II Rois 3 - Ma Zhiklè

Joram, bi Israel

¹ Joram, kra Achab, a ngu bi a géɗ Israel, te Samarie, aman Josaphat a ngu bi te Juda te mvi 18. Angu bi mvi 12.

² A nʼnga skwi man ambaha Ndo nzi pèc pècèk ɓai, aman holholaʼa ara nda bab na a mam na ka ɓai. Nengaʼa a mʼmbeɗda kwa Baal man bab nengaʼa a nzlatseda.

³ Aman mali Jéroboam, kra Nebath, man a pe ta ndohi Israel a wi a vna, a giaʼa genè, a njèkeda ɓai.

Elisée a va ta iyam a ndohi sojè

⁴ Mésha, bi Moab, rèwè tambak nengaʼa a zhè. A mvi a mvai a mpa na tambaki 100.000 a droki 100.000 ma ta zla gwotsa di ɓai a bi Israel, a skwi mpil gèɗ.

⁵ Aman Achab a mʼmets na, bi Moab a nslambaɗa na va a bi Israel.

⁶ Te ndev nasa, bi Joram te Samarie, a war ta ndohi var te Israel tèlèba.

⁷ Te deɓaʼa a nzlündo ndo a sam Josaphat, bi Juda, aman a gaɗa na: Bi Moab a nslambaɗkay a va. Ka woy a ka shkè a nga da gi var a Moab ɗè? A nengaʼa a ngaɗa: I dè. Nga a ka, nga staɗgenè; ndohi ga, ndohi ngaya; plèshi ga, plèshi ngaya.

⁸ Ngiɗè a ngaɗa: Nga bizhè nangwa? Josaphat a ngaɗa: Nga da bizhè a ndev hèshèkèd Edom.

⁹ A bi Israel, a bi Juda, a bi Edom, to do. Mʼmèn 7 ta a civèɗ, a iyam nsi ndohi var a skwihi a verzi tengaʼa, a nʼndev na.

¹⁰ Bi Israel a ngu wobau: Kos Ndo nzi pèc pècèk a mbaha ta bihi makar haha, a nda pe ta a ri a ndohi Moab, kè!

¹¹ Josaphat a ngaɗa: Ndo nhadka ma Ndo nzi pèc pècèk az a haha ɓi dè, a nga jhèɗè Ndo nzi pèc pècèk a sam na. Gol bi Israel staɗ a mʼmbeɗa na a ma, a ngaɗa: Elisée, kra Shaphath, a zhè a haha, man a hala na iyam a Elie.

¹² Josaphat a ngaɗa: Ma Ndo nzi pèc pècèk a zhè a sam na. A bi Israel, a Josaphat, a bi Edom, ta sulomahi a sam na.

¹³ Elisée a ngaɗa na bi Israel: Nga gakaɗa ka mè? Do a sam ndohi nhadka ma bab ngaya, a sam ndohi nhadka ma mam ngaya! Bi Israel a ngaɗa na: Aʼai! Aman Ndo nzi pèc pècèk a mbaha ta bihi makar haha, aman a mpa na a ri a Moab dè?

¹⁴ Elisée a ngaɗa: Ara man Ndo nzi pèc pècèk, Zhiklè bi wuɗai, a zhè, man i gi mizlinè nengaʼa. Aman a gèɗ Josaphat, bi Juda, ka ɓai, ar i rka ka a di azɓai, i fa ka gèɗ azɓai.

¹⁵ Aman va-bahkay ndo dimèsh. Aman ndo dimèsh a mirɗè ganzavar, ri Ndo nzi pèc pècèk a mshkè a gèɗ Elisée.

¹⁶ A nengaʼa a ngaɗa: Ndo nzi pèc pècèk a goɗa ar haha: Te nkulgodok haha, va-kala vèvèɗ, va-kala vèvèɗ!

¹⁷ Aman Ndo nzi pèc pècèk a goɗa ar haha: Ani kozlar a gi a sam kinè azɓai, a iyam a shkè a sam kinè azɓai. Aman ar haha ba, iyam a zhè te nkulgodok. A kinè ndohi var a skwihi kinè ta ngècè iyam nsai.

¹⁸ Aman Ndo nzi pèc pècèk a takaha kinè a vaʼa ba, a da pa ta ndohi Moab a ri a kinè.

¹⁹ Kin da duma kokwarhi nʼngala te pa tèlèba, kin ɗatsa wof mbelaʼa tèlèba, kin pizlè thal iyam tèlèba, a kin da dzakaɓda gi dau mbelaʼa tèlèba a kwa.

²⁰ Aman a prèk, aman ta vi skwi a Zhiklè, iyam a hakaɗi te man a. Edom, a nʼndha samaʼa a iyam.

Moab ngedas na

²¹ Ndohi Moab tèlèba ta tsenaʼa, aman bihi ta shkè a ta da gi var a tengaʼa. Ta ɓic ta ndohi var tengaʼa tèlèba, ko babgihai, a ta ɗaha va a kuma tengaʼa.

²² A prèk te gai, aman pats a pi sak a iyam, ndohi Moab ta rka iyam nduzoa ara Pombaz.

²³ A ta goɗ a va ta: Pombaz! Bihi matsa ta bazla va ta. Ndohi Moab, vo-do, a kin do dumkodai!

²⁴ A ta shkè a sam man ndohi Israel ta ɗaha va a pa. Aman ndohi Israel ta hakaɗauda a ta bazl ta ndohi Moab, a ta dzam ta, a to do a ma a ndev kokwar tengaʼa, a ta bazl ta ndohi Moab lèk lèk man ta hu ta auda a sam ta.

²⁵ A ta mbeɗda kokwar a hai. Gi dau mbelaʼa ta dzakaɓda a kwa, ndo staɗ staɗ tèlèba te va tengaʼa ta venda kwa a pa, a ta pizlè thal iyam tèlèba, a ta ɗots wof mbelaʼa tèlèba. Te Kir-Haréseth ta jèkeda, a ndohi vangava ta ngalda pa a ta kèl kwa a pá.

²⁶ Bi Moab a nrkaʼa, var a fena wuɗi na. A nhul ndohi tsakwal 700 a verzi nengaʼa, a woya ntsi gèɗ auda a hi a sam bi Edom. Aman ta slaha ɓai.

²⁷ Te deɓaʼa a nco tsuvom kra nengaʼa, ndo nʼndi gi bi nengaʼa, a nʼndara na zhiklè a géɗ zlazlar kokwar. A géɗ skwi haha ndohi Israel ta gu ndav kumba kumba, a ta jèkeda, a ta men ta a deɓa a ngwai.