada na Elisée: Sam man nga nzi a pa a haha, a slra nga ɓai.

² Ngo-dokoya a ma woyam Jourdain, staɗ staɗ tèlèba a ngel wof, a nga gi gi nga a pa. A nengaʼa a ngaɗa: Vo-do!

³ Aman ngiɗè a ngaɗa: Kam, kam, washkè a verzi ɓèlèlihi ngaya! A ngaɗa: i de a nda kine.

⁴ A ta ndikè a ma woyam Jourdain, a ta ngela wof.

⁵ Aman ngiɗè a ngélèʼa, dzana a nsundol na a iyam. A kuɗai: Wobau, bi ga! I cko te ri ndo ngiɗè!

⁶ A ndo Zhiklè a ngaɗa: A kala ahngwa? A nʼngra na samaʼa. A Elisée a mpasla gada, a nkalda a pa, a züdo a mshkè a gèɗ iyam.

⁷ A ngaɗa na: ckoɗa! A ndo sa a ntor rai, a mco.

Elisée a ga na ri a gèɗ a bi Syrie

⁸ Bi Syrie a ngu var a Israel. A ta tsomma a golahi nengaʼa, a ta gada: Sèi nga ɗèh va a sam na haha – a sam na haha–

⁹ Aman ndo Zhiklè a nzlündo ndo a sam bi Israel, a ngaɗa na: Ko do man aussa ɓai, ndohi Syrie ta nghede va a pa!

¹⁰ A bi Israel a nzlündo ndo a sam man ndo Zhiklè a ngra na. Aranta a nʼngatsa na maya pèc pècèk, sak staɗgenè ka bai.

¹¹ A mpa na zlau a gèɗ a bi Syrie. A mbaha ta golahi nengaʼa, a ngaɗa: Kin slaha kin ngreda ndo nʼnga nga ri a gèɗ a sam bi Israel de?

¹² Gol nengaʼa ngiɗè a ngaɗa: Ndo ngiɗè azɓai, bi ga, sèi Elisée, ndo nhadka ma te Israel, man a ngra na bi Israel, ko skwi man ka gèdèʼa a sam mʼmèn ngaya.

¹³ A ngaɗa: Vo-do woy sam man na a pa, a kin gskoɗai! A ta shkè a ta ngra na: Na zhe te Dothan.

¹⁴ A nzlündo ndohi kiki var a plèsh a pa, ndohi var kumba. A ta shkè a vaɗ, a ta tèuda kokwar a pa.

Elisée a ngwode ta ndohi Syrie

¹⁵ Gol ndo Zhiklè a nslambaɗa a prèk te gai, a ndo auda. Ndohi var ta tèuda kokwar a pa, a ndohi var a plèsh. A gol nengaʼa a ngaɗa na; Nga da gi ma kè, bi ga?

¹⁶ A ngaɗa: Ka gu zlau ɓai, tengaʼa man a sam nga ta fena tengaʼa man ta ngalka nga a pa.

¹⁷ Te deɓaʼa Elisée a ntsu rai, a ngaɗa: Ndo nzi pèc pècèk, winè di nengaʼa, aman a rkaʼa! A Ndo nzi pèc pècèk a mwinè di gol Elisée, a nengaʼa a nrka, a hünko te za, ta a sam Elisée, tèlèba, plèshihai a kiki ndohi var nara vogwa.

¹⁸ Aman ndohi Syrie ta shkè a ta herdeka va, Elisée a ntsu ri a Ndo nzi pèc pècèk, a ngaɗa: Ge ta ndohi a mandazlai! A nge ta ndohi a mandazlai, ara man Elisée a goɗa.

¹⁹ Te deɓaʼa Elisée a ngaɗa ta: Civèd a naha ka ɓai, kokwar a nta ka ɓai! Va-dzadzarkayè, a i de kinè a sam ndo man kin woyaʼa. A nde ta a kokwar Samarie.

²⁰ Aman ta ndikè a kokwar Samarie ma, Elisée a ngaɗa: Ndo nzi pèc pècèk, winè ta dai, a ta rkaʼa! A Ndo nzi pèc pècèk a mwinè ta dai, a ta rkaʼa, ta te ndev kokwar Samarie.

²¹ A bi Israel, aman a nrkaʼa, a ngaɗa na Elisée: Bab ga, i da bazl ta ɗè?

²² A nengaʼa a ngaɗa: Ka bazl ta ɓai! Ka bazl ta ndohi man ka par ta a ɓèlè dè? Va ta daf a iyam, a ta men ta a deɓa a sam bi ta.

²³ Te deɓaʼa bai a nʼnga ta skwi nʼndi mbiaʼa, a ta ndau skwai, a ta sau skwai, a mpre ta, a ta men ta a deɓa a sam bi ta. Te deɓ nta, ndohi var Syrie ta shkè a ta kala na va a Israel asaɓai.

Ben-Hadad a nza na ma a Samarie

²⁴ Pats ngiɗè, Ben-Hadad, bi Syrie, a mɓic ta ndohi var nengaʼa tèlèba, a ndo a nʼnza na a ma kokwar Samarie.

²⁵ Te ndev nasa, mi mbiaʼa a ngu te Samarie, te ndev man ta nza ta a ma kokwar, géɗ kɗèh staɗ ta shum a gozhèm 8.000, a vah lak rèta gadagar, a Suli 5.000.

²⁶ Aman bi Israel a nsawala a géɗ zlazlar kokwar, ngwoz ngiɗè a kuɗi a sam na, a ngaɗa: Takahayè, bi ga,

²⁷ A nengaʼa a ngaɗa: Aman Ndo nzi pèc pècèk a ntakaha ka ɓai, i da takaha ka a mè? A skwi te wof ɗè, ɗè a skwi te klok dè?

²⁸ A bai a ngaɗa na a vaʼa: Ka war mè? A ngwoz a ngaɗa: Ngwoz haha a ngaɗayè: Vay kra ngaya a nga da ndi a patsna. Angoslèm nga da ndi kra ga.

²⁹ A nga ta kra ga ma, a nga nda ma, sata angoslèm i gaɗa na: Vay kra ngaya a nga ndiaʼa! Aman nengaʼa a ngheda kra na.

³⁰ Aman bai a ntsena ma ngwoz haha, a nkuratseda maslaka nengaʼa aussa, a shèwèlè a géɗ zlazlar kokwar, maslaka ngiɗè az a va ɓai, sèi maslaka sam kuɗa a va.

³¹ Te deɓaʼa bai a ngaɗa: Zhiklè da gay kèkè, aman a patsna, gèɗ Elisée, kra Shaphath, a nzi a pa azɓai!

Elisée a hodko ma a gèɗ mi klèng

³² Elisée a nʼnza te gi na, a ndohi nhalaʼa ta nza a tsagi na. A bai a nzlündo ndo staɗ a sam na. Aman ga ndo a mshkè a sam na, Elisée a ngaɗa ta ndohi nhalaʼa: Kin rka ndo nkeda ndo sa a nzlündo ndo a nda ngelamay gèɗ haha dè? Va-gu maya! Aman ndo sa a shkè, va-pizlè ntamagai, va-zukda deɓa! Sam sak bai a tsenkaɗa verzi na.

³³ Aman ta goɗ a ndo sak dai, a bai a nshkè, a ngaɗa: Matakwan mbiaʼa haha a shkè te ri Ndo nzi pèc pècèk. I zhèr skwi te ri Ndo nzi pèc pècèk a ma ma dè?