II Rois 16 - Ma Zhiklè

Achaz a gi bi a géɗ Juda

¹ Aman Pékach, kra Remalia, a ngu bi te mvi 17, ta feda Achaz, kra Jotham, a bi te Juda.

² Mvi Achaz 20, aman ta feda a bai, a ngu bi te Jérusalem, mvi 16. Nengaʼa a nʼnga skwi nzuraʼa ɓai a sam di Ndo nzi pèc pècèk, Zhiklè nengaʼa, lèmèlèmè ara David, babab na, ɓai.

³ A ndzodzor civèɗ bihi Israel, a bizhdè kra nengaʼa a ndev vogwa, ara mbèh skwi ndohi man Ndo nzi pèc pècèk a dzam ta auda a sam di ndohi Israel.

⁴ Nengaʼa a mva ta skwi a zhiklèhi, a nʼndara ta ɓurdi a sam mʼmbèh skwai, a géɗ za ba, a verzi wof tèlèba man vahaʼa a wushè azɓai.

Assyrie a ntakaha Juda

⁵ Retsin, bi Syrie, a Pékach, kra Remalia, bi Israel, to do a ta gu var a Jérusalem. Ta nza na ma a Achaz. Aman ta slaha ta dumaʼa ɓai.

⁶ Te ndev nasa, Retsin, bi Syrie, a mva ta Elath a deɓa a ndohi Syrie, a ndzam ta ndohi Juda auda te Elath. A ndohi Syrie ta nza a pa, ha patsna.

⁷ Achaz a nzlinde ta ndohi sak a sam Ti-glath-Piléser, bi Assyrie, aman a ngaɗa na: I ɓèl ngaya, i kra ngaya. Washkè a ka mbelkay auda te ri bi Syrie, te ri bi Israel man ta slambaɗa a ta da gi var a iyè.

⁸ Te deɓaʼa Achaz a nzlinda na verzhègenè a guro man a zhè te gi Ndo nzi pèc pècèk, man a zhè te gi skwi mèshèlè bai, a skwi mbalai a bi Assyrie.

⁹ A bi Assyrie a mco ma nengaʼa, a ndo a nduma kokwar Damas, a nhel ta ndohi kokwar a ɓèlè a kokwar Kir, a nkeda Retsin.

Achaz a til gi Zhiklè

¹⁰ Bi Achaz a ndo a kokwar Damas, aman ta zli gèɗ a Tiglath-Piléser, bi Assyrie, a nrka sam mʼmbèh skwai te Damas. A bi Achaz a nzlündo ndo a sam Urie, ndo mvi skwi a Zhiklè, a skwi nlèmdè sam mvi skwi a Zhiklè, a nlivèʼa tèlèba lèmèlèmè, da rom ngiɗè, da gu lèmèlèmè ara man a ngra na.

¹¹ A Urie, ndo mvi skwi a Zhiklè, a nrom sam mʼmbèh skwai. Skwi tèlèba man bi Achaz a ngra na ndo sak man a nzlündo a sam Urie, man a nʼngots te kokwar Damas, Urie a ngau, ga bi Achaz a mshkè a deɓa te kokwar Damas.

¹² Aman bai a mshkè a deɓa te kokwar Damas ma, a nrka sam mʼmbeh skwai. Te deɓaʼa a nherda na va a samaʼa,

¹³ a ndèr skwai, a vi skwai, te deɓaʼa a nguceda Pombaz man a woya a nva na Zhiklè a sam mʼmbèh skwai, man a va na Zhiklè a nshida na gèɗ a vna.

¹⁴ Sam mvi skwi a Zhiklè züdo man a zhè a sam Ndo nzi pèc pècèk, a nce na auda, a nhumbaɗaʼa a ngiɗè, a mfeda deɓa a tsagiaʼa.

¹⁵ Te deɓaʼa bi Achaz a njè na ma a gèɗ a Urie, ndo mvi skwi a Zhiklè, a ngaɗa: A gèɗ sam mvi skwi a Zhiklè mɓuaʼa, ndor skwi a prèk, vau skwi a dakwaɗ. Skwi man bai a viaʼa, a nʼndara na Zhiklè, a skwi man ndohi kokwar tèlèba ta ndara na, a ta va na Zhiklè, vau a pa! A ka bada skwi tengaʼa, a ka guceda Pombaz skwi man ta ndara na a ta zlaha na tèlèba a pa. A gèɗ sam mvi skwi a Zhiklè züdo, i da hérè a gèɗ nengaʼa dai.

¹⁶ A Urie, ndo mvi skwi a Zhiklè, a ngau tèlèba man bi Achaz a njè na a gèɗ.

¹⁷ Te deɓaʼa Achaz a mbazla kreblom, a nco wof a kokwi züdo auda. Sam mpèn va ba a nce na auda a deɓ zlèhi züdo man a nza a gèɗ tengaʼa, a mfeda a deɓ kwa.

¹⁸ Te gi mɓicè-va pats nshèk va, man ta rom te gi Zhiklè, a ntamagi bai a sam gi Ndo nzi pèc pècèk, a nhumbaɗaʼa, a gèɗ bi Assyrie.

¹⁹ Ma ngiɗè a gèɗ mizlinè Achaz, a gèɗ skwi tèlèba man a gau, ta windeda ɗèlèwèr ma bihi Juda.

²⁰ Te deɓaʼa Achaz a mʼmets na a va babhi na, a ta rda a vèvèɗ a sam babhi na, te kokwar David. Ezéchias, kra nengaʼa, a ngu bi te di man a nengaʼa.