II Rois 14 - Ma Zhiklè

Amatsia a gi bi a géɗ Israel

¹ Aman Joas, kra Joachaz, a ngu bi te Israel, te mvi macecèwaʼa, ta feda Amatsia, kra Joas, a bi te Juda.

² Mvi nengaʼa 25, aman ta feda a bai, a ngu bi te Jérusalem mvi 29. Nzlembaɗ mam na Joaddan, a nʼnza a Jérusalem.

³ A nengaʼa a ngau skwi nzuraʼa a sam di Ndo nzi pèc pècèk, aman nʼnga lèmèlè-mè ara David, babab na ɓai. Nengaʼa a nʼnza lèmèlèmè ara Joas, bab na.

⁴ Aman sam mvi skwi a Zhiklè a géɗ za, nzede ɓai. Ndohi ta zloho skwi a Zhiklè a ta ndara na ɓurdi a Zhiklè a géɗ za genè.

⁵ Aman a nʼngots wuɗi bi ma, a mbazl ta ndohi mizlinè nengaʼa man ta keɗa bai, bab na.

⁶ Aman wudahi tengaʼa man ta keɗaʼa, a mbazl ta ɓai, ara man ta Windo te ɗèlèwèr ma kita Moise, ara man Ndo nzi pèc pècèk a njo, a gaɗa: Staɗ staɗ ta da mets ta, ngiɗè a géɗ mali na, ngiɗè a géɗ mali na. Aman da bazla babaʼa a va wudahiaʼa ɓai, wudahi a va babhiaʼa ɓai.

⁷ Nengaʼa man a ndum ta ndohi Edom a dal boma, 10.000, a nduma Séla te var, a mbaha na kokwar Joktheel, ha patsna.

Juda a Israel ta bèzl va

⁸ Te deɓaʼa Amatsia a nzlinde ta ndohi sak a sam Joas, kra Joachaz, kra Jéhu, bi Israel, a ngaɗa na: Washkè! Ngo-do bozl va!

⁹ Joas, bi Israel, a nzlündo ndo a sam Amatsia, bi Juda: Vatak koʼom te Liban a nzlündo a sam wof ɗawai te Liban, a ngaɗa na: Va na dem ngaya a ngwoz a kra ga! Aman skwi dak te Liban ta beza a pa, a ta mbatsaha vatak a sak.

¹⁰ Ka bazl ta ndohi Edom, a ka grè gèɗ mènè! Nza a nfi va ngaya te ngwai! Ka kalde va ngaya, a va ndohi Juda, tèlèba a matakwan, a kin zi kinè èhèmè?

¹¹ Aman Amatsia a woy a nfi zlembaɗ ɓai. A Joas, bi Israel, a ndo a ta bozl va, nengaʼa a Amatsia, bi Juda, te Beth-Shé-mesh, te Juda.

¹² A ndohi Israel ta fa ta gèɗ a ndohi Juda, a ta venda ta gèɗ, tèlèba a ngwi ta.

¹³ Amatsia, bi Juda, kra Joas, kra Achazia, Joas a ngso, a ndzawaʼa, te Beth-Shémesh, a ndaʼa a kokwar Jérusalem. A mʼmbeɗa zlazlar Jérusalem, a hinè a ntamagi Ephraim, ha ndè a ntamagi te tsagai, slrats te ndevaʼa a tsi ri 400.

¹⁴ Te deɓaʼa a nhelda guro a verzhègenè, a kolongwi man a zhè te gi Zhiklè, te gi skwi mèshèlè bi ba, tèlèba a ma, a ɓèlèlihi ba, a ta men ta a deɓa a kokwar Samarie.

¹⁵ Ma ngiɗè a géɗ mizlinè Joas, a géɗ skwi man a gau, a géɗ maya na, ara man a ngu var a Amatsia, bi Juda, ta windeda ɗèlèwèr ma bihi Israel.

¹⁶ A Joas a mʼmets na, a va babhi na, a ta rda a Samarie, a sam bihi Israel; a Jéroboam, kra nengaʼa, a ngu bi te di man a nengaʼa.

Mʼmetsi Amatsia

¹⁷ Amatsia, kra Joas, bi Juda, te deɓ man Joas, kra Joachaz, bi Israel, a mʼmets na ma, a nʼnza a nshèffè mvi 15 dai.

¹⁸ Ma ngiɗè a géɗ mizlinè Amatsia, ta Windo te ɗèlèwèr ma bihi Juda.

¹⁹ A ta hüno a ta vhe ma a géɗ nengaʼa te Jérusalem. A nengaʼa a mhu na a Lakis. Aman ta hu a verzi nengaʼa a kokwar Lakis, a ta keɗa te pa.

²⁰ Te deɓaʼa ta feda a deɓ plèsh, ta ckoɗa Jérusalem a ta rda a pa, a va babhi na, te kokwar David.

²¹ Ndohi Juda tèlèba ta co Azaria, mvi nengaʼa 16, a ta feda a bai te di man a Amatsia, bab na.

²² Nengaʼa a nrom Elath, a mva ta a deɓa a ndohi kokwar Juda zaʼa, te deɓ man bai a mʼmets na a va babhi na.

Jéroboam II a gi bi a géɗ Israel

²³ Aman Amatsia, kra Joas, a ngau bi te Juda te mvi 15, Jéroboam, kra Joas, bi Israel te Samarie, a ngu bi mvi 41.

²⁴ Nengaʼa a nʼnga skwi man ambaha Ndo nzi pèc pècèk ɓai. Mali tèlèba man Jèroboam, kra Nebath, a ngau, a mpe ta ndohi Israel a wi a vna, a njèkeda ɓai.

²⁵ Nengaʼa a ndumkoɗai, a nckoɗi kokwar Israel a deɓa, a hinè te Hamath, ha ndè a ma iyam mbiaʼa te Araba, ara man Ndo nzi pèc pècèk, Zhiklè Israel, a goɗ te ma Jonas, kra Amitthai, ɓèl na, ndo nhadka ma te Gath-Hépher.

²⁶ A géɗ man Ndo nzi pèc pècèk a nrka ndohi Israel te nlèyè holholaʼa, ko ngurhai, ko golahai, ta ndev ta ma, ndo ntakaha Israel asaɓai.

²⁷ Ndo nzi pèc pècèk a woya a nzede nzlembaɗ Israel tʼherkeda a mèdèp ɓai, a nzlinda Jéroboam, kra Joas, aman a ntakaha ta.

²⁸ Ma ngiɗè a géɗ mizlinè Jéro-boam, a géɗ skwi tèlèba man a gau, a géɗ maya na man a ngu var a vna, a nhulkoɗi Hamath a Damas a deɓa a ri ndohi Israel, ta windeda ɗèlèwèr ma bihi Israel.

²⁹ Te deɓaʼa Jéroboam a mʼmets na a va babhi na (ta rda a vèvèɗ te Samarie) a sam bihi Israel, a Zacharie, kra na, a ngu bi te di man a nengaʼa.