II Rois 5 - Ma Zhiklè

Elisée a mbel Naaman te matakwan

¹ Naaman, ngul ndohi var bi Syrie, ndo man nɗaɗav na a zhè, ambaha bi na. A géɗ ndo sa Ndo nzi pèc pècèk a nʼnga ta ndohi Syrie a ngul ndohai. Aman hutsoɗ a ga na.

² Aman pats ngiɗè ndohi Syrie to do aman ta gshè ɓèlè, ta gso dem staɗ te kokwar Israel, a ta va na ngwoz Naaman a ɓèlè.

³ A dem matsa a ngaɗa na ngwoz: I woya aman babgi ga a dè a sam ndo nhadka ma Zhiklè man a zhè te Samarie. Ar nengaʼa a suɗa na hutsoɗ man a va haha.

⁴ A Naaman a mdo a sam bi na, a nʼngra na: Dem nkèshèa te kokwar Israel a goɗ kata kata!

⁵ A bi Syrie a ngaɗa: Slambaɗa, do! I woya man i win-dè ɗèlèwèr a bi kokwar Israel. A Naaman a mdo, a mhelda skwi kumba a rai: Suli 10.000, guro te di 350.000, a dawar maslaka 10.

⁶ A mva na ɗèlèwèr a bi Israel, a nengaʼa a njongo: Aman ka ngots dèlèwèr haha, suna, i zlinde Naaman, ndo mizlinè ga, a sam ngaya, aman a ka suɗa na hutsoɗ auda a va.

⁷ Aman bi Israel a njongo ɗèlèwèr ma, a nkuratseda maslaka nengaʼa aussa, a ngaɗa: I Zhiklè dè, man a i gu keɗa ndo, a i va na nshèffè a ndo — aman a i suɗa na hutsoɗ auda a va ndo haha? Va-rkaʼa, ndo haha a woy ma ga!

⁸ Aman Elisée, ndo Zhiklè, a ntsenaʼa, bi Israel a nkuratseda naslaka nengaʼa aussa, a nzlündo ndo a sam na, a ngaɗa na: Ka kuratseda maslaka ngaya aussa èhèmè? Zlündoko ndo a sam ga, da suna, ndo nhadka ma Zhiklè a zhè te Israel!

⁹ A Naaman a mshkè a plèshi na a kiki na, a nzlatsa a ntamagi Elisée.

¹⁰ A Elisée a nzlündo gol nengaʼa, aman a ngaɗa na: Do, pana va ngaya te woyam Jourdain, a gi sak 7, a va ngaya a da suɗ na.

¹¹ A Naaman a ngu ndav, a ndo na. A ngaɗa: I huro, a da shke auda a sam ga, a da tsi ri a nzlembaɗ Ndo nzi pèc pècèk, Zhiklè na. A da lamayè va ga, a suɗayè arsa.

¹² Iyam woyam Abana a Parpar, Woyamhi Damas, amba holholaʼa, ta fena iyam Israel ɓi ɗè? A i pèn va ga te pa azɓi ɗè, a i shüɗ ga! A nʼngwoda va na, a ndza na a ndav.

¹³ A golahi nengaʼa ta gaɗa na: Bab nga, aman ndo nhadka ma Zhiklè a ndzhad ka skwi mwuɗitpa, ka gi azɓi dè? Anai a gada ka: Pana va ngaya, a ka suɗ ngaya, ka gi azɓi èhèmè?

¹⁴ A nengaʼa a mshkèhi a deɓ plèsh, a mpana va te woyam Jourdain, a gi sak 7, ara man ndo Zhiklè a gada na. A va nengaʼa nsuɗa ma, va nengaʼa a nge na ara gola.

Naaman a gshè va a Zhiklè

¹⁵ A Naaman a mʼmenkaɗa deɓa a sam ndo Zhiklè, a golahi nengaʼa tèlèba ta zlatsa a sam na. A ngaɗa na: Anai i suna, Zhiklè ngiɗè azɓai tʼherkeda, sèi Zhiklè te Israel. Anai co skwi mbalai te ri ɓèl ngaya!

¹⁶ Aman Elisée a ngaɗa: Ara man Zhiklè a zhè, a sam di nengaʼa man i zlècè, i cè skwi azɓai. A Naaman a ntètika na a gèɗ, aman Elisée a woya ɓai.

¹⁷ A Naaman a ngaɗa: Man ka woya ɓai, sèi ka pay herkeda te di deɓ kɗèh cèw. Bèl ngaya ani a woya a nvi skwi a nʼndèr skwi a zhiklèhi ngiɗè asaɓai, sèi a Ndo nzi pèc pècèk.

¹⁸ Ndo nzi pèc pècèk da pray mali haha: aman bi ga a dè a gi Zhiklè te Rimmon, aman a tsi ri te pa, a ngshè va a iyè, a i ba nga gurɓahai a vna te gi Zhiklè te Rimmon, Ndo nzi pèc pècèk da pray mali sa.

¹⁹ Eliseé a ngaɗa na: Do a gumai! A nengaʼa a mdo daf kata.

²⁰ Guéhazi, gol Elisée, ndo Zhiklè, a nhur te ndav na: Bi ga a mwosl a sam Naaman, ndo Syrie haha ɓai, aman a nco skwi man a shkè a vna te ri ɓai. Ara man Ndo nzi pèc pècèk a zhè, i hi a verzi nengaʼa, a i ngècè skwi te ri nengaʼa.

²¹ A Guéhazi a nhu a verzi Naaman, a Naaman a nrka ndo staɗ a hi a verzi nengaʼa, a nʼnzevahi te kikai, a ndo a ta zli gèɗ a vna, a ngaɗa: Amba tèlè genè dè?

²² A nengaʼa a ngaɗa: Amba tèlè genè! Bi ga a nzlindekayè, a i menda ka: Na haha, golahi nhadka ma Zhiklè cèw ta shkè a sam ga te za Ephraim. Vay Suli gozhèm 50.000 man i da ta, a dawar cèw.

²³ Naaman a ngaɗa: Hul Suli gozhèm 100! A mfa na a gèɗ a wuɗai, a mʼmana Suli go-zhèm 100.000 a maslaka, a mpa na dawar cèw a vaʼa, a mpa na tèlèba a ri golahi nengaʼa cèw, a ta zuɓa na.

²⁴ Aman Guéhazi a ndikè a Ophel, a nhul skwi tèlè te ri tengaʼa, a nʼngheda te gi na, a nzlinde ta ndohi a deɓa; a to do ta.

²⁵ A nengaʼa a mdo a gai a sam bi na. Elisée a ngaɗa na: Ka shkè tema, Guéhazi? Nengaʼa a ngaɗa: Bèl ngaya a nda a sama bai.

²⁶ Elisée a ngaɗa na: Mèzhèɓ ga a mdo a verzi ngaya ɓi ɗè? Mèzhèɓ ga a nrka bi dè? Aman ndo ngiɗè a mshkèhi te kikai a kin zlü gèɗ a vna? Anai ka ngots Suli ma, ka slaha ka shum maslaka, wof, gi lak, tambak, zlèhai, ɓèlèlihai, ngurhi a ngwozai.

²⁷ Aman hutsoɗ Naaman a da ga ka, a ndohi te verzi ngaya a ma ma. A nengaʼa a mdo auda, hutsoɗ a va, nslekaɗa ara mèrwèc.