II Rois 2 - Ma Zhiklè

Elie a dè na zhiklè

¹ Ga Ndo nzi pèc pècèk a nda Elie a zhiklè te va ndombozlor, Elie a Elisée to do Guilgal.

² Elie a ngaɗa na Elisée: Nza a haha! Ndo nzi pèc pècèk a nzlendyè a kokwar Bethel. Aman Elisée a ngaɗa: Ara man Ndo nzi pèc pècèk a zhè, ara man ka, ka zhè, i jèke ka azɓai. A to do Bethel cèw ba.

³ Golahi ndohi nhadka ma te Béthel ta shkè a sam Elisée, a ta gada na: A patsna Ndo nzi pèc pècèk a da cèma ka babgi ngaya, ka sun dè? A nengaʼa a ngaɗa ta: I ba i suna. Va-nze kinè tètè genè!

⁴ Elie a ngaɗa na: Elisée, nza a haha! Aman Ndo nzi pèc pècèk a nzlendyè a kokwar Jéricho. Aman nengaʼa a ngaɗa: Ara man Ndo nzi pèc pècèk a zhè, ara man ka, ka zhè, i jèke ka azɓai. A to do Jéricho cèw ba.

⁵ Golahi ndohi nhadka ma te Jéricho ta shkè a sam Elisée a ta gada na: A patsna Ndo nzi pèc pècèk a da cèma ka babgi ngaya, ka sun dè? A nengaʼa a gada: I ba i suna: Va-nze kinè tètè genè!

⁶ Elie a ngaɗa na: Nza a haha! Aman Ndo nzi pèc pècèk a nzlendyè a ma woyam Jourdain. Aman nengaʼa a ngaɗa: Ara man Ndo nzi pèc pècèk a zhè, ara man ka ba, ka zhè, i jèke ka azɓai. A to do cèw ba.

⁷ Golahi ndohi nhadka ma 50 to do a verzi tengaʼa, a ta zlatsa zuraʼa a ma tengaʼa, dra kètè. Elie a Elisée to do a ma woyam Jourdain.

⁸ A Elie a nco dawar na, a mpaɗaʼa, a ntseda a géɗ iyam, a iyam a nʼngel na cèw, a ta tawaɗa auda cèw ba, iyam az a sak ta ɓai.

⁹ Aman ta tawaɗa woyam ma, Elie a ngaɗa na Elisée: Dzhoɗo skwi man ka woya te ri ga, ga Ndo nzi pèc pècèk a cyè auda a sam ngaya. Elisée a ngaɗa: I woy Mèzhèɓ ta ta man a ngaya cèw.

¹⁰ A ngaɗa: Ka dzhoɗ skwi mwuɗitpa. Aman ka da rka ara man i dè ga auda a sam ngaya, ka da ngècèʼa. Man ɓai, ka da ngècèʼa azɓai.

¹¹ Aman ta a civèɗ, ta tsu tsaval aranta. A vogwa a mshkè ara kikai, a vogwa ara plèshihai man kiki a verzi ta, a zhè te ndev tengaʼa. A Elie a mdo zhiklè te va ndombozlor.

¹² Elisée a nrkaʼa, a mboho: Bab ga, bab ga, kiki Israel a ndohi plèsh nengaʼa! Te deɓaʼa a nrkaʼa asaɓai. A nkuratsa maslaka nengaʼa te va cèw.

¹³ Te deɓaʼa a nco dawar Elie man a kal te ri Elie, a mʼmen na a deɓa a ma woyam Jourdain.

¹⁴ A nco dawar Elie man a kalkaɗahi a géɗ nengaʼa, a ntseda a géɗ iyam (aman iyam nʼngel ɓai). Te deɓaʼa a ngaɗa: Ndo nzi pèc pècèk, Zhiklè Elie, tema? A ntseda a géɗ iyam zaʼa, a iyam a nʼngel na cèw. A Elisée a ntawaɗ na auda.

¹⁵ Golahi ndohi nhadka ma te Jé-richo, man ta zlatsa te wud woyam, ta rkaʼa ta goɗ a va ta: Mèzhèɓ Elie a zhè a géɗ Elisée. A ta shkè, aman ta zli gèɗ a vna, a ta gurɓahai a sam na.

¹⁶ Ta gada na: Na haha te va ɓèlèlihi ngaya ngul ndohi 50 ta zhè. Va ta civèɗ, a ta da woyko babgi ngaya. Nsun wa, gar Ndo nzi pèc pècèk a mco, a nkalda a géɗ za ngiɗè, gar a nkulgodok ngiɗè. Aman nengaʼa a ngaɗa: Kin do ɓai!

¹⁷ A ta jèjèrèʼa genè, a ta gada na genè, a nengaʼa a ngaɗa: Vo-do! A ta zlinde ta ndohi 50 man ta woyo, mʼmèn makar, aman ta ngatsa ɓai.

¹⁸ A ta shkè a deɓa a sam Elisée. Nengaʼa a nʼnza te Jéricho. A nengaʼa a ngaɗa ta: Kin do ɓai, i gada kinè ɓi dè?

Elisée a til iyam Jéricho

¹⁹ Ndohi te kokwar ta gada na Elisée: Ara man bi nga a rkaʼa, sam nʼnzi te kokwar haha amba. Aman iyam ambaɓai, herkeda a gédèshè a vna.

²⁰ Elisée a ngaɗa: Va-vokoy kokwi mɓuaʼa! Vo-poko boma a pa! A ta voko na.

²¹ A nengaʼa a ndo a sam nlèlè iyam a vna, a mpeda boma a pa, a ngaɗa: Ndo nzi pèc pècèk a goɗ ar haha: I tila iyam haha ma; ani amba, a kéɗè ndo asaɓai, a gédèshè skwa asaɓai.

²² A iyam ntila ha patsna, ara man Elisée a goɗa.

Elisée a mphomde ta wudahai 42

²³ Te pa a mdo a kokwar Béthel. Aman a zhè a civèɗ, wud golahi ta shkè auda te kokwar, a ta durɗo. Ta gada na: Do a géɗèʼa, nkurndazlndazlagèɗ! Do a géɗèʼa, nkurndazlndzazlagèɗ!

²⁴ A Elisée a nʼngwoda ta ma a va, a mpa ta dai, a mphomde ta a nzlembaɗ Ndo nzi pèc pècèk. A kokoyahi cèw ta hakaɗi te za, ta rats ta wudahi 42 a ma.

²⁵ Te pa a mshkè a deɓa a za Carmel, a ndo deɓa a kokwar Samarie.