II Rois 13 - Ma Zhiklè

Joachaz a gi bai a géɗ Israel

¹ Aman Joas, kra Achazia, bi Juda te mvi 23, ta feda Joachaz, kra Jéhu, a bai te Israel te Samarie. A ngu bi mvi 17.

² Nengaʼa a nʼngi skwi man ambaha Ndo nzi pèc pècèk ɓai, a ndzodzor mali Jéroboam, kra Nebath, man a pe ta ndohi Israel a wi a vna. A njèka ɓai.

³ A ndza na a ndav Ndo nzi pèc pècèk kumba a géɗ ndohi Israel, a mpe ta a ri a Hazael, bi Syrie, a ri a Ben-Hadad, kra Hazael, pèc pècèk.

⁴ Aman Joachaz a kuɗi a sam Ndo nzi pèc pècèk, a Ndo nzi pèc pècèk a ntsena ma nengaʼa, te man a nrka matakwan man bi Syrie a ga ta ndohi Israel.

⁵ A ta shkè auda te ri wuɗi bi Syrie, a ndohi Israel ta nza te gi ta ara nzlèzlèa.

⁶ Aman ta jèkeda mali ndohi gi Jéroboam ɓai, man a mpe ta ndohi Israel a wi a vna, a ta gu mali a ma ma. Ko mblom a nʼnza a nzlatsa te Samarie.

⁷ Njèkèɗi ndohi nda a sak 10.000 genè. A bi Syrie a nzede ta, a mbatsaha ta a sak ara koskosai.

⁸ Skwi ngiɗè a géɗ mizlinè Joachaz, a géɗ skwi man a gau, a géɗ maya na, ta windeda ɗèlèwèr ma bihi Israel.

⁹ A Joachaz a mʼmets na a va babhi na, a ta rda a Samarie. Joas, kra nengaʼa, a ngu bi te di man a nengaʼa.

Joas a gi bai a géɗ Israel

¹⁰ Aman Joas, bi Juda, a ngu bi te mvi 37, ta feda Joas, kra Joachaz, a bi a géɗ Israel, te Samarie. A ngu bi mvi 16.

¹¹ Nengaʼa a nʼnga skwi man ambaha Ndo nzi pèc pècèk ɓai, a njèkeda mali Jé-roboam, kra Nebath, man a mpe ta ndohi Israel a wi a vna, ɓai, a ndè a ma te nengaʼa.

¹² Skwi ngiɗè a gèɗ mizlinè Joas, a géɗ skwi man a gau, a géɗ maya na, ta windeda ɗèlèwèr ma bihi Israel.

¹³ Joas a mʼmets na a va babhi na, a Jéroboam a nʼnza a géɗ sam nʼnzi bi nengaʼa. Ta rda Joas a Samarie, a sam bihi Israel.

Mʼmetsi Elìsée

¹⁴ Matakwan a ngso Elisée, matakwan mʼmetsai. A Joas, bi Israel, a ndo a sam na, a kuɗi a géɗ nengaʼa, a ngaɗa; Bab ga, bab ga, kiki var Israel a ndohi plèsh!

¹⁵ Elisée a ngaɗa na: Cko lèkèɗ a sulom! A nengaʼa a mwoy lèkèɗ a sulom.

¹⁶ Elisée a ngaɗa na bi Israel: Feda sulom a deɓ rai! A mfeda sulom a deɓ rai. A Elisée a mpeda ri na a deɓ ri bai,

¹⁷ a ngaɗa: Winè nvakavar te civèɗ mvèng pats! A nengaʼa a mwinèa. A Elisée a ngaɗa: Ɓoro! A nengaʼa a mɓoro. A ngod a vaʼa: Sulom ngul ndo, man a Ndo nzi pèc pècèk! Sulom ngul ndo a géɗ Syrie! Ka da bazl ta ndohi Syrie te Aphek, a ka zede ta.

¹⁸ Te debaʼa a ngaɗa: Hul sulomhai! A nengaʼa a mhulo. A ngaɗa na bi Israel: Tseda herkeda! A nengaʼa a ntseda herkeda sak makar, a njèkeda.

¹⁹ A ndo Zhiklè a ngu ndav a géɗ nengaʼa, a ngaɗa: Ar ka tsi a gi sak 5, a gi 6, a ka zede ta ndohi Syrie tèlèba. Aman antanta ka da gi ngul ta sak makar genè.

²⁰ A Elisée a mʼmets na, a ta raʼa. A mvi a mvai metsarhi ta shkè te Moab, a ta zlün gi te kokwar.

Nrkedi a ma gidzavi Elisée

²¹ Aman pats ngiɗè ta ri ndo a vèvèɗ, a ndohi metsarhi ta shkè. A ta kalda nckondo sa a gidzavi Elisée, a to do ta. A nckondo a nlama na vatasl Elisée, a mʼmbelkaɗ na, a nslambaɗa.

²² Hazael, bi Syrie, a nga ta matakwan a ndohi Israel, a pats nshèffè Joachaz tèlèba.

²³ Aman Ndo nzi pèc pècèk a mva ta pombai, ta sia te va, a woy ta zaʼa, a géɗ ma man a nderzla a Abraham, Isaac a Jacob, a woya a ngedas ta ɓai. A pats nasa a kwol ta a mèdèp ka ɓai.

²⁴ A Hazael, bi Syrie, a mʼmets na, a Ben-Hadad a ngu bi te di man a nengaʼa.

²⁵ Te deɓaʼa Joas, kra Joachaz, a nʼngezlama na kokwarhi mbimbihiaʼa te ri Ben-Hadad, kra Hazael, man nengaʼa a ndau te ri bab na te va var. A Joas a ngu ngulaʼa sak makar, a nʼngots kokwarhi Israel a deɓa.