II Rois 22 - Ma Zhiklè

Josias a gi bi a géɗ Juda

¹ Mvi Josias 8, aman ta feda a bai, a ngu bi te Jérusalem mvi 31. Nzlembaɗ mam na Jedida, dem Adaja, te Botskath.

² Josias a ngu skwi nzuraʼa sam di Ndo nzi pèc pècèk, a ndzodzor civèɗ David, bab na, tèlèba. A mbeza zlawa ɓai.

Hilkija a nʼngots ma kita

³ Te deɓaʼa aman bi Josias a ngu bi te mvi 18, bai a zlinda Shaphan, ndo mwindè ɗèlèwèr, kra Atsalia, kra Meshullam, ndo mɓer Suli a gi Zhiklè, a ngaɗa:

⁴ Do a sam Hilkija, ndo mvi skwi a Zhiklè mbiaʼa, da ngra Suli man ndohi ta hulkoda gi Zhiklè, man ndohi mɓer ntamagi Zhiklè ta tsokolkoɗi a sam ndohai.

⁵ Da pa ta a ri a ndohi mizlinè, tengaʼa man ta ɓer mizlinè a ta til gi Zhiklè, aman ta pil ta ndohi man ta gi mizlinè gi Zhiklè, a ta tila sam ngedassaʼa.

⁶ A ndohi mbèzl wof, a ndohi nrèm gai, a ndohi ndizlè gai, a ta shum wof a kwa mpaslaʼa a vna, aman ta til gai a sam man ngedassaʼa.

⁷ Aman da dzhaɗ ta te deɓaʼa a géɗ Suli man ta pa ta a ri bai, te man ta gi skwi nzuraʼa.

⁸ Hilkija, ndo mvi skwi a Zhiklè mbiaʼa, a ngaɗa na Shaphan, ndo mwindè ɗèlèwèr: I ngots ɗèlèwer ma kita te gi Zhiklè. A Hilkija a mva na ɗèlèwer a Shaphan, a nengaʼa a njongo.

⁹ Shaphan, ndo mwindè ɗèlèwèr, a mshkè a sam bai, a mʼmenda na bai, a ngaɗa: Ɓèlèlihi ngaya ta hulko sulai man ta ngots te gi Zhiklè, a ta pa ta a ri ndohi mizlinè, a tengaʼa man ta ɓer mizlinè gi Zhiklè.

¹⁰ Te debaʼa Shaphan, ndo mwindè ɗèlèwèr, a ngra na bai, a ngaɗa: Hilkija, ndo mvi skwi a Zhiklè mbiaʼa, a mvay ɗèlèwèr ngiɗè; a Shaphan a njènga na bai.

¹¹ Aman bai a ntsena ma te ɗèlèwèr ma kita, a nkuratseda maslaka nengaʼa aussa.

¹² Te deɓaʼa bai a nfa ta ma a gèɗ a Hilkija, ndo mvi skwi a Zhiklè, a Achikam, kra Shaphan, a Achor, kra Michée, a Shaphan, ndo mwindè ɗèlèwèr, a Asaja, bigol bai, a ngaɗa:

¹³ Vo-do, vo-dzhoɗo a sam Ndo nzi pèc pècèk a géɗ ga, a géɗ ndohai, a géɗ Juda tèlèba, a géɗ ma ɗèlèwèr haha man ta ngotso; aman Ndo nzi pèc pècèk a gi ndav kumba a géɗ nga, a géɗ man babhi nga ta fa na gèɗ a ma ɗèlèwèr haha tèlè ɓai.

¹⁴ Hilkija, ndo mvi skwi a Zhiklè, Achikam, Achor, Shaphan a Asaja, to do a sam Hulda, ngwoz man a hodko ma, ngwoz ndo mɓer gi Shallum, kra Thikva, kra Harhas, Nengaʼa a nʼnza te Jérusalem, te tsagi mɓuaʼa. A ta tsu tsaval a vna.

¹⁵ A nengaʼa a ngaɗa ta: Ndo nzi pèc pècèk, Zhiklè Israel, a goɗa ar haha: Vagaɗa na ndo nzlindeka kinè a sam ga:

¹⁶ Ndo nzi pèc pècèk a goɗa ar haha: Na haha i da zlindè matakwan a sata, a géɗ ndohi kokwaraʼa, skwi tèlèba man a Windo te ɗèlèwèr man bi Juda a njongo.

¹⁷ A géɗ man ta jèkyè, a ta ndara na ɓurdi a zhiklèhi ngiɗè tsaɗ, a ta pokoy gèɗ ndav auda a skwi man ri tengaʼa a ngau tèlèba. Ndav ga a vècè ara vogwa, a mènèhi azɓai.

¹⁸ A kin gaüa na bi Juda, man a nzlindeka kinè, aman kin jhèüè Ndo nzi pèc pècèk, ar haha: Ndo nzi pèc pècèk, Zhiklè Israel, a goɗ ar haha: Ka tsena ma man i goɗ tèlèba.

¹⁹ A géɗ man ka hur te ndav ngaya a ka manda gèɗ a hi a sam Ndo nzi pèc pècèk a pats man ka tsena ma man i goɗ a géɗ sam haha, a géɗ ndohi kokwaraʼa, ara man i phomde ta, a ta ndi a skwi man a ndèrè a ndo; a géɗ man ka kuratseda maslaka ngaya aussa, a ka kuɗau a sam ga – i ba i tsena ntsi ri ngaya, Ndo nzi pèc pècèk a gada.

²⁰ Gar haha ka dè vèvèɗ a gumai, man ka da metsi ngaya a va babhi ngaya. Di ngaya a da rka matakwan man i da ga na kokwar haha asaɓai. A ta menda na bi arsa.