II Rois 21 - Ma Zhiklè

Manassé a mbèh skwi zaʼa

¹ Mvi Manassé 12, aman ta feda a bai, a ngu bi te Jérusalem mvi 55. Nzlembaɗ mam na Hephtsiba.

² Nengaʼa a nʼnga skwi man ambaha Ndo nzi pèc pècèk ɓai, a ndzodzor mali man a ndèrè a ndo, man ndohi herkeda ngiɗè ta giaʼa, man Ndo nzi pèc pècèk a ndzam ta auda a ma ndohi Israel.

³ Nengaʼa a hüno a nrom sam mʼmbèh skwai a géɗ za, man Ezéchias, bab na, a mbeɗdaussà zaʼa, a ngau sam mvi skwi a Baal. A ngau mblom, lèmèlèmè ara man Achab bi Israel, a ngau, a ntsu ri a bantihai, a kia, a pats te giɗfèk, a ndzodzora.

⁴ A nrom sam mvi skwi tsaɗ tsaɗ te gi Zhiklè, man Ndo nzi pèc pècèk a gaɗa: Te Jérusalem, nzlembaɗ ga da nza a pa.

⁵ A nrom sam mvi skwi a bantihai te giɗfèk tèlèba te gi nʼngalaʼa cèw ba te gi Zhiklè.

⁶ A nzlündo kra nengaʼa a vogwa, a ɗèl skwi te bantihai, a pi kilèa, a ngu vrai, a pi kwa, a ngu skwi man ambaha Ndo nzi pèc pècèk bi kumba kumba, a mpoko na gèɗ ndav auda a vna.

⁷ Mblom, skwi mʼmbèh skwai man a gau, a mfeda a gi Zhiklè, a géɗ nengaʼa man a gada na David a Salomon, kra nengaʼa: Te gi haha, te Jérusalem, man i ngotskoɗauda te va verzi ndohi Israel tèlèba, i da feda nzlembaɗ ga a pa a mèdèp.

⁸ A ndohi Israel da mbatsa auda a kokwar ngiɗè bai a mèdèp, a ta nzi a kokwar man i va ta babhi ta. Aman sèi man ta fi gèɗ a ma nkwèr ga tèlèba, a ta jèjèr ma kita man Moise, ɓèl ga, a mva ta tèlèba.

⁹ Aman ta ga arsa bai, a Manassé a nzlakede ta, a ta gu skwi man ambaɓi holholaʼa, a fena ndohi herkeda ngiɗè man Ndo nzi pèc pècèk a ndzam ta auda a ma ndohi Israel.

Zhiklè a nhodko ngédèshè Juda

¹⁰ Te deɓaʼa Ndo nzi pèc pècèk a goɗ te ma ndohi nhadka ma, ɓèlèlihi nengaʼa, a ngaɗa:

¹¹ A géɗ man Manassé, bi Juda, a ngau skwi man a ndèrè a ndo, a géɗ man a ngau skwi ambaɓiaʼa a fena ndohi Amor mpats ngiɗè, a nkalda Juda a malai a mbèh skwi nengaʼa man ambaɓiaʼa,

¹² a géɗ skwi haha, Ndo nzi pèc pècèk, Zhiklè Israel, a gada: Na haha i kalde Jérusalem a Juda a matakwan, a zlembaɗ ndohi tèlèba man ta tsenaʼa, a gi ngummaʼa.

¹³ I woy a i livè Jérusalem a teɓa Samarie, a i nzhidèʼa a kilo, ara ndohi gi Achab. I sahda Jérusalem aussa ara gandaf man ta saha a ta tuzlomdahai.

¹⁴ Njèkèɗi ndohi nʼndi gi ga, i kwolaʼa, i pe ta a ri a mayamhi tengaʼa, a ndohi mayamhi tengaʼa tèlèba ta da dum ta, a ta da hel ta ma.

¹⁵ A géɗ man ta gau skwi man ambahayè ɓai, a ta pokoy gèɗ ndav auda, a hinè a pats man babhi tengaʼa ta shkè auda te kokwar Egypte, ha patsna.

¹⁶ Manassé a mbazl ta ndohi man mali ta azɓai, Pombaz tengaʼa te Jérusalem a hi a civèɗ ngiɗè, a hi a civèɗ ngiɗè; a ngu mali a vata, man a mpe ta ndohi Juda a wai, a ta gu skwi man ambaha Ndo nzi pèc pècèk ɓai.

¹⁷ Ma ngiɗè a géɗ Manassé, a géɗ skwi tèlèba man a gau, a géɗ mali man a ngau, ta windeda ɗèlèwèr ma bihi Juda.

¹⁸ Te deɓaʼa Manassé a mʼmets na a va babhi na, a ta rda a gi lak a sam gi na, te gi lak Uzza. A Amon, kra nengaʼa, a ngu bi te di man a nengaʼa.

Amon a gi bi a géɗ Juda

¹⁹ Mvi Amon 22, aman ta feda a bai, a ngu bi te Jérusalem mvi cèw. Nzlembaɗ mam na Meshullémeth, dem Haruts, te Jotha.

²⁰ Amon a nʼnga skwi man ambaha Ndo nzi pèc pècèk ɓai, lèmèlèmè ara Manassé, bab nengaʼa.

²¹ A nengaʼa a ndzodzor civèɗ bab na tèlèba, a ndzodzor mbèh skwi ambaɓiaʼa, lèmèlèmè ara bab na, a ntsu ri a tengaʼa.

²² A njè-keda Ndo nzi pèc pècèk, Zhiklè babhi na, a ndzadzara civèɗ Ndo nzi pèc pècèk ɓai.

²³ Golahi Amon ta hüno a ta vhè ma a géɗ nengaʼa, a ta keɗa bai te gi nengaʼa.

²⁴ Aman ndohi a vara ta bazl ta ndohi mvhè ma a géɗ bi Amon tèlèba, a ndohi a vara ta feda Josias, kra nengaʼa, a bai te di man a nengaʼa.

²⁵ Ma ngiɗè a géɗ mizlinè Amon, a géɗ skwi man a gau, ta windeda ɗèlèwèr ma bihi Juda.

²⁶ A ta rda a gi dzavi nengaʼa, te gi lak Uzza, a Josias, kra nengaʼa, a ngu bi te di man a nengaʼa.