II Rois 23 - Ma Zhiklè

Josias a jèngè ɗèlèwèr a sam ndohai

¹ Bai a nzlündo ndo, a ndohi nhalaʼa te Juda, te Jérusalem, tèlèba ta ɓicko va a sam na.

² Bai a ndo a gi Zhiklè, a ndohi Juda tèlèba, a ndohi Jérusalem tèlèba, a ndohi mvi skwi a Zhiklè, a ndohi nhadka ma, a ndohi kokwar tèlèba, ko wudahi ba, ko ndohi ngraʼa ba, to do a verzi nengaʼa. A nengaʼa a njènga ta ma tèlèba te ɗèlèwèr nderzlè-ma man ta ngots te gi Zhiklè.

³ Bai a nzlatsa a sam man a zlatsa a pa pèc pècèk, a ta da derzlè ma a Zhiklè, a ngaɗa: Nga da gshè ndav a ka, nga da jèjèr ma nkwèr ngaya, ma malwuɗi ngaya, ma ngaya man a de nga, a ndav nga tèlèba, a nshèffè nga tèlèba, a nga gi ara man ka goɗ te nderzlè-ma te ɗèlèwer haha. A ndohi tèlèba ta co nder-zlè-maʼa.

Josias a gedassa sam mʼmbèh skwai

⁴ Te deɓaʼa, bai a njè na ma a gèɗ a Hilkija, ndo mvi skwi a Zhiklè mbiaʼa, a ndohi mvi skwi a Zhiklè te deɓ nengaʼa, a ndohi mɓer ntamagai, a ta hulko kolongwi auda te gi Zhiklè, kolongwi tèlèba man ta gau a géɗ Baal, a géɗ mblom, a géɗ zhiklehi mʼmbèh skwi tèlèba. A Hilkija a mfa na vogwa a dal kokwar Jérusalem, te dak a ma woyam Cédron; mèrwècèʼa ta hulkoɗi a Bethel.

⁵ A ndzam ta ndohi mvi skwi a tengaʼa auda te mizlinè ta, man bihi Juda ta pe ta a mizlinè, man ta ndèr burdi a géɗ za, te kokwar Juda, a sam Jérusalem tèlèba, a tengaʼa man ta ndara na burdi a Baal, a pats a kia a bantihai, tʼhwaɗ giɗfèk tèlèba.

⁶ A nckoɗi mblom auda te gi Zhiklè, a dal Jérusalem, a ma woyam Cédron, a ta fa na vogwa te slrats Cédron, a ta kutèda mèrwècèʼa a ma gidzavi ndohi kokwar.

⁷ A mbeɗda gi ndohi mphömè ngwoz a ma gi Zhiklè a hai, man ngwozi ta tsu maslaka mblom Astarte te pa.

⁸ Te deɓaʼa mbaha ta ndohi mvi skwi a Zhiklè tèlèba te Juda, a ta kwola sam mvi skwi a zhiklè a géɗ za, sam man ndohi mvi skwi a Zhiklè ta ndor Burdi, a hinè te Guéba, ha ndè Beer-Shéba. A mbeɗda gi madzagi aussa man a zhè a ntamagi Jo-sué bi kokwar; a ntamagi kokwar te civèɗ ri gula.

⁹ Aman ndohi mvi skwi a zhiklè a géɗ za to do a sam mvi skwi a Ndo nzi pèc pècèk te Jérusalem ɓai. Ta ndau movar a sam kramamhi ta genè.

¹⁰ A ngedassa Topheth te slrats Hinnom, aman ko ndo staɗ a nzlinda kra nengaʼa, man ɓai dem nengaʼa, a mbizhè a vogwa te deɓaʼa asaɓai, a ta slébèrdè Moloc asaɓai.

¹¹ Plèsh man bihi Juda ta Zlatseda a ntamagi Zhiklè a ta slébèrdè zhiklèhi pats a vna, a nhulkoɗauda, a mpe ta a ma gi Nethan-Mélec, ntokotaslbai te daɓagai. A nfa na vogwa a kiki zhiklè pats.

¹² Sam mʼmbèh skwai man ta zhè a géɗ gai, te gi Achab man a géɗèʼa, man bihi Juda ta gau, a sam mʼmbèh skwai man Manassé a ngau te gi nʼngalaʼa cèw te gi Zhiklè, bai a mbeɗdahai, a mbatsaha pa, a ta ksardaussa a woyam Cédron.

¹³ Sam mʼmbèh skwai man ta zhè zuraʼa a ma kokwar Jérusalem, a der za wof tsna, te man a tsagai, man Salomon, bi Israel, a nroma, a nslébèrdè Astartè a vna, skwi ndohi Sidon mphomdaʼa, a Kamosh, skwi Moab mphomdaʼa, a Milcom, skwi hori ndohi Ammon, bai a ngedasedaussa.

¹⁴ A mʼmbeɗda kwa nzlatsedaʼa, a nʼngelda wof mblom a hai, a nʼndha samaʼa a vatasl nckondohai.

¹⁵ Lèmèlèmè sam mʼmbèh skwai te Béthel, a sam mʼmbèh skwai a géɗ za man Jéroboam, kra Nebath, man a mpe ta ndohi Israel a wi a vna, sam mʼmbèh skwi haha ba, a sam mʼmbèh skwi a géɗ za, a ngedasedaussa, a mbazla zhiklèhi tengaʼa, a nkerɗda pa, a nfa na vogwa a mblom.

¹⁶ A man Josias a mpu di a deɓa, a nrka gidzavihai a géɗ za, a nzlündo ndo, da hulko vatasl nckondohi ndohi mʼmbèh skwai auda te vèvèɗ. A nfa na vogwa a géɗ sam mʼmbèh skwai, a nderdèʼa a vna, ara man Ndo nzi pèc pècèk a goɗ te ma ndo Zhiklè (man Jéroboam a nzlatsa a sam mvi skwi a Zhiklè, a pats ngolala). Te deɓaʼa a mpu di a deɓa, a nrka gidzavi ndo Zhiklè man a nhodko ma haha.

¹⁷ A ngaɗa: Gidzavi ngiɗè man i rka haha, a ngè? A ndohi kokwar ta gaɗa na: Gidzavi ndo Zhiklè man a mshkè te Juda, a nhodko ma a géɗ skwi tèlèba man ka gu antanta a sam mvi skwi a Zhiklè te Béthel.

¹⁸ A nengaʼa a ngaɗa: Da nze na! Ndo da lama na ckondo nengaʼa ɓai! A nckondo nengaʼa a nʼnza te vèvèɗ a sam nckondo ndo nhadka ma man a mshkè te Samarie.

¹⁹ Josias a ngedassa gi mʼmbèh skwi tèlèba a géɗ za, man ta zhè te kokwar Samarie, man bihi Israel ta gau a ta poko na gèɗ ndav auda a Ndo nzi pèc pècèk a vna.

²⁰ A mbazl ta ndohi mʼmbèh skwai a géɗ za, tèlèba man ta zhè a pa, a nfa ta vogwa a vatasl nckondohi ta. Te deɓaʼa a ndo na a deɓa a Jérusalem.

Ngolala Pâque Josias

²¹ Bai a njè ta ma a gèɗ a ndohi tèlèba, a ngaɗa: Va-gu ngolala Pâque, a nslébèrdè Ndo nzi pèc pècèk, Zhiklè kinè, ara man ta Windo te ɗèlèwèr nderzlè-ma.

²² Daga pats man ndohi kita ta zhè te Israel, a bihi Israel a Juda ta zhè, ta ga ngolala Pâque arsa ɓai.

²³ Sèi te mvi 18, man Josias bai, man ta gu ngolala Pâque te Jérusalem arsa, a nslébèrdè Ndo nzi pèc pècèk.

²⁴ A ndohi vrai, a ndohi mpi kwa, a Theraphimhai, a skwi mʼmbèh skwi ambaɓihiaʼa, a skwi hori tèlèba man a zhè te kokwar Juda, te Jérusalem tèlèba, Josias a nzeda, a njèjèr ma kita man a Windo te ɗèlèwèr man Hilkija, ndo mvi skwi a Zhiklè, a nʼngots te gi Zhiklè.

²⁵ Bi ngiɗè gar nengaʼa azɓai, man a ngwodko ndav tèlèba a sam Ndo nzi pèc pècèk, a nshèffè tèlèba, a wuɗi nengaʼa tèlèba, ara man ma kita Moise a ngod tèlèba, ngiɗè az arsa ɓai, a ma ma ba asaɓai.

²⁶ Ko gar haha Ndo nzi pèc pècèk a gi ndav kumba genè, a ndav a ndza na a géɗ Juda genè, a géɗ skwi man Manasse a mpoko na gèɗ ndav auda a vna.

²⁷ Ndo nzi pèc pècèk a gada: Ko Juda ba, i da dzama na auda dra a sam di ga, lèmèlèmè ara man i dzama Israel. A i kwola kokwar haha, Jérusalem, man i ngotskoɗauda, a gi ba, te nengaʼa man i gada: nzlembaɗ ga a da nzi a pa, i da kwolaʼa.

Mʼmetsi Josias

²⁸ Ma ngiɗè a géɗ mizlinè Josias, a géɗ skwi tèlèba man a gau, ta windeda dèlèwèr ma bihi Juda.

²⁹ Te ndev nasa, Pharaon Néco, bi Egypte, a mshkè a nda gi var a bi Assyrie, a ma woyam Euphrate. A bi Josias a mshkè, aman ta zli gèɗ a ta gi var. Aman Pharaon a nrkaʼa, a nkeɗaʼa te Meguiddo.

³⁰ A golahi nengaʼa ta da nckondo nengaʼa a kokwar Jérusalem. Ta rda a pa. Te deɓaʼa ndohi kokwar ta feda Joachaz, kra Josias, a bai. Ta bada na mbar a gèɗ, te di man a bab na.

Joachaz a gi bi a géɗ Juda

³¹ Mvi Joachaz 23, man ta feda a bai, a ngu bi te Jérusalem ki makar. Nzlembaɗ mam na Hamuthai, dem Jérémie, te Libna.

³² A nengaʼa a nʼnga skwi man ambaha Ndo nzi pèc pècèk ɓai, tèlè lèmèlèmè ara man babhi nengaʼa ta gau.

³³ Pharaon Néco a ngso, a ndzawaʼa te Ribla, te kokwar Hamath. Aman a slaha a ngi bi te Jérusalem asaɓai. A njhèdè kokwar aman ta pela na gèɗ, verzhègenè 100.000 a guro 60.000.

³⁴ Pharaon Néco a mfeda Eliakim, kra Josias, a bai te di man a Josias, bab na, a nhumbaɗa nzlembaɗ nengaʼa, a mbaha na Jojakim. Joachaz, a nceda a verzi nengaʼa, a kokwar Egypte. A mʼmets na a pa.

³⁵ Jojakim a mpela na gèɗ, verzhègenè a guro, a Pharaon. Aman a ngècè sulai, ara man Pharaon a woyaʼa, sèi a ngra ta ndohi kokwar, a mwindo nzlembaɗ ta staɗ staɗ tèlèba, a ndo a mpil gèɗ ara man ta Windo te dèlèwèr, a ntsokol skwi mpil gèɗ te ri ndohi kokwar tèlèba a wuɗai, verzhègenè a guro, aman a va na Pharaon Néco.

Jojakim a gi bi a géɗ Juda

³⁶ Mvi Jojakim 25, aman ta feda a bai, a ngu bi te Jérusalem mvi 11. Nzlembaɗ mam na Zebudda, dem Pedaja, te Ruma.

³⁷ Jojakim a nʼnga skwi man ambaha Ndo nzi pèc pècèk ɓai, tèlè lèmèlèmè ara babhi nengaʼa.