II Rois 12 - Ma Zhiklè

Ta rèm gi Zhiklè zaʼa

¹ Aman Jéhu a ngu bai, temvi 7, ta feda Joas a bai, a ngu bi te Jérusalem, mvi 40. Nzlembaɗ mam na Tsibja, te verzi Beer-Shéba.

² Joas a ngau skwi man ambaha Ndo nzi pèc pècèk a pats nshèffè nengaʼa tèlèba, ara man Jehojada, ndo mvi skwi a Zhiklè, a nslebda na.

³ Aman sam mvi skwi a Zhiklè te géɗèʼa, ta zhè genè. Ndohi ta vau skwi a Zhiklè a géɗ za genè, a ta ndara na ɓurdi a géɗ za.

⁴ Joas a ngaɗa ta ndohi mvi skwi a Zhiklè: Suli tèlèba man ta va na Zhiklè te gi Zhiklè, iyam Suli ndo staɗ staɗ tèlèba, Suli man ta jhèɗè te ri ndo staɗ staɗ tèlèba, Suli tèlèba man ta tsakala te gi Zhiklè a vaʼa,

⁵ ndohi mvi skwi a Zhiklè ta hilèʼa, ngiɗè a hilè a sam gwoli na, ngiɗè a hilè a sam gwoli na, a ta til gi Zhiklè a vna, a sam man a ngedassa a pa mènè.

⁶ Aman Joas a ngu bi te mvi 23, ndohi mvi skwi a Zhiklè ta tül skwi ngedassaʼa te gi Zhiklè di ɓai.

⁷ A bi Joas a mbaha na Jehojada, ndo mvi skwi a Zhiklè, a ndohi mvi skwi a Zhiklè ngiɗè, a ngaɗa ta: Kin tila sam ngedassaʼa te gi Zhiklè ɓai èhè-mè? Antanta kin hil Suli te ri gwoli kinè a va kinè asaɓai, aman sèi kin viaʼa, a nga til sam ngedassaʼa te gi Zhiklè.

⁸ A ndohi mvi skwi a Zhiklè ta co ma nengaʼa, a ta hul Suli te ri ndohi a va ta asaɓai, a ta til sam ngedassaʼa te gi Zhiklè a ri ta asaɓai.

⁹ Jehojada, ndo mvi skwi a Zhiklè, a nco kotai, a nzlünko te ndevaʼa, a mfeda a tsagi sam mvi skwi a Zhiklè, a ntamagi Ndo nzi pèc pècèk, te civèɗ ri mandai. Ndohi mvi skwi a Zhiklè, man ta ɓer ntamagai, ta feda Suli tèlèba a pa, man ndohi ta hulkoɗi a gi Ndo nzi pèc pècèk.

¹⁰ Aman ta rkaʼa, Suli te koti kumba ma, ndo mwindè Suli bai a ndo mvi skwi a Zhiklè mbiaʼa ta shke a ta hul Suli man a zhè te gi Ndo nzi pèc pècèk, a ta ngraʼa.

¹¹ A Suli ngraʼa ta va na a ri bi ndohi mi-zlinè, aman a ɓer gi Ndo nzi pèc pècèk, a tengaʼa ta pil ndohi mbèzl wof, a ndohi nɗizlè gai, man ta gu mizlinè a sam gi Zhiklè,

¹² a ndohi nrèm gai, a ndohi mpèsl kwa, a ta shum wof a vna, a ta shum kwa mpaslaʼa a vna, a ta til sam ngedassaʼa te gi Zhiklè, a ta pil mizlinè mèmè man ta til gi Zhiklè a vna.

¹³ Aman a verzhègenè a guro, man ndohi ta hulkoɗi a gi Zhiklè, ta vüɗo tassa a gwèsh a kokwi ngucè skwai, a tolom, a skwi guro tsaɗ tsaɗ, a skwi verzhègenè tsaɗ tsaɗ ɓai;

¹⁴ aman ta pa ta a ndohi man ta gu mizlinè a ta tül gi Zhiklè vna.

¹⁵ A ndohi man ta pa ta Suli a rai, a ndohi man ta gi mizlinè, ta dzhaɗ ta te deɓaʼa asaɓai, a gèɗ man ta ngwoda ri ɓai, ta gu zuraʼa.

¹⁶ Suli skwi man ta zhi a gèɗ malai, a géɗ mprè malai, ta feda a gi Zhiklè ɓai. Ndohi mvi skwi a Zhiklè ta ngotso.

Hazael a guvè Jérusalem

¹⁷ Hazael, bi Syrie, a ndo a ngu var a Gath, a ndumaʼa. Te deɓaʼa Hazael a woya a ndè a ngi var a Jérusalem.

¹⁸ A Joas, bi Juda, a mhul skwi man Josaphat, Joram a Achazia, babhi na, bihi Juda, ta va na Zhiklè a gi Zhiklè, a skwi man nengaʼa a mvau a ri na, a guro tèlèba man a zhè te gi skwi mèshèlè te gi Zhiklè, te gi bi ba, a nzlinda tèlèba a sam Hazael, bi Syrie. A nengaʼa a njèkeda ngi var a Jérusalem.

¹⁹ Skwi ngiɗè a géɗ mizlinè Joas, a géɗ skwi tèlèba man a gau, ta windeda dèlè-wèr ma bihi Juda.

²⁰ Golahi nengaʼa ta slambaɗa na va, a ta hüno a ta vhè ma a géɗ nengaʼa. A ta keɗa Joas te gi te Millo, aman a ndè a kokwar Silla.

²¹ Jozacar, kra Shimeath, a Jozabad, kra Shomer, ɓèlèlihi nengaʼa, ta keɗaʼa, a mʼmets na. A ta rda a sam babhi nengaʼa te kokwar David. Amatsia, kra na, a ngu bi te di man a nengaʼa.