II Rois 25 - Ma Zhiklè

Ta gso Sédécias

¹ Aman Sédécias a ngu bi te mvi 9, a ki 10, te mʼmèn 10, bi Nebucadnetsar, bi Babylone, a mshkè a nda ndohi var nengaʼa tèlèba, a ta nza na a ma kokwar Jérusalem, a ta tèuda zlazlar kokwar a pa a kolongwi var.

² Ta nza na a ma kokwar, ha Sédécias a ngu bi te mvi 11.

³ Te ki mafadaʼa, te mʼmèn 9, mi a zhè te kokwar mbiaʼa ma, a skwi nʼndi ndohi kokwar klèng ma.

⁴ A vaɗ ta zlün civèɗ te zlazlar kokwar, a ndohi var tèlèba ta wuc ta auda a civèɗ zlazlar sa, a ma gi lak bai. Ndohi Chaldée ta tèuda kokwar a pa dai. A to do a civèɗ ndè hèshè-kèɗ.

⁵ A ndohi var Chaldée ta hu a verzi bai. A ta ngotso tʼhèshèkèd Jéricho, a ndohi var nengaʼa tèlèba ta venda gèɗ ta, a ta jèkeda a pa.

⁶ A ta gso bai, a ta daʼa a sam bi Babylone, a kokwar Ribla, a ta gu kita nengaʼa.

⁷ Ta bazl ta wudahi Sédécias a sam di nengaʼa, a ta tuzko na di auda a nengaʼa, a ta dzawa a cèlèlèu züdo cèw, a ta daʼa kokwar Babylone.

Jérusalem ngedas na

⁸ A ki 5, te mʼmèn 7, te mvi bi Nebucadnetsar, bi Babylone, Nebuzaradan, bi sojè, bigol bi Babylone, a mshkè a kokwar Jérusalem

⁹ a nfa na vogwa a gi Zhiklè, agi bai, a gihi Jérusalem tèlèba. A gi ndohi mbibihiaʼa tèlèba, a nfa ta vogwa.

¹⁰ Ndohi var Chaldée tèlèba man ta zhè a verzi bi sojè, ta mbeɗda zlazlar Jérusalem a hai.

¹¹ Njèkèɗi ndohi te kokwar, a ndohi man ta humda va ta a bi Babylone, a njèkèdi ndohi nsun maya mizlinè, Nebuzaradan, bi sojè, a njèkè tengahiaʼa ngiɗè kètè, a nhel ta a bèlè.

¹² Bi sojè a njèka ta ndohi nkamaʼa, tengaʼa man ta pizhè gi lak, a ta pizhè gi dau.

¹³ Ndohi Chaldée ta pasla sak-gi züdo te gi Zhiklè aussa, a kokwi züdo, a skwi mpèn va züdo, man a zhè te gi Zhiklè; züdo, ta heldama a kokwar Babylone.

¹⁴ Gandaf ba, a kizlèɗ züdo, a gwèsh, a tassa a skwi züdo tèlèba man ta gu mizlinè a vna, ta heldama.

¹⁵ Shiɗèf nʼndèr skwai, a kokwi nguc Pombaz, skwi guro tèlèba, a skwi verzhègenè tèlèba, bi sojè a nheldama.

¹⁶ Sak-gi cèw, a skwi mpèn va nstaɗa sa, a kreblom man Salomon a gau te gi Zhiklè, kolongwi haha tèlèba, züdo kumba, skwi nɗèlè azɓai.

¹⁷ Sak-gi staɗ staɗ tèlèba, ngurè nengaʼa a tsi ri 18, züdo ngiɗè nʼnüɓda a pa. Ngurè züdo matsa a tsi ri makar. Zlèlè a skwi ndèlèlkaʼa a deɓ züdo nʼnüɓaʼa a pa, a tsagi tèlèba. Tèlèba a züdo. Sak-gi macecèwaʼa lèmèlèmè arsa. Skwi ndèlèlkaʼa 96, ta ksalda pa, tèlèba skwi ndèlèlkaʼa 100 te va zlèlè.

¹⁸ Te deɓaʼa bi sojè a nco Seraja, ndo mvi skwi a Zhiklè mbiaʼa, a Sophonie, macecèwaʼa a ndohi mɓer ntamagi makar.

¹⁹ A nco ndo mizlinè bi staɗ te kokwar, nengaʼa man ta feda a bi sojè, a ndohi ngiɗè 5, mandalahi bai, man ta zhè te kokwar, a ndo mwindè ɗèlèwer, a bi ndohi var, nengaʼa man a mpar ta ndohi te kokwar, a ndo mwindè ɗèlèwer, a bi ndohi var, nengaʼa man a mpar ta ndohi te kokwar, a ndohi kokwar 60, man ta zhè te kokwar.

²⁰ Tengaʼa tèlèba, Nebuzaradan, bi sojè, a nde ta a sam bi Babylone, a kokwar Ribla.

²¹ A bi Babylone a mbazl ta te Ribla, te herkeda Hamath. Ndohi Juda tèlèba ta hel ta auda te kokwar ta, a ɓèlè. Mʼmetsi Guedalia

²² A géɗ njèkèɗi ndohi man Nebucadnetsar, bi Babylone, a njèka ta te kokwar, a mfeda Guedalia, kra Achikam, kra Shaphan, a tsuvom ta.

²³ Bihi ndohi var, a ndohi tengaʼa, ta tsenaʼa, ara man bi Babylone a mfeda Guedalia a tsuvom ta. A ta shkè a sam Guedalia a kokwar Mitspa. Tengaʼa man ta shkè: Ismael, kra Nethania, Jochanan, kra Kareach, Seraja, kra Thanhumeth, te Nethopha, a Jaazania, kra Maacath; tengaʼa a ndohi tengaʼa.

²⁴ Guedalia a ngaɗa ta a mbèɗè, a ngaɗa ta ndohi tengaʼa tèlèba: Kin gu zlau ngi mizlinè a sam ndohi Chaldée ɓai! Va-nza a kokwar, va-gu ɓèl bi Babylone, a kin da nzi amba amba.

²⁵ A ki 7, Ismael, kra Nethania, kra Elishama, te verzi bai, a nda ndohi ngiɗè 10, ta keɗa Guedalia, a mʼmets na, a ndohi Juda a ndohi Chaldée tèlèba man ta zhè a sam na te Mitspa.

²⁶ Te deɓaʼa ndohi tèlèba, ko wudahai, ko ndohi ngraʼa, a bihi ndohi var, ta slambaɗa, a to do a kokwar Egypte, te man ta gu zlau ndohi Chaldée. Jojakin mpraʼa

²⁷ Mvi 37 te deɓ man ta da Jojakin, bi Juda, a ɓèlè, a ki 12, te mʼmèn 27, Evil-Merodac, bi Babylone, aman a ngu bi te mvi nengaʼa nshelèkuraʼa, a ntsu gumi a bi Jojakin, bi Juda, a mprokoɗauda te dangai.

²⁸ A ngaɗa na ma nhènèkèa, a mfeda a géɗ bihi tèlèba te kokwar Babylone.

²⁹ A nsuɗama na maslaka dangai auda a va, a Jojakin a nʼndau skwi a sam na pèc pècèk, a pats nshèffè nengaʼa tèlèba.

³⁰ A nciɗ sam a nciɗ sam, bi Babylone a mva na kolongwi na, a pats nshèffè Jojakin tèlèba.