II Rois 4 - Ma Zhiklè

Elisée a va na mbar a ngwoz mazai

¹ Ngwoz gol ndohi nhadka ma ngiɗè a ntsu ri a sam Elisée, a ngaɗa: Baki ga, hel ngaya, mʼmets na. Ka ha ka suna, ɓèl ngaya a nslubordo Zhiklè. Ndo man dua nengaʼa a zhè te ri na, a mshke, a woy aman a helamay wudahi ga cèw, a ga ta a ɓèlèlihai.

² Elisée a ngaɗa na: Ka woya man i ga ka mè? Skwi te gi ngaya a zhi ɗè? A ngwoz a ngaɗa: Skwa a te gi ɓèl ngaya bi fèt, sèi gatsak mbar staɗ.

³ Elisée a ngaɗa na: Dzhoɗo shiɗèf a duzlak man skwa a te pa ɓai a sam nslamagihi ngaya tèlèba. Kètè genè ka ɓai.

⁴ Te deɓaʼa do ngwai; aman kine a wudahi ngaya te gi ma, va-ɓara gai, a ka ngelda mbar nte gatsak ngaya a shiɗèfhi tèlèba. Shiɗèf man nʼndha, fedahai.

⁵ A nengaʼa a mdo na, a ngu arsa, a mɓara ntamagai, man nengaʼa a wudahi nengaʼa te pa. Wudahi ta pa na shiɗèf, a nengaʼa a ɓèlè a pa.

⁶ Aman shiɗèf nʼndha ma, a ngaɗa na kra nengaʼa ngiɗè staɗ: Vakay shiɗèf ngiɗè! A nengaʼa a ngaɗa na: Shiɗèf ngiɗè asaɓai! Te deɓaʼa mbar a shkè asaɓai.

⁷ A nengaʼa a mshkè, a nʼngra na ndo Zhiklè, a nengaʼa a ngaɗa: Co a ka preda mbar a ma, a ka pela dua ngaya a vna. Kinè a wudahi ngaya, va-ndau njèkèɗiaʼa!

Skwi man Elisée a mva na ngwoz te Sunem

⁸ Pats ngiɗè, aman Elisée a mbeza a kokwar Sunem, ngwoz mèshèlè ngiɗè a zhè, a mbaha na aman a dè a ndi skwi nʼndai te gi na. Te debaʼa, pèc pècèk aman a mbeza a pa, a dè aman a ndi skwi a sam na.

⁹ Ngwoz a ngaɗa na baki na: I suna, ndo matsa man a shkè a sam nga pèc pècèk, nengaʼa ndo Zhiklè nkezlaʼa.

¹⁰ Sèi nga rèm gi te géɗèʼa kètè, a nga pi sam mʼmènè, a table, a sam nʼnzai a pitirla a pa. Aman a shkè a sam nga, a slaha a nda nzi a pa.

¹¹ A pats ngiɗè aman a shkè a pa, a ndo a gi te géɗèʼa, a mʼmana a pa.

¹² Te deɓaʼa a ngaɗa na Guéhazi, ndo mizlinè nengaʼa: Bahka na ngwoz Sunem sa! A nengaʼa a mbaha na, a ngwoz a mshkè a sam na.

¹³ Elisée a ngaɗa na ndo mizlinè nengaʼa: Gada na: Na haha, ka woy nga da tsaka ka mè? Skwi man ka hérèʼa aman nga takaha ka a vna a zhi dè? Nga nza ka a deɓa a sam bi dè? A sam bi-sojè dè? Aman nengaʼa a ngaɗa: I te va gwoli ga, i nza genè.

¹⁴ A nengaʼa a za hérèʼa: Nga da va na mè? A Guéhazi a ngaɗa: Wuɗitpa, kra na azbai, baki nengaʼa nhala ma.

¹⁵ A Elisée a ngaɗa: Bahka na ngwoz! A nengaʼa a mbaha na, a nzlatsa a ntamagai.

¹⁶ A ngaɗa: A tèra, a sam aranta, ka da humbètè kra a ndav. A ngwoz a ngaɗa: Aʼai, bi ga, ndo Zhiklè, ka tsokol ma a sam ɓèl ngaya ɓai!

¹⁷ Aman ngwoz a nʼngots kra, a myu kra nguraʼa, ara man Elisée a mpasla na rai.

Kra ngwoz Sunem a mʼmets na

¹⁸ Kra a ngrè a ma ma. A pats ngiɗè man a ndo a verzi bab na a dak, a sam ndohi ntsi dau,

¹⁹ a ngaɗa na bab na: Aya, gèɗ ga, aya, gèɗ ga! A nengaʼa a ngaɗa na ndo mizlinè nengaʼa: Zuɓda ngwai a sam mam na!

²⁰ A nengaʼa a nzuɓda ngwai a sam mam na. A nengaʼa a mfeda a gsa, a nʼnza a pa ha géɗ pats, a mʼmets na.

²¹ A mam na a ndo a pa a gi te géɗèʼa, a mʼmandahi a sam mʼmènè ndo Zhiklè, a mɓarda ntamagi a pa, a ndo auda.

²² Te deɓaʼa a mbaha na baki na, a ngaɗa: Gaɗa na ndo mizlinè a nckoy kɗèh, a i hi a sam ndo Zhiklè, ga i shkè a deɓa.

²³ A nengaʼa a ngaɗa: Ka woy a ka dè a sam nengaʼa a patsna èhèmè? Ki nʼndev di ɓai, pats nshèk va ka ɓai. Aman ngwoz a ngaɗa: Amba genè!

²⁴ A mpeda skwi a deɓ kɗèh, a ngaɗa na ndo mizlinè nengaʼa: Mbolkoy kɗèh lèk-lèk, ka cèma na di ɓai, sèi man i gaɗa ka.

²⁵ A ngwoz a ndo a sam ndo Zhiklè a za Carmel. Ndo Zhiklè a nrka aman a shkè, aman dra dai, a ngaɗa na Guéhazi, ndo mizlinè nengaʼa: Na haha ngwoz Sunem!

²⁶ Hu a sam na, a ka gada na: Ka nza genè dè? Baki ngaya nʼnza genè dè? A ngwoz a ngaɗa: Nga nza genè.

²⁷ Te deɓaʼa a ndi-kè a sam ndo Zhiklè, a géɗ za, a mhul sak ndo Zhiklè, a mpeda a ndav. Guéhazi a woya a zukda deɓa; aman ndo Zhiklè a ngaɗa: Jèkeda, skwi ngiɗè a ndza na a ndav. Ndo nzi pèc pècèk a nʼngray ɓai, a ngaɗay ɓai.

²⁸ A ngwoz a ngaɗa: I dzhoɗo kra a sam bi ga dè? I gaɗa ka, ka tsokol ma a sam ga ɓai, i gaɗa ka bi dè?

²⁹ A Elisée a ngaɗa na Guéhazi: Dzawa va ngaya, ceda gada ga a rai, a ko do! Aman kin zli gèɗ a ndo ngiɗè, ka ga na mbali ɓai, aman ndo ngiɗè a ga ka mbalai, ka mbeɗa na a ma ɓai. Ka da feda gada a medi kra.

³⁰ Aman mam kra a ngaɗa: Ara man Ndo nzi pèc pècèk a zhè, ara man ka, ka zhè, i jèke ka azɓai. A nengaʼa a nslambaɗa, a mdo a verzi ngwoz.

Elisée a mbel kra

³¹ Guéhazi a mdo a ma ma, a mfeda gada a medi kra; aman klèng klèng, a shèffè azɓai. A nengaʼa a mshkè a deɓa, aman ta zli gèɗ a Elisée, a nʼngra na, a ngaɗa: Kra a slèmbèɗè azɓai.

³² A Elisée a mdo a gai, kra mʼmetsa, a sam mʼmènè na.

³³ A nengaʼa a mdo a gai, a mpizlè ntamagai, ta cèw tʼuda, a ntsu ri a Ndo nzi pèc pècèk.

³⁴ A nteva a géɗ sam mʼmènè, a ntuzloma na a gèɗ a kra, a mva na ma nengaʼa a géɗ ma kra, a mva na di nengaʼa a géɗ di kra, ri nengaʼa a géɗ ri kra, a ntuzloma na a géɗ kra, a va kra a ngu shukaʼa.

³⁵ A Elisée a nslambaɗa, a nsawala te gai, a mshkè a deɓa zaʼa, a ntuzloma na a géɗ a kra. Te deɓaʼa kra a ntsu wardèshèu, sak 7, a mwinè dai.

³⁶ A Elisée a mbaha na Guéhazi, a ngaɗa: Bahka na ngwoz Sunem! A nengaʼa a mbaha na, a ngwoz a mshkè a sam na. A ngaɗa: Co kra ngaya!

³⁷ A nengaʼa a nkalahi a deɓ sak nengaʼa, a ngurɓahai a sam na, a nco kra na, a ndo auda te gai.

Elisée a til lak

³⁸ Elisée a mʼmen na a deɓa a kokwar Guilgal, te va man mi a gi a kokwar. Aman golahi ndohi nhadka ma ta nza a sam na, a ngaɗa na ndo mizlinè nengaʼa: Ngeda shiɗèf mbiaʼa a vogwa, a ka ta ta skwi a golahi ndohi nhadka ma!

³⁹ Ngidè staɗ a dè auda a mpèr lak. A nʼngots sam ngiɗè te dak, a mpor skwi ngiɗè ara war-dèshèwaya, a nʼndhedkoɗa maslaka na, a ndo ngwai, a nfeɗda shiɗèf. A sun skwia ɓai.

⁴⁰ A ta ɓalda a gandaf, aman ndohi ta ndiaʼa. Aman ta te ma, ta boho a ta gada: Ndo Zhiklè, dèrè te gandaf! A ta slaha ta ndia ɓai.

⁴¹ A nengaʼa a ngaɗa: Va-hulkoy gufa! A nengaʼa a nkutèda va lak, a gandaf. A ngaɗa: Va ta ndohai a ta ndiaʼa! Dèrè a te pa asaɓai.

Elisée a mva ta movar a ndohai

⁴² Ndo ngiɗè a mshkè te Baal-Shalisha, a mposlko na solom dau a géɗ ma gai, a movar ngedemalaʼa 20 te gozhèm na. Elisée a ngaɗa: Va ta ndohai a ta ndiaʼa!

⁴³ Aman ndo mizlinè nengaʼa a ngaɗa: A slra ta ndohi 100 ɗè? Aman nengaʼa a ngaɗa: Va ta ndohai a ta ndiaʼa! aman Ndo nzi pèc pècèk a gada: Ta da ndiaʼa, a njèkèɗiaʼa a da jèkaha va.

⁴⁴ A mva ta, a ta ndau, a njèkèɗiaʼa a njèkaha va, ara man Ndo nzi pèc pècèk a goɗa.