II Rois 18 - Ma Zhiklè

Ezéchias a gi bi a géɗ Juda

¹ Aman Osée, kra Ela, a ngu bi te Israel, te mvi mamakaraʼa, ta feda Ezéchias, kra Achaz, a bi te Juda.

² Mvi nengaʼa 25, aman ta feda a bai, a ngu bi te Jérusalem mvi 29. Nzlembaɗ mam na Abi, dem Zacharie.

³ Ezéchias a ngau skwi nzuraʼa a sam di Zhiklè, lèmèlèmè ara David, babab na.

⁴ Nengaʼa a ngedassa sam mvi skwi a Zhiklè a gèɗ za, a mʼmbeɗka ta kwa nzlatsedaʼa a hai, a nʼngelda mblom a hai, a mpasla zhüzhok züdo man Moise a gau. Ha pats sa, ndohi Israel ta ndara na ɓurdi, a ta baha na Nehushtan.

⁵ Nengaʼa a mpu ndav na a Ndo nzi pèc pècèk, Zhiklè Israel, ngiɗè gar nengaʼa azɓai te va bihi Juda tèlèba man ta zhè te deɓ nengaʼa, man ta zhè ga nengaʼa a mshkè.

⁶ Nengaʼa a mpu ndav a Ndo nzi pèc pècèk, a njèkeda civèɗ nengaʼa ɓai, a ndzodzor ma nkwèr man a njè na a gèɗ a Moise.

⁷ Ndo nzi pèc pècèk a zhè a nda nengaʼa. Skwi tèlèba man a giaʼa, ngu amba amba. A nslambaɗa na va a bi Assyrie, a mpa na mpil gèɗ te deɓaʼa asaɓai.

⁸ Nengaʼa man a mbazl ta ndohi Philistie, ha ndè Gaza a kokwar man a tsagiaʼa, a hüno a sam gi-mɓer kokwar, ha ndè a kokwar nʼngalaʼa.

Salmanasar a duma Samarie

⁹ Aman Ezéchias a ngu bi te mvi mafaɗaʼa, a Osée, kra Ela, bi Israel, a ngu bi te mvi matsaradaʼa, Salmanasar, bi Assyrie, a mshkè a nʼnza na a ma Samarie.

¹⁰ Te deɓ mvi makar, ta dumaʼa. Aman Ezéchias a ngu bi te mvi mamokwaʼa, a Osée, bi Israel, a ngu bi te mvi macüɗaʼa, bi Assyrie a nceda kokwar Samarie a ma.

¹¹ A nhel ta ndohi Israel a ɓèlè a kokwar Assyrie, a mpe ta a kokwar Chalach, a gèɗ za Chabor, a ma woyam Gozan, a kokwarhi mbibihiaʼa te Mèdes,

¹² a gèɗ man ta dzodzor ma Ndo nzi pèc pècèk, Zhiklè tengaʼa, ɓai, a gèɗ man ta tawaɗaha nderzlè-ma nengaʼa. Skwi tèlèba man Moise, ɓèl Ndo nzi pèc pècèk a njè ta a gèɗ, ta fa na gèɗ ɓai, ta dzadzara ɓai.

Sanchérib a gi var a Juda

¹³ Aman Ezéchias a ngu bi te mvi 14, Sanchérib, bi Assyrie, a mshkè a ngu var a kokwarhi nʼngalaʼa te Juda tèlèba, a ndum ta ma.

¹⁴ Ezéchias, bi Juda, a nzlündo ndo a sam bi Assyrie, a kokwar Lakis, a ngaɗa: I gu malai! Mende ndohi var ngaya a deɓa, jèkeda! Man ka woya mpil gèɗ mèmè, i pa ka. A bi Assyrie a ndzhoɗo te ri Ezéchias, bi Juda, verzhè-genè te di 300.000 a guro te di gozhèm gozhèm 1.800.

¹⁵ Ezéchias a mhul Suli tèlèba man a zhè te gi Ndo nzi pèc pècèk, man a zhè te gi skwi mèshèlè bai, a mpa na.

¹⁶ Te ndev nasa, Ezéchias, bi Juda, a mpelasla na guro auda a ntamagi a sak gi Ndo nzi pèc pècèk, mva na bi Assyrie.

Sanchérib a nga ta wuɗai

¹⁷ Bi Assyrie a nzlündo Tharthan, Rab-Saria a Rabshaké a ndohi var kumba te Lakis a kokwar Jérusalem, a sam bi Ezéchias. A ta shkè a ta nza na a ma a kokwar Jérusalem, a ta ɗaha va a sam thal iyam te géɗèʼa, man a zhè a civèɗ ndè dak Foulon.

¹⁸ Ta baha na bai. A Eliakim, kra Hilkija, ndo mɓer gèɗ bai, a Shebna, ndo mwindè ɗèlèwèr, a Joach, kra Asaph, ndo mɓer ɗèlèwèr, ta shkè auda a sam ta.

¹⁹ Rabshakè a ngaɗa ta: Va-gaɗa na Ezéchias: Bi mbiaʼa, bi Assyrie, a goɗ ar haha: Ka gshè va a wa!

²⁰ Ka hur, ngèdè te ma ambalai a ngra ka maya, a nva ka wuɗi a ngi var dè? Ka jèkyè a ka gshè va a wa?

²¹ Na haha, ka gshè va a pandar ngurɓaʼa. Ka gshè va a Egypte, aman ko wawa man a thè va a vna, a tizhè riaʼa, a tsi gèɗ auda. Pharaon, bi Egypte, a gu arsa a sam ndohi tèlèba man ta gso va a vna.

²² Aman kin gaɗayè: Nga pi ndav nga a Ndo nzi pèc pècèk, Zhiklè nga — nengaʼa ka ɓi ɗè, man Ezéchias a ngedassa sam man ta va na skwi a pa, a kwa nzlatseda, a ngaɗa na Juda a Jérusalem: Sei kin tsi rai a sam mvi skwi a Zhiklè haha, te Jérusalem!

²³ Anai, va-tsu gèjau a bi ga, bi Assyrie, i woy a i pa ka plèshi 2.000. Ka slaha ka pi ndohi nʼnzi a deɓ plèsh dè?

²⁴ Ka woy a ka dzama ntabaw ɓèl bi ngaya, ko stadgenè dè? A ka gshè va a Egypte a gèɗ kiki var a ndohi plèsh nengaʼa dè?

²⁵ Anai i shkè a i gi var a kokwar haha, aman i gedèshèʼa, ara man Ndo nzi pèc pècèk a woya ka ɓi dè? Ndo nzi pèc pècèk a ngadayè: Do a ka gu var a kokwar sa, a ka gedassaʼa!

²⁶ Eliakim, kra Hilkija, Shebna a Joach, ta gada na Rabshaké: Ka gaɗa ta ɓèlèlihi ngaya a daʼai Aram, nga tsenaʼa. Ka gada nga a daʼai Juda ɓai, man ɓai ndohi a ma zlazlar kokwar tèlèba ta tsenaʼa.

²⁷ Rabshakè a mʼmbeɗa ta a ma: Bi ga a nzlindekayè, a i gada ta ndohi a ma zlazlar ka ɓi dè? Tengaʼa man ta si zai a kuri a sam kinè?

²⁸ Rabshakè a mshkè a mboho a wuɗai a daʼai Juda: Va-tsena ma bi mbiaʼa, bi Assyrie:

²⁹ Bi a goɗ arsa: Kin va na civèɗ a Ezéchias, aman a nda ngwode kinè ɓai! Nengaʼa a slaha a mʼmbél kinè azɓai.

³⁰ Aman bi Ezéchias a da bid kinè a nzlembaɗ Ndo nzi pèc pècèk, a ngaɗa: Ndo nzi pèc pècèk a da mbel nga a vava, kokwar haha a nzi a ri bi Assyrie azɓai, kin fa na gèɗ ɓai!

³¹ Kin co ma Ezéchias ɓai! Aman bi Assyrie a goɗ arsa: ngo-tsokoy gumai, va-shkè kinè a va iyè! Staɗ staɗ te ndev kinè a da ndi dau te gi dau na, a ndi nyi wof na, a si iyam thal na,

³² ha pats man i shkè a i da hil kinè a kokwar ngiɗè, man lèmèlèmè ara kokwar kinè, man dau a barassa, man movar a gi lak, kokwar man wof tsna a vongwom a ndev ɓi te pa, a kin nzi a nshèffè, a kin tidè azɓai. Kin va na civèɗ a Ezéchias da ngwode kinè ɓai, man a gada: Ndo nzi pèc pècèk a da mbel nga!

³³ Kin ngots zhiklèhi ndohi herkeda tsaɗ tsaɗ man ta mbel ta kokwar tengaʼa te ri bi Assyrie dè?

³⁴ Zhiklèhi Hamath a Arpad, ta tema? Zhiklèhi Sepharvaim, Héna, Ivva, ta tema? Ta mbela kokwar Samarie te ri ga dè?

³⁵ Te va zhiklè kokwar haha tèlèba, man a mbela kokwar na te ri ga, wa? A Ndo nzi pèc pècèk a da mbél kokwar Jérusalem te ri ga dè?

³⁶ A ndohai ta nza tètè, a ta mbeɗa na a ma ɓai. Aman bi a mfa ta ma a gèɗ: Kin mbeɗa na a ma ɓai!

³⁷ Te deɓaʼa Eliakim, kra Hilkija, ndo mɓer gèɗ bai, a Shebna, ndo mwindè ɗèlèwèr, a Joac, kra Asaph, ndo mɓer ɗèlèwèr, ta shkè a sam Ezéchias, a maslaka nkuratsaʼa a va, a ta menda na ma man Rabshaké a goɗa.